Exo 2:3-10 | CrhCTB | STEP | Амма оны артыкъ сакъламагъа чареси къалмагъанындан, къамыштан орюльген сепетни алды ве оны къатраннен ве зифтнен зифтледи. Ичине баланы къойып, дерьянынъ ялысы янындаки къамышлыкъкъа къойды.

‏ Exodus 2:3-10

3 Амма оны артыкъ сакъламагъа чареси къалмагъанындан, къамыштан орюльген сепетни алды ве оны къатраннен ве зифтнен зифтледи. Ичине баланы къойып, дерьянынъ ялысы янындаки къамышлыкъкъа къойды. 4 Баланынъ татасы исе, онен не оладжагъыны корьмек ичюн, авлакъта турды.

5 Фыравуннынъ къызы дерьягъа ювунмагъа барды, онынъ хызметчи къызлары исе дерьянынъ ялы боюнда юре эдилер. Къыз къамышлыкънынъ арасындаки сепетни корьди ве озюнинъ хызметчисини оны алмакъ ичюн ёллады. 6 Ачты ве баланы корьди. Бала агълагъаны ичюн, къыз оны аджыды.

– Бу – еудий баласы, – деди.

7 Баланынъ татасы фыравуннынъ къызындан:

– Барып, баланы сюттен къалмагъандже эмиздирмек ичюн, еудий къадынларындан бирисини санъа чагъырайыммы? – деп сорады.

8 – Эбет, бар, – деди онъа фыравун къызы.

Къыз кетти ве баланынъ анасыны алып кельди. 9 Фыравун къызы онъа:

– Бу баланы ал да, оны эмиздир. Сонъ мен сенинъ акъкъынъны одерим, – деди.

Къадын баланы алды ве оны эмиздирди. 10 Бала буюк олгъан сонъ, о, оны фыравун къызына алып кельди, ве бала фыравун къызынынъ огълу олды. Фыравун къызы: «Мен оны сувдан чыкъардым», – деп, онъа Муса ^{▼▼Муса – къ. еуд. «моше» деген сёзнинъ айтылувы «мешетиху» (оны чыкъардым) деген сёзнинъ айтылувына ошай.} деген ад къойды.