‏ Ecclesiastes 10

1Ольген чибинлер къыйметли майларнынъ мис къокъусыны
агъыр къокъугъа чевирир.
Бираз ахмакълыкъ да икмет ве шуретликтен устюн келе.
2Акъыллынынъ юреги догърулыкъкъа ынтылыр,
ахмакънынъ юреги исе яманлыкъкъа.
3Ахмакъ насыл ёлнен кетсе де, акъылы етмез,
озь ахмакълыгъыны эписине косьтерир.
4 ^aБашлыгъынъ санъа къаршы гъазапланса,
еринъден кетме,
чюнки сувукъкъанлыкъ буюк янълышларны бастырыр.

5Ер юзюнде бир даа яманлыкъны корьдим:
укюмдар япкъан янълышны.
6Джаиллик юкъары котериле,
зенгинлер исе ашагъы отуралар.
7 ^bКъуллар ат аркъасында кеткенлерини,
мырзалар исе къуллар киби,
джаяв кеткенлерини корьдим.

8 ^cЧукъур къазгъан онъа тюшмек мумкюн,
диварны йыкъкъан адамны
йылан чакъмакъ мумкюн.
9 ^dТашлар ташыгъан адам
озюне зарар кетирмек мумкюн,
одун парлагъан адам да
телюкеге къалмакъ мумкюн.

10Балтанынъ агъзы токъалланып да къайралмаса,
чалышмагъа зор олур,
лякин икмет буны догъурлап олур.

11 ^eЙылан ырымдан эвель чакъса,
ырымджынынъ файдасы олмаз.

12 ^fИкметли адамнынъ агъзындан
чыкъкъан сёзлери онъа мерамет кетирир,
ахмакънынъ сёзлери озь башыны ашар.
13Агъзындан чыкъкъан сёзюнинъ башы – ахмакълыкъ,
сонъу – яман акъылсызлыкъ,
14 ^gве ахмакъ чокъ лаф этер.

Кимсе келеджекте не оладжагъыны бильмез.
Ондан сонъ не оладжагъыны онъа ким айтып олур?

15Ахмакънынъ замети оны ёрулта,
о, шеэрге кеткен ёлны биле бильмез.

16Эгер бирде-бир мемлекетнинъ падишасы
яш огълан олса ве
мырзалары сабадан зияфет этселер,
шу мемлекетнинъ алы фена!
17 ^hПадишасы асылзаде табакъасындан олса,
мырзалары да, сархош олмакъ ичюн дегиль де,
такъатланмакъ ичюн вакътында ашаса,
не бахтлыдыр бу мемлекет!

18Тенбелликтен таван асылып къалыр,
къол къавуштырып отурмакътан
эвнинъ дамы акъар.

19 ⁱЗияфет зевкъ ичюн япылыр,
шарап яшайышны шенъ этер,
акъча исе эписине джевап берер.

20 ^jПадишаны ичинъден биле къаргъама,
яткъан оданъда биле байны къаргъама,
чюнки кокте учкъан къушлар
сёзюнъни еткизмек мумкюн,
къанаты олгъан сою лафынъны айтып берер.