a 1 Пётр 1.3; 2 Кор 1.3
bИуда 1.24; Кол 1.22; 1 Тес 4.7
c1 Юх 3.2; Рим 8.15-16; Гал 3.26
dКол 1.14
eЭф 3.3-5; 6.19
fЭф 2.14; Кол 1.20
gЭст 8.8; 2 Кор 1.22; Эф 4.30
h Кол 1.3-4
iКол 1.27
jЗбр 109.1; Фаал 7.55-56; Рим 8.34; Эф 2.6; Кол 3.1
k1 Пётр 3.22; Рим 8.38; 1 Кор 15.24; Кол 2.10; Еуд 1.4
lЗбр 8.7; 109.1; 1 Кор 11.3; 15.27; Эф 5.23
m1 Кор 15.28; Эф 4.12; 5.23; 5.30; Кол 1.18; 3.11

‏ Ephesians 1

Селямлашув

1Павел, Алланынъ истегенинен Иса Месихнинъ эльчиси, –

Эфес шеэриндеки азизлерге ве Иса Месихке инангъанларгъа:

2Алла Бабамыз ве Рабби Иса Месих сизге эйилик ве тынчлыкъ-аманлыкъ берсин!

Алланы макътав

3 aАлланы, Раббимиз Иса Месихнинъ Бабасыны, шуретленъиз! О, бизге Месихте эр бир коклердеки рухий бахшышны берди. 4 bБиз Онынъ огюнде азиз ве севгиде къабаатсыз олайыкъ деп, Алла бизни Месихте дюнья яратылмасындан эвель сайлады. 5 cО, Озь эйи истегенинен бизни Иса Месихнинъ ярдымынен Озюнинъ огъуллары япмагъа эвельден къарар этти. 6Онынъ шуретли эйилигине шукюрлер олсун, чюнки Озь севимли Огълунда О, бизге яхшылыкъ берди. 7 dОнынъ къанынен биз Онда къуртулыш таптыкъ, ве бизим гуналы ишлеримиз багъышланды, чюнки Онынъ эйилиги пек буюктир. 8Алла бутюн акъылданеликнен ве анълавнен бу эйилигини бизге боллукънен берди. 9 eАлла бизге Озь гизли истегини ачып берди; Озь эйи разылыгъына коре, О, истегини Месихтен беджермеге эвельден акъылына къойды. 10 fАлла шу ниетни, вакъты-саати кельгенде, ерине кетирмеге истеди: эр бир шейни – ердеки ве коктеки бутюнни – Онда, Месихнинъ башлыгъында бирлештирмектир. 11Онда биз Алланынъ халкъы олдыкъ; эписини Озь истегинен беджерген Алла буны япмагъа эвельден къарар чыкъарды. 12Месихке ишангъанларнынъ биринджилери олгъанда, биз Онынъ шуретини юксельтмек керек эдик. 13 gКъуртулышынъыз акъкъында Къуванчлы Хаберни эшиткенинъизде ве Месихке инангъанынъызда, сизлер Месихте акъикъат сёзюни, ваде этильген муурьни, яни Мукъаддес Рухны алдынъыз. 14Рух – Алланынъ адамлары къуртулсынлар ве Алланынъ шурети юксельсин деп – бизге бериледжек мираснынъ биринджи къысмыдыр.

Павелнинъ дувасы

15 hШунынъ ичюн мен сизинъ Рабби Исагъа иманынъыз ве эписи азизлерге севгинъиз акъкъында эшиткенде, 16сизлер ичюн токътамайып Аллагъа шукюр этем ве сизлерни дуваларымда хатырлайым, 17эм де Раббимиз Иса Месихнинъ Алласына, шуретли Бабагъа ялварам: сиз Алланы билинъиз деп, О сизге рухий акъылданеликни ве анълавны берсин, 18 iюрегинъизнинъ козьлерини айдынлатсын. Сонъ сиз, О сизлерни къайсы бир умютке чагъыргъаныны, азизлернинъ арасында Онынъ шуретли мирасы насыл гузель олгъаныны, 19Алланынъ къудретининъ буюклиги насыл сынъырсыз олгъаныны да билирсинъиз. Биз Онынъ кучьлю къуветининъ иши ичюн инанамыз. 20 jАлла бу къуветни Месихте ишлетип, Оны олюлерден тирильтти ве коклерде, Озь онъ тарафына, 21 kэр бир башлыкътан ве акимиеттен, кучьтен ве салтанаттан юксекче отуртты, Оны тек бу дюньяда дегиль, келеджек дюньяда да айтылгъан эр бир адлардан юдже япты. 22 lАлла Онынъ аякълары астына эписини къойды, Онынъ Озюни эписинден юксек ве иманлылар джемиетининъ башлыгъы оларакъ япты. 23 mИманлылар джемиети исе – Месихнинъ бедени, эписини эписинде Толдургъаннынъ толулыгъыдыр.
Copyright information for CrhCTB