Exo 25 | CrhCTB | STEP | РАББИ Мусагъа даа бойле деди:

‏ Exodus 25

Корюшюв Чадыры ичюн бахшышлар акъкъында

1 РАББИ Мусагъа даа бойле деди:

2 – Исраиль огъулларына айт ки, олар Манъа бахшышлар кетирсинлер. Эр джаны истеген адамдан Манъа бахшышлар алынъыз. 3 Олардан сиз аладжакъ бахшышлар булардыр: алтын, кумюш, тунч, 4 мор, мавылы къырмызы ве ачыкъ къырмызы юнь, индже ишленген кетен ве эчки юнюнден япылгъан безлер; 5 къойларнынъ дибагъ этилип къырмызы ренкке боялангъан терилер ве индже ишленген терилер, акация тереклери; 6 къандиль ичюн зейтюн ягъы, чешит тюрлю шейлерни ягъламакъ ичюн зейтюн ягъына къошулгъан гузель къокъулы шейлер ве якъмакъ ичюн къокъулы отлар; 7 эфод ве кокректеки торба ичюн шохам деген къыйметли ташлар ве дигер, козьлерге къоюлгъан къыйметли ташлар. 8 ^aИсраиллилер Манъа Азиз Ерни къурсунлар, ве Мен оларнынъ араларында яшарым. 9 Эписини Мен санъа шимди косьтереджек планларыма коре этинъиз. Мескенни ве онынъ эписи алетлерини япынъыз.

Васиет Сандыгъы акъкъында

10 ^bАкация терегинден Сандыкъ яп. Онынъ узунлыгъы 1,25 метр олсун, кенълигинен юксеклиги 0,75 метр ^{▼▼1,25 метр; 0,75 метр – къ. еуд. «эки бучукъ аммах», «бир бучукъ аммах».} олсун. 11 Ичини ве тышыны темиз алтыннен къапла, чевре-четинде тёпеден орьнекли чембер яса. 12 Алтынны иритип, дёрт алтын алкъа яп да, оларны ашагъыдаки дёрт кошесине туттур: эки алкъа бир тарафындан олсун, эки алкъа да экинджи тарафындан олсун. 13 Акация терегинден сырыкълар яса, оларны да темиз алтыннен къапла. 14 Сырыкъларны, оларнынъ ярдымынен Сандыкъны ташымакъ ичюн, онынъ четлеринден, алкъалардан кечир. 15 Сырыкълар Сандыкънынъ алкъаларында даима кечирильген олсунлар, оларны андан алмагъа олмай. 16 Сандыкънынъ ичине Мен санъа береджек Шаатлыкъны къой.

17 Сандыкънынъ къапагъыны – Мерамет Ерини – темиз алтындан яса: узунлыгъы 1,25 метр, кенълиги исе 0,75 метр олсун. 18 Мерамет Еринен эки Керувлар бир кесек алтындан япылып, Керувларны дёгюльген шекильде Мерамет Ерининъ эки четинден яса. 19 Бир Керувны бир четинден, экинджи Керувны экинджи четинден яса. Оларны ойле яп ки, къапакънынъ эки четинден тюртип чыкъсынлар. 20 Керувларнынъ къанатлары Мерамет Ерининъ тёпесини къаплап, юкъары котерильген олсунлар. Бетлеринен бири-бирине къаршы турып, Керувлар Мерамет Ерине тараф бакъсынлар. 21 ^dКъапакъны – Мерамет Ерини – Сандыкънынъ устюне къой. Сандыкънынъ ичине исе Мен санъа береджек Шаатлыкъны къой. 22 ^eАнда Мен сеннен корюшеджегим ве Шаатлыкъ Сандыгъынынъ устюнде олгъан эки Керувнынъ арасындан, Мерамет Ерининъ устюнден, исраиллилер ичюн эписи эмирлеримни санъа айтаджагъым.

Раббининъ булунувыны косьтерген пителери ичюн олгъан стол акъкъында

23 Акация терегинден стол яса. Онынъ узунлыгъы бир метр, кенълиги ярым метр, юксеклиги де 0,75 метр ^{▼▼Бир метр; ярым метр; 0,75 метр – къ. еуд. «эки аммах», «бир аммах», «бир бучукъ аммах».} олсун. 24 Оны темиз алтыннен къапла, чевре-четинде де орьнекли алтын чембер яса. 25 Чевре-четинде авуч кенълигинде ^{▼▼Авуч кенълигинде – къ. еуд. «бир тофах».} рейка яп, рейканынъ чевре-четине исе алтын чембер яса. 26 Стол ичюн дёрт алтын алкъа ясап, оларны дёрт кошесинден, дёрт аягъына пекит. 27 Алкъалар, рейканынъ янында олып, тышарыгъа бакъмакъ кереклер: столны ташымакъ ичюн, оларгъа сырыкълар кечириледжек. 28 Сырыкъларны акация терегинден ясап, темиз алтыннен къапла. Оларнынъ ярдымынен столны ташырлар. 29 Стол ичюн темиз алтындан, ичерлик бахшышларыны кетирмек ичюн, чанакълар ве пиалалар, гугюмлер ве мешребелерни яп. 30 ^hСтолнынъ устюне, Меним козюм огюне даима Меним булунувымны косьтерген пителерни къой.

Къандиль акъкъында

31 Темиз алтындан къандиль яп. Бу къандиль бир кесек маденден дёгюлип япылмакъ керек. Темели ве сапы, лампатлар къоймакъ ичюн чаначыкълары, гоньджелери ве чечеклери алтыннынъ бир бутюн кесегинден япылсынлар. 32 Сапынынъ четлеринден алты пытакъ чыкъсын: учь данеси къандильнинъ бир тарафындан, учь данеси де экинджи тарафындан. 33 Бадем чечегине ошагъан учь чаначыкъ, гоньджелери ве чечеклеринен берабер бир пытакъта олсун, бадем чечегине ошагъан учь чаначыкъ да, гоньджелери ве чечеклеринен экинджи пытакъта олсун. Къандильден чыкъкъан эписи пытакълар да айны ойле олсун. 34 Къандильнинъ сапында исе бадем чечегине ошагъан, гоньджелери ве чечеклеринен олгъан дёрт чаначыкъ олмакъ керек. 35 Олар къандильнинъ алты пытагъы чыкъкъан ерлеринде олсунлар. Эки пытакъ чыкъкъан еринде бир гоньдже, даа эки пытакъ чыкъкъан еринде экинджи гоньдже, даа эки пытакъ чыкъкъан еринде де учюнджи гоньдже. 36 Эм гоньджелери, эм пытакълары къандильнинъ сапындан чыкъмакъ кереклер. О, бир бутюн кесектен олып, темиз алтындан япылсын. 37 Онъа еди лампат ясап, лампатларнынъ огдеки тарафыны ярыкълатсынлар деп, оларны къандиль устюне къой. 38 Лампатлар ичюн машачыкъларны ве табачыкъларны темиз алтындан яса. 39 Къандильни, бутюн бу алетлеринен, 30 кило ^{▼▼30 кило – къ. еуд. «бир киккар».} темиз алтындан япсынлар. 40 ^jБакъ, Мен санъа байырда насыл косьтерген олсам, эр бир шейни тыпкъы ойле де яп.