Est 8 | CrhCTB | STEP | О куню Ахашверош падиша ехудалыларнынъ душманы Хаманнынъ эвини Эстер къыраличеге берди. Эстер падишагъа Мордекъай онъа ким олгъаныны анълатты, ве Мордекъай падишанынъ огюне кельди.

‏ Esther 8

Ехудалыларгъа озьлерини къорчаламагъа разылыкъ берелер

1 О куню Ахашверош падиша ехудалыларнынъ душманы Хаманнынъ эвини Эстер къыраличеге берди. Эстер падишагъа Мордекъай онъа ким олгъаныны анълатты, ве Мордекъай падишанынъ огюне кельди. 2 ^aПадиша Хамандан къайтарып алгъан юзюгини пармагъындан чыкъарып, оны Мордекъайгъа берди. Сонъ Эстер Мордекъайны Хаманнынъ эвине бакъыджы япты.

3 ^bСонъ Эстер кене падишанен лаф этти, онынъ аякълары астына ерге тюшти, чокъ агълады ве агъагълы Хаманнынъ яман ишини ве онынъ ехудалыларгъа къаршы тюшюнип чыкъаргъан ниетлерини токътатмагъа ялварды. 4 ^cПадиша Эстерге тараф алтын таягъыны узатты. Эстер аякъ устюне турып, падишанынъ огюнде турды 5 ве бойле деди:

– Эгер падишанынъ истеги олса, эгер мен падишанынъ урьметини къазангъан олсам, эгер бу иш падишагъа догъру корюнсе, эгер де падиша мени бегенсе, кягъыт язсынлар, агъагълы Хаммедатанынъ огълу Хаман яздыргъан, падишалыкънынъ эр виляетиндеки ехудалыларны ёкъ этмеге буюргъан мектюплерни кери къайтарсынлар. 6 Халкъымнынъ башына тюшкен беляны насыл этип корерим? Тувгъанларымнынъ олюмини корьгениме насыл этип даянырым?

7 Ахашверош падиша Эстер къыраличеге ве ехудалы Мордекъайгъа бойле деди:

– Мына, мен Хаманнынъ эвини Эстерге бердим. Хаман ехудалыларны ольдюрмеге истегени ичюн, онынъ озюни дирекке астылар. 8 ^dСиз ехудалылар акъкъында истегенинъизни падишанынъ адындан язынъыз ве падишанынъ юзюгинен басынъыз. Падишанынъ адындан язылгъан ве падишанынъ юзюгинен басылгъан мектюплерни къайтармагъа исе чаре ёкъ.

9 ^eО вакъыт учюнджи айнынъ, яни Сиван айынынъ 23-юнджи куню падишанынъ кятиплерини чагъырдылар. Олар ехудалыларгъа, акимлерге, башлыкъларгъа ве Индистандан Хушкъадже 127 виляеттеки виляет башлыкъларына Мордекъайнынъ эр буюргъанларыны яздылар. Эр виляет ичюн озь языларынен, эр халкъ ичюн озь тилинен яздылар. Ехудалыларгъа да оларнынъ озь язысында ве озь тилинде яздылар. 10 ^fМордекъай мектюплерни Ахашверош падишанынъ адындан язды, оларны падишанынъ юзюгинен басты ве хаберджилернен ёллады. Хаберджилер падиша ичюн махсус бесленген чабик атлар устюне минип кеткен эдилер. 11 Мектюплерде падиша эр бир шеэрде яшагъан ехудалыларгъа топланмагъа ве яшайышларыны къорчаламагъа, ехудалыларнынъ душманларыны, виляетлернинъ ве халкъларнынъ кучьлю адамларыны, оларнынъ балаларыны ве апайларыны ёкъ этмеге, ольдюрмеге ве къырмагъа, мал-мульклерини де чайпап алмагъа разылыкъ бере эди. 12 ^g12-нджи айнынъ, яни Адар айынынъ 13-юнджи кунюнде Ахашверош падишанынъ бутюн виляетлеринде буны япмагъа мумкюн эди. 13 Шу кягъытнынъ копиясы эр бир виляетке бериледжек эди. Ехудалылар шу куньде душманларына джезасыны бермеге азыр олсунлар деп, шу кягъыт къанун оларакъ эр бир халкъкъа бильдириледжек эди.

14 ^hПадишанынъ чабик атларына минген хаберджилер тез кеттилер, падишанынъ буюргъаныны беджермеге ашыкътылар. Къанун Шушан къалесинде де илян этильди.

15 ⁱМордекъай мор ве беяз тюстеки падиша урбасынен, башында балабан алтын таджынен, сыртында индже кетенден мавылы къырмызы бир япынджанен падишадан чыкъты. Шушан шеэри де шенъленди ве къуванды.

16 ^jЕхудалылар къуванчтан ве севинчтен парылдай эдилер, ве эр ким оларны урьмет эте эди. 17 Эр бир виляетте, эр бир шеэрде, падишанынъ буюргъаны ве къануны барып еткен эр бир ерде ехудалыларда къуванч ве севинч, зияфет ве байрам эди. Мемлекетнинъ халкъларындан чокълары ехудалылардан пек къоркъып, озьлери ехудалы олдылар.