‏ Ecclesiastes 2

1Озь-озюме: «Къана, мен озюмни бахыт ве шенъликнен сынап бакъайым», – дедим. Амма бу да бош иш олгъаныны анъладым. 2 ^aБош кулькю акъкъында: «Ахмакълыкъ», шенълик акъкъында: «Ондан не файда?» – айттым. 3Беденимни шарапнен сынап бакъмакъ къарарына кельдим. Эм де, инсан огъуллары ичюн нелер яхшы ве бу дюньядаки яшайышларнынъ саювлы куньлери девамында олар нелер япмакъ кереклигини бильмек ичюн, юрегим икметли къалып, ахмакълыкъкъа урулмагъа ниетлендим.

4 ^bБуюк ишлер яптым мен: озюме эвлер къурдым, юзюм багъларыны сачтым. 5 ^cОзюме багъчаларны ве паркларны асрадым, анда чешит тюрлю мейва тереклерини осьтюрдим. 6Оськен терекликлерни сувармакъ ичюн озюме хавузлар яптым. 7Озюме къулларны ве къыз къулларыны алдым, эвимде догъгъан къулларым да бар эди. Меним туварларымы ве къой-эчкилерим Ерусалимде менден эвель эписи яшагъанларнынъ айванларындан зияде эди. 8 ^dОзюме кумюш, алтын ве виляетлердеки падишаларнынъ къыйметли шейлерини топладым. Озюме йырджыларны ве йырджы къызларны ве инсан огъулларына зевкъ берген гузель харем алдым. 9 ^eМен пек улу ве Ерусалимде менден эвель олгъан эписи яшагъанлардан зенгин олдым. Икметим де меннен эди.

10Козьлерим не истесе, оны ала эдим,
юрегиме де ич бир шенъликте ред этмей эдим,
юрегим эписи япкъан ишлериме къувана эди,
бу, эписи ишлеримден олгъан къысметим эди.
11 ^fМен къолларым япкъан ишлеримнинъ эписине,
бу ишлерни япкъанымда эткен заметиме айланып бакътым:
Иште, эписи бошуна ве ель къувалавдыр,
ер юзюнде олардан да бир файда ёкъ.

12Сонъ мен икмет, акъылсызлыкъ ве ахмакълыкъкъа
айланып бакътым.
Падишалыкъкъа янъы отургъан адам
энди япылгъанындан арткъач не япып олур?
13Къаранлыкътан ярыкъ хайырлы олгъаны киби,
мен ахмакълыкътан икмет хайырлы олгъаныны корьдим.
14 ^gИкметли къайда кеткенини корер,
ахмакъ исе къаранлыкъта къармаланыр.
Амма мен эр кеснинъ сонъу бир олгъаныны анъладым.

15«Ахмакънынъ башына кельгени,
меним де башыма келеджек, – дедим озь-озюме.
– Ойле олса, о къадар икметли олгъанымдан не файда?»
«Бу да бошуна», – деп тюшюндим.
16 ^hИкметли де, ахмакъ киби,
эбедиен кимсенинъ акъылында къалмайджакъ.
Келеджекте эр шей унутылыр.
Языкъ ки, икметли де, ахмакъ киби, оле!
17Бойлеликнен, яшайышны кореджек козюм олмады,
чюнки ер юзюнде япылгъан ишлер
манъа файдасыз корюнди.
Эр шей бошуна ве ель къувалавдыр.

18 ⁱЭткен заметимни де кореджек козюм олмады, чюнки оны менден сонъ келеджек адамгъа къалдырмакъ кереким. 19О адам икметли, я да ахмакъ оладжагъыны ким биле? Мен замет эткен ве ер юзюнде озюмни икметли косьтерген заметимнен о къулланаджакъ. Бу да бошуна. 20Сонъ ер юзюнде эткен заметимден умютим кесильди. 21Бир адам икмет иле, бильги ве мувафакъиетнен замет этип, озь къазангъанларыны асыл замет этмеген адамгъа бермеге борджлу. Бу да бош шей ве буюк адалетсизликтир. 22Ер юзюндеки заметинден ве юрегининъ къайгъысындан адамгъа не къаладжакъ? 23 ^jОнынъ эписи куньлери – кедер, замети де – къасеветтир, геджеси биле онынъ юреги раатлыкъ бильмей. Бу да бошуна!

24 ^kАшап-ичмектен ве эткен заметинден зевкъ алмакътан ич бир шей адамгъа яхшы дегиль. Бу да, корьгениме коре, Алладандыр! 25Онсуз ким ашап олур я да зевкъ алып олур? 26 ^lАлла, Онынъ козюнде яхшы олгъан адамгъа икмет, бильги ве къуванч бере. Гунакяргъа исе, сонъундан Алланынъ огюнде яхшы олгъан адамгъа къалдырсын деп, топлап-джыймакъ къасеветини бере. Бу да бошуна ве ель къувалавдыр!