‏ Ecclesiastes 3

Эр шейнинъ озь вакъты-саати бар

1Эр шейнинъ озь вакъты-саати бар, ер юзюнде эр бир ишнинъ заманы келир:

2 ^aдогъмакъ вакъты ве ольмек вакъты;
сачмакъ вакъты ве сачылгъан шейни чыкъармакъ вакъты;
3ольдюрмек вакъты ве тедавийлемек вакъты;
йыкъмакъ вакъты ве къурмакъ вакъты;
4 ^bагъламакъ вакъты ве кульмек вакъты;
матем тутмакъ вакъты ве ойнамакъ вакъты;
5ташларны дагъытмакъ вакъты ве оларны джыймакъ вакъты;
къучакъламакъ вакъты ве къучакъламакътан къачынмакъ вакъты;
6къыдырмакъ вакъты ве джоймакъ вакъты;
сакъламакъ вакъты ве ташламакъ вакъты;
7 ^cйыртмакъ вакъты ве тикмек вакъты;
сусып отурмакъ вакъты ве айтмакъ вакъты;
8севмек вакъты ве нефретленмек вакъты;
дженк вакъты ве барышыкъ вакъты.

9 ^dЧалышкъан адамгъа эткен заметинден не файда? 10 ^eМен, Алла адамларгъа огърашмакъ ичюн берген ишни корьдим. 11 ^fАлла яраткъан эр бир шей озь вакътында гузельдир. О, адамларнынъ юреклерине эбедийлик къойды, лякин башындан сонъунадже Онынъ ишлерине адамнынъ акъылы етмез. 12 ^gЯшайышларында шенъленмектен ве яхшылыкъ япмакътан гъайры адамлар ичюн яхшы шей олмагъаныны анъладым. 13 ^hЭгер адам ашап-ичсе ве эр бир эткен заметинде яхшылыкъ корьсе, бу – Алладан бахшыштыр. 14Алланынъ бутюн япкъанлары эбедий оладжагъыны да анъладым: онъа бир шей къошмагъа я да алып ташламагъа чаре ёкъ. Адамлар Алладан къоркъсунлар деп, О, бойле иш япа.

15 ⁱЭвель не олгъан олса, шимди де о, оладжакъ,
илериде не оладжакъ олса, о, энди олгъан эди,
ве Алла кечмишни къайтарыр.

Дюньядаки акъсызлыкъ акъкъында

16Даа ер юзюнде мен адалет ерине акъсызлыкъ
ве инсафлыкъ ерине акъсызлыкъ корьдим.

17 ^j«Инсафлы да, инсафсыз да Алланынъ огюнде
джевап береджек, – деп тюшюндим.
– Эр ишнинъ озь вакъты-саати бар
ве эр бир ишнинъ бакъыладжакъ вакъты бар».

18 ^k«Инсан огъуллары акъкъында исе, Алла оларны сынасын да, олар айван олгъанларыны анъласынлар», – деп тюшюндим. 19 ^lИнсан огъулларынынъ башына кельгени айванларнынъ да башына келир. Оларнынъ сонъу бир. Бири насыл ольсе, башкъасы да ойле оле. Нефес алгъанлары да бир. Адамнынъ айван огюнде бир устюнлиги ёкъ. Эр шей бош! 20 ^mЭписи бир ерге кете: эр бир шей топракътан кельген, топракъкъа да айланаджакъ. 21Инсан огъулларынынъ руху тёпеге котерильгенини, айванларнынъ руху исе ашагъы тюшкенини ким бильсин?

ⁿБойлеликнен, мен, адам ичюн озь япкъан ишлеринден зевкъ сюрмектен гъайры яхшы шей олмагъаныны анъладым. Бу онынъ къысметидир, чюнки ондан сонъ не оладжагъыны онъа ким косьтерип олур?22