‏ Ephesians 5

Ярыкъта омюр

1 ^aШунынъ ичюн, севимли балалар олып, Алладан орьнек алынъыз, 2 ^bве, Месих бизлерни севгени киби, сизлер де бойле севгинен яшанъыз. О бизлер ичюн Озюни бахшыш ве къурбан оларакъ, гузель къокъулы шей киби, Аллагъа берди.

3 ^cСизинъ аранъызда ороспулыкъ, ич бир пислик я да ачкозьлик тильге биле алынмасын, чюнки сиз азиз адамларсыз. 4 ^dБулашыкъ, акъылсыз ве ахлякъсыз лаф сизге ярашмаз. Аксине, Аллагъа шукюр этинъиз. 5 ^eШуны билинъиз: ич бир ороспу, пис я да ачкозь адам (бойле адам – путпересттир) Месихнинъ ве Алланынъ падишалыгъында мирас алмайджакъ.

6 ^fИч кимсе сизлерни бош сёзлернен алдатмасын; бу шейлер ичюн сёз динълемегенлернинъ башына Алланынъ гъазабы келеджек. 7 ^gШу себептен оларгъа къошулманъыз. 8 ^hСиз бир вакъытлары къаранлыкъ эдинъиз, энди исе Раббиде ярыкъ олдынъыз. Ярыкъ балалары киби яшанъыз. 9Ярыкънынъ мейвасы – эр бир яхшылыкъ, догърулыкъ ве акъикъаттыр. 10 ⁱРаббининъ разылыгъыны насыл тапмагъа бакъып огренинъиз. 11 ^jКъаранлыкънынъ мейвасыз ишлерине къошулманъыз, аксине, оларны ачыкъкъа чыкъарынъыз, 12чюнки оларнынъ гизли япылгъан шу ишлери акъкъында айтмагъа биле айыптыр. 13 ^kАчыкъкъа чыкъарылгъан эр шей ярыкънен ачыла, 14 ^lчюнки эр ачылгъан шей – ярыкътыр. Шунынъ ичюн бойле айтылгъан: «Эй, юкълагъан, тур ве олюлерден котериль, ве Месих сени ярыкълатыр».

15 ^mШунынъ ичюн, насыл яшагъанынъызгъа дикъкъат этип бакъынъыз; акъылсызлар киби дегиль, акъыллы адамлар киби арекет этинъиз, 16озь вакътынъызны бошуна кечирменъиз, чюнки биз яшаяткъан куньлер – яман куньлер. 17 ⁿШунынъ ичюн, акъылсыз олманъыз, лякин Раббининъ истегени насыл олгъаныны анъланъыз. 18 ^oСархош олгъандже шарап ичменъиз; шу, бозукълыкъкъа алып бара. Аксине, Мукъаддес Рухкъа толунъыз, 19 ^pзебурлар, макътав йырлары ве рухий тюркюлерни айтып, бири-биринъизнен лаф этинъиз, юреклеринъизде Раббиге йырланъыз ве макътавлар айтынъыз 20 ^qве эр вакъыт, эр бир шей ичюн Раббимиз Иса Месихнинъ Адынен Алла Бабагъа шукюр этинъиз.

Акъайлар ве апайлар

21Месихтен къоркъып, бири-биринъизге бойсунынъыз. 22 ^rАпайлар, Раббиге киби, акъайларынъызгъа бойсунынъыз. 23 ^sМесих иманлылар джемиетининъ башы ве Озь беденининъ къуртарыджысы олгъаны киби, акъай да озь апайынынъ башыдыр. 24Иманлылар джемиети Месихке насыл бойсунса, апайлар да эр шейде озь акъайларына бойле бойсунсынлар.

25 ^tАкъайлар, Месих иманлылар джемиетини севгени киби, озь апайларынъызны бойле де севинъиз. О, Озюни джемиети ичюн берди. 26 ^uОны сувнен ювып, Озь сёзюнен оны элялламагъа ве азиз этмеге, 27 ^vве оны Озюне, иманлыларнынъ шуретли джемиети киби: лекесиз, бурюшиксиз, я да бунъа ошагъан эксикликсиз, азиз ве къабаатсыз косьтермеге ниетленди. 28Акъайларгъа апайларыны, озь беденлерини киби, севмеге керек. Озь апайыны севген озь озюни севе. 29Ич кимсе ич бир вакъыт озь беденинден нефрет этмеген. Аксине, оны бакъа ве къайгъыра. Месих де Озь иманлылар джемиетини бойле бакъа ве къайгъыра, 30 ^wчюнки биз – Онынъ беден къысымларымыз. 31 ^xШу себептен акъай, ана-бабасыны къалдырып, озь апайына япышаджакъ, ве олар экиси бир вуджут оладжакълар. 32Бу сыр буюк; мен Месих ве иманлылар джемиети акъкъында айтам. 33 ^yБойлеликнен, эр биринъиз озь апайларынъызны, озюнъизни киби, севинъиз. Апай исе озь акъайыны урьмет этсин.