Exo 23 | CrhCTB | STEP | Ошек ташыманъыз. Ялан шаатлыкъ этип, джинаетчиге къол тутманъыз.

‏ Exodus 23

Адалетлик акъкъында

1 ^aОшек ташыманъыз. Ялан шаатлыкъ этип, джинаетчиге къол тутманъыз.

2 Чокълукънынъ пешинден яманлыкъкъа къошулманъыз, судда шаатлыкъ эткенде, чокълукъкъа къошулып, акъикъатны бозманъыз. 3 ^bФукъарени суд эткенинъизде, фукъарелигини аджып, ялан айтманъыз.

4 ^cЭгер душманынънынъ джоюлгъан бугъасыны я да эшегини тапсанъыз, онъа кетиринъиз. 5 Душманнынъ юк агъырлыгъындан йыкъылгъан эшегини корьсенъиз, душманнынъ янындан кечменъиз, эшегини котермеге онъа ярдым этинъиз.

6 ^dБашкъа адамларнынъ ишлери киби, фукъаренинъ ишини де адалетли чезинъиз. 7 ^eЯлан шаатлыкъны къабул этменъиз. Акълы ве къабаатсыз адамгъа олюм джезасыны тайинлеменъиз. Мен бу акъсызлыкъта къабаатлы олгъан адамны багъышламам. 8 ^fКъапарлар алманъыз. Къапарлар корьген козьни кёр этелер, акълыларнынъ ишлерини терс айландыралар.

9 ^gКельмешекнинъ джаныны агъырттырманъыз, онъа залымлыкъ этменъиз. Сиз кельмешекнинъ алыны билесинъиз, чюнки Мысыр топрагъында озюнъиз кельмешеклер эдинъиз.

Единджи йыл ве единджи кунь акъкъында

10 Алты йыл тарлаларынъызда ашлыкъ сачып, берекетини джыйынъыз, 11 ^hединджи йылы исе халкъынъыздан олгъан факъыр-фукъарелер кечинсин деп, олардан къалгъаныны да кийик айванлар ашап битирсинлер деп, топрагъынъызгъа раатлыкъ беринъиз. Юзюм ве зейтюн багъларына да ойле япынъыз.

12 ⁱАлты кунь ишлеринъизни этинъиз, единджи куню исе раатлыкъ куню олсун. Бугъанъызнен эшегинъиз раатлансынлар, къулунъызнынъ огълу ве кельмешек нефес алсынлар.

13 ^jМен сизге бутюн айткъан шейлеримни тутунъыз. Башкъа аллаларнынъ адларыны анъманъыз, олар агъызларынъыздан чыкъмасын.

Учь буюк байрам акъкъында

14 ^kЙылда учь кере Меним байрамларымны къайд этинъиз.

15 ^lМаясыз Пишкен Пите Байрамыны япынъыз. Мен санъа эмир эткеним киби, Авив айында ^{▼▼Авив айында – баарьнинъ ильк куньлеринде, къарарнен март я да апрель айында.} тайинленген куньлерде еди кунь маясыз пишкен пите ашанъыз. Сиз Мысырдан бу айда чыкъып кеткен эдинъиз. Меним огюме кимсе бош къолнен кельмесин.

16 ⁿТарлада сачкъан Биринджи Махсул Байрамыны япынъыз.

Тарладан бутюн берекетинъни джыйгъан сонъ, берекет джыйылув куньлерининъ сонъунда, Махсул Джыйылув Байрамыны япынъыз.

17 ^oЙылда учь кере эписи акъайларынъыз РАББИ-ТААЛЯнънынъ юзю огюне кельсинлер.

18 Манъа къурбан кетиргенинъизде, къурбаннынъ къаныны маялы отьмекке тёкменъиз. Байрам къурбанымнынъ ягъыны сабагъадже къалдырманъыз.

19 ^pЕрнинъ биринджи берекетинден энъ яхшы махсулларыны Алланъ олгъан РАББИнинъ Эвине кетиринъиз. Улакъны анасынынъ сютюнде пиширменъиз.

Ваделер ве насиатлар

20 ^qСени ёлда къорчаласын ве Мен санъа азырлагъан ерге алып барсын деп, Мен сенинъ огюнъден Мелегимни ёллайым. 21 Онынъ юзю огюнде озюнъизни низамлы тутунъыз ве Онынъ сёзюни динъленъиз. Онъа къаршы инатланманъыз. О, Онда Меним Адым олгъаны ичюн, гуналарынъызны багъышламаз. 22 ^rЭгер сиз Онынъ сёзюни динълеп, сизге бутюн айткъанларымны япсанъыз, Мен душманларынъызнынъ душманы олурым, сизге къаршы чыкъкъан адамларгъа къаршы чыкъарым. 23 ^sСизинъ огюнъден Мелегим кетип, сизни аморлыларгъа, хитлилерге, перизлилерге, ханаанлыларгъа, хивлилерге ве евуслыларгъа алып кеткенде, Мен бу халкъларны ёкъ этерим. 24 ^tСиз оларнынъ аллаларына табынманъыз, оларгъа хызмет этменъиз, ишлеринден орьнек алманъыз. Оларны парлап-парчаланъыз, пут ташларыны йыкъынъыз.

25 ^uРАББИге, сизинъ Алланъызгъа хызмет этинъиз. О вакъыт О, сизинъ отьмегинъизни ве сувунъызны багъышлап, хасталыкъларны сизден узакълаштырыр. 26 ^vСизинъ топрагъынъызда апайларынъызнынъ даа догъмагъан балалары тюшмезлер, къадынлар баласыз олмаз, омюрлеринъиз узакъ олур. 27 ^wМен ойле япарым ки, сизлер кельмезден эвель, адамлар Менден отьлерини патлатып шашмалайджакълар, душманларынъызны сизден къачмагъа меджбур этерим. 28 ^xОгюнъизден азманларны ёлларым, олар юзюнъиз огюнден хивлилерни, ханаанлыларны ве хитлилерни къуварлар. 29 ^yАмма топракъ бошамасын ве кийик айванлар чокълашмасынлар деп, юзюнъиз огюнден оларны бир йыл ичинде къуваламам. 30 Сизлер бу топракъны толдурмакъ ичюн баягъы артып чокълашмагъанынъыздже, оларны сизден яваш-яваш къуварым.

31 ^zСынъырларынъызны Къызыл денъизден башлап, фелестинлилернинъ денъизинедже ^{▼▼Акъ денъиз.} ве сахрадан башлап, улу Фират дерьясынадже кечиририм. Бу ернинъ сакинлерини сизге берерим, ве сиз оларны юзюнъиз огюнден къуварсынъыз. 32 Не оларнен, не аллаларынен анълашма тизменъиз. 33 ^abСизни Манъа къаршы гунагъа батырмамакъ ичюн, олар топрагъынъызда яшамасынлар. Эгер сиз оларнынъ аллаларына хызмет этсенъиз, бу сизге къапкъан олур.