Exo 24 | CrhCTB | STEP | РАББИ Мусагъа бойле деди: – Харунны, Надавны, Авихуны ве Исраильнинъ етмиш акъсакъалларыны янынъа алып, РАББИге котериль. РАББИге узакътан ибадет этинъиз.

‏ Exodus 24

Къурбанлыкъ огюнде халкънынъ ваделери

1 ^aРАББИ Мусагъа бойле деди:

– Харунны, Надавны, Авихуны ве Исраильнинъ етмиш акъсакъалларыны янынъа алып, РАББИге котериль. РАББИге узакътан ибадет этинъиз. 2 РАББИнинъ янына Муса бир озю кельсин, олар исе якъын кельмесинлер, халкъ да онен котерильмесин.

3 ^bМуса келип, халкъкъа РАББИнинъ эписи сёзлерини ве эмирлерини айтып берди. Бутюн халкъ да бир сеснен:

– РАББИнинъ сёзюни тутып, бутюн айткъанларыны япармыз, – деди.

4 Муса РАББИнинъ эписи сёзлерини язып къойды. Сонъ саба танъда турып, байыр тюбюнде къурбан ерини къурды ве Исраиль къабилелерининъ сайысына коре он эки таш къойды. 5 Сонъ исраилли огъланларгъа, РАББИге бутюнлей якъылгъан къурбанларыны чалмагъа ве таналарны сойып аманлыкъ къурбанларыны чалмагъа эмир этти. 6 Муса къаннынъ ярысыны савутларгъа джыйды, къалгъаныны къурбан ерине пускюртти. 7 Сонъ Васиет Китабыны алды ве эшиттирип халкъкъа окъуды. Халкъ:

– РАББИнинъ сёзюни тутып, Онынъ бутюн айткъанларыны япармыз, – дедилер.

8 ^cМуса савутлардаки къанны алып, халкъкъа пускюртти ве:

– Бу – бутюн айтылгъан шейлер акъкъында РАББИ сизлерге эткен васиетнинъ къаны, – деди.

9 Сонъ Муса, Харун, Надав, Авиху ве Исраильнинъ етмиш акъсакъалы байыргъа котерильдилер ве 10 ^dИсраильнинъ Алласыны корьдилер. Онынъ аякъларынынъ тюбюнде темиз кок якъуттан япылгъан, кок дайын тер-темиз олгъан мейданчыкъкъа ошагъан бир шей бар эди. 11 Исраилли башлыкълар Алланы корьген олсалар да, Алла оларгъа бир зарар кетирмеди. Башлыкълар анда ашап-ичтилер.

Муса Синай дагъы устюнде

12 ^eРАББИ Мусагъа бойле деди:

– Меним огюме байыргъа чыкъ да, мында ол. Исраиллилерни огретмек ичюн, Мен Къанун ве эмирлерни яздым. Оларны Мен санъа къаядан кесильген ташларнен берабер берерим.

13 ^fМуса ярдымджысы Ехошуанен барып, Алланынъ байырына котерилип башлады. 14 Акъсакъалларгъа исе:

– Биз къайтмагъандже, мында къалып турунъыз. Мына сизлернен Харун ве Хур къалалар. Кимде насыл дава олса, оларгъа барсын, – деди.

15 Муса байыргъа чыкъкъан сонъ, байырнынъ устюни булут сарды. 16 Алланынъ Шурети Синай дагъына энди, ве онынъ устюни алты кунь булут къаплады, единджи куню исе РАББИ булутнынъ ичинден Мусаны чагъырды. 17 ^gБайыр тёпесинде олгъан Алланынъ Шурети исраиллилерге алевленип янгъан атеш киби корюне эди. 18 ^hМуса, булутнынъ ортасына кирип, байыргъа чыкъты. Байыр устюнде Муса къыркъ кунь ве къыркъ гедже къалды.