Exo 38 | CrhCTB | STEP | Сонъ акация терегинден, узунлыгъынен кенълиги эки бучукъ метр олгъан, къурбанларны бутюнлей якъмакъ ичюн дёрткоше ерни япты. Онынъ юксеклиги бир бучукъ метр эди.

‏ Exodus 38

Къурбанларны бутюнлей якъмакъ ичюн ер

1 Сонъ акация терегинден, узунлыгъынен кенълиги эки бучукъ метр олгъан, къурбанларны бутюнлей якъмакъ ичюн дёрткоше ерни япты. Онынъ юксеклиги бир бучукъ метр ^{▼▼Эки бучукъ метр; бир бучукъ метр – къ. еуд. «5 аммах», «3 аммах».} эди. 2 Дёрт кошесинде тюртип чыкъкъан бойнузлар япты. Бутюн къурбан ерини тунчнен къаплады. 3 Къурбан ери ичюн къопкъалар, куречиклер, чанакълар, сенеклер ве комюр табакъларыны – эписи алетлерни тунчтан ясады. 4 Онъа тунчтан чильтернинъ бир чешити олгъан пармакълыкъны япты. Чильтерни къурбан ерининъ ашагъы тарафынынъ четлеринден ойле къойды ки, ортасына къадар етти. 5 Тунч чильтернинъ дёрт кошесинде сырыкъларны кечирмек ичюн дёрт тунч алкъа ясады. 6 Къурбан ери ичюн акация терегинден сырыкълар ясап, оларны тунчнен къаплады. 7 Къурбан ерини ташыгъанда, сырыкъларны онынъ эки четинден алкъаларгъа кечирди. Къурбан ерини тюпсюз оларакъ, тахтадан япты.

Тунч савут

8 ^bАбдест алмакъ ичюн савутны ве саджаягъыны Корюшюв Чадырынынъ янында хызмет эткен апайларнынъ кузьгюлерининъ тунчундан ясады.

Мескеннинъ азбары

9 Мескеннинъ азбарыны да япты: азбарнынъ дженюп тарафы ичюн перделерни индже ишленген кетенден япты, узунлыгъы азбар бою 50 метр ^{▼▼50 метр – къ. еуд. «100 аммах».} эди. 10 Перделерни асмакъ ичюн 20 дирек ясады, диреклер тюбюне 20 тунч темель япты. Диреклердеки ченгеллернен багъламаларны кумюштен ясады. 11 Шималь тарафы да 50 метр эди. О, 20 дирек ясады, диреклер тюбюне 20 тунч темель япты. Диреклердеки ченгеллернен багъламаларны кумюштен ясады. 12 Гъарбий тарафындан олгъан перделернинъ кенълиги 25 метр эди. Он дирек, оларнынъ тюбюнде – он темель эди. Диреклердеки ченгеллернен багъламаларны кумюштен ясады. 13 Азбарнынъ огюнден, шаркъий тарафындан олгъан кенълиги 25 метр эди. 14 Киришнинъ бир тарафы ичюн безлернинъ кенълиги еди бучукъ метр ^{▼▼25 метр; еди бучукъ метр – къ. еуд. «50 аммах», «15 аммах».} олып, олар ичюн учь темели олгъан учь дирек ясады. 15 Экинджи тарафына да перделернинъ кенълиги еди бучукъ метр олып, олар ичюн учь темели олгъан учь дирек ясады. 16 Азбарнынъ эписи тарафларына асылгъан перделер индже ишленген кетенден япылгъан эдилер. 17 Азбарнынъ чевре-четинде олгъан диреклердеки багъламаларнен ченгеллерни кумюштен, темеллерини исе тунчтан ясады. 18 Азбарнынъ къапусына асылгъан перде мор, мавылы къырмызы ве ачыкъ къырмызы юнь йиплеринден ве индже ишленген кетенден япылып, нагъышнен нагъышлангъан эди. Онынъ узунлыгъы он метр, юксеклиги де азбарнынъ перделеринен бир олып, эки бучукъ метр ^{▼▼Он метр; эки бучукъ метр – къ. еуд. «20 аммах», «5 аммах».} эди. 19 Перделер ичюн дёрт тунч темель устюнде тургъан дёрт дирекни ясады, оларнынъ ченгеллеринен багъламаларыны кумюштен ясады, тёпелерини де кумюшнен къаплады. 20 Мескеннинъ эписи къазычыкъларынен азбарнынъ къазычыкъларыны тунчтан ясады.

Мескен ичюн ишленильген маден

21 ^fМына Шаатлыкъ Мескенининъ къурулмасына кеткен масрафларынынъ джедвели. Оны баш руханий Харуннынъ огълу Итамарнынъ ёлбашчылыгъында, Мусанынъ эмиринен Левий къабилесинден акъайлар тиздилер. 22 Эр шейни исе, Мусагъа РАББИ эмир эткени киби, Ехуда къабилесинден Хурнынъ торуны, Урийнинъ огълу Бецалел япты. 23 Онъа Дан къабилесинден олгъан Ахисамакънынъ огълу Охолиав ярдым этти. О, усталыкънен оймагъа, планлар чызмагъа ве мор, мавылы къырмызы, ачыкъ къырмызы юньден ве индже ишленген кетенде нагъыш нагъышламагъа биле эди. 24 Мукъаддес Ернинъ эписи алетлерининъ къурулмасына бахшыш этилип масраф этильген алтын, мукъаддес шекель чекисине коре, къарарнен 880 кило ^{▼▼880 кило – къ. еуд. «29 киккар ве 730 шекель».} эди. 25 ^hДжемиетнинъ сайылгъан акъайларындан тюшкен кумюш исе, мукъаддес шекель чекисине коре, къарарнен 3 020 кило ^{▼▼3 020 кило – къ. еуд. «100 киккар ве 1 775 шекель».} эди. 26 ^jОны 20 яшындан буюк олгъан, саювгъа тюшкен 603 550 адамдан джыйгъан эдилер, бир адам башына, мукъаддес шекель чекисине коре, беш грамм ^{▼▼Беш грамм – къ. еуд. «бир бека», я да ярым шекель.}. 27 Мукъаддес Ер ве перде темеллерининъ япылмасына 3 000 кило кумюш кетти. 100 темель ичюн 3 000 кило, я да бир темель ичюн 30 кило кумюш. 28 20 кило кумюшнен диреклер ичюн ченгеллернен багъламаларыны ясады ве диреклернинъ тёпелерини къаплады. 29 Бахшыш этильген тунч 2 125 кило ^{▼▼2 125 кило – къ. еуд. «70 киккар ве 2 400 шекель».} эди. 30 Ондан Корюшюв Чадыры къапусы диреклернинъ темеллери, къурбан еринен онынъ чильтери ве эписи алетлери, 31 азбардаки эписи диреклерининъ темеллери, азбарнынъ къапусындаки диреклернинъ темеллери ве Корюшюв Чадырынынъ ве азбарнынъ эписи къазычыкълары япылгъан эди.