‏ Ecclesiastes 5

Алель-аджеле берильген адакълар акъкъында

1 ^aБир шей айтмагъа ашыкъма, Алланынъ огюне бир шей кетирмеге чапма.
Алла кокте, сен исе ердесинъ.
Шунынъ ичюн чокъ лаф этме.
2 ^bЧокъ къасевет олгъан ерде тюшлер келе.
Чокъ лаф да бойле этип ахмакълыкъ догъура.

3 ^cАллагъа адакъ бергенинънен, оны беджермеге ашыкъ. О, ахмакълардан разы олмай. Берген адагъынъны беджер! 4 ^dАдакъ берип де, оны беджермемектен адакъ бермемек яхшыдыр. 5 ^eБашынъа гуна тюшюрмесин деп, тилинъни тут, мелекнинъ огюнде де: «Мен янъылдым», – деме. Алла япкъан ишлеринъни дарма-дагъын этмесин деп, лафынънен Оны гъазапландырма. 6 ^fЧокъ лафта да, чокъ тюшлерде де – бошлукъ. Сен исе Алладан къоркъ!

Байлыкъ файдасыздыр

7 ^gЭгер сен ёкъсулны хорлагъанларыны я да бирде-бир ерде адалетнен акъикъатны бозгъанларыны корьсенъ, бунъа шашма. Бир башлыкънынъ устюнден башкъа башлыкъ бар, экисинден юкъары исе даа башкъасы бар. 8Топракъ эр бир адамгъа файда кетире, тарлалар падишагъа биле хызмет этелер.

9Параны севген адам парагъа тоймаз,
зенгинликни севген де къазанчындан разы олмаз.
Бу да бошуна!

10Яхшы маллар арткъан сайын,
оларны къуллангъанлар да арта.
Лякин оларгъа козьлеринен бакъмакътан гъайры,
онынъ сабысына не хайыр?

11Азмы-чокъмы ашагъанына бакъмадан,
чалышкъан адамнынъ юкъусы татлы,
зенгиннинъ байлыгъы исе онъа юкъу бермей.

12 ^hМен ер юзюнде бир аджджы беля корьдим:

Адамнынъ топлагъан байлыгъы онъа зарар кетире.
13Бу байлыкъ огъурсызлыкътан гъайып ола.
О, догъгъан огълуна бир шей къалдырып оламай.
14 ⁱАнасындан насыл догъгъан олса, адам ойле де кетер.
Заметинден янына бир шей алып кетмез.

15 ^jБу буюк белядыр:
адам насыл кельген олса, ойле де кетеджек.
Бошуна чалышкъанындан онъа не файда?
16О исе, бутюн куньлери девамында къаранлыкъта ашагъан,
башына баягъы кедер, сыкъынты ве гъазаплар тюшкен.

17Мен даа буны корьдим: адамгъа ашап-ичмеге ве Алла берген бутюн омрю девамында ер юзюнде эткен заметлеринден разы олмагъа – хош ве яхшыдыр, чюнки будыр онынъ къысмети. 18 ^kЭгер Алла адамгъа мал-мульк ве байлыкъ берип, оларнен файдаланмагъа, озь пайыны алмагъа, эм де эткен заметлеринден зевкъ алмагъа имкян берсе, бу – Алладан бахшыштыр. Адам яшайышнынъ куньлери акъкъында тюшюнджеге далмаз, чюнки Алла онынъ юрегине къуванч ёллай.19