‏ Exodus 6

Алла Мусагъа джевап бере

1РАББИ Мусагъа:

– Энди фыравуннен не япаджагъымны корерсинъ. Къудретиме бойсунып, о, оларны йиберер. Къудретиме бойсунып, оларны озь топрагъындан къувалар биле, – деди.

2Алла Мусагъа:

– Мен – РАББИм. 3 ^aМен Ибраимге, Исхакъкъа, Якъупкъа «Къудретли Алла» Адымнен келе эдим, лякин «РАББИ» деген Адымнен оларгъа ачылмадым, – деди. 4– Мен оларгъа Ханаан топрагъыны, олар вакътынджа яшагъан топракъны бермеге васиет эттим. 5Мысырлылар исраиллилерни къуллукъта туткъанлары акъкъында оларнынъ инъильтилерини эшиттим ве Васиетимни хатырладым. 6Бойлеликнен, Исраиль огъулларына айт: «Мен – РАББИм. Сизни мысырлыларнынъ зулумындан алып чыкъарым, оларнынъ къуллугъындан азат этерим ве къудретимни косьтерип, буюк белялар ярдымынен сизлерни къуртарырым. 7 ^bСизни Озюм халкъым этип, къабул этерим ве сизге Алла олурым. Сонъ сиз билирсинъиз ки, Мен – РАББИм, сизни Мысыр топрагъындан, Мысыр зулумындан алып чыкъкъан сизинъ Алланъызым. 8 ^cМен сизни Ибраимге, Исхакъкъа ве Якъупкъа бермеге емин эткен топракъкъа кирсетирим ве оны мулькюнъиз этип, сизге берерим. Мен – РАББИм».

9Муса буны Исраиль огъулларына айтты, лякин олар Мусаны рухтан тюшкенлери ве къуллугъы агъыр олгъаны себебинден динълемедилер.

10РАББИ Мусагъа даа:

11– Фыравунгъа, Мысыр падишасына барып, айт онъа, Исраиль огъулларыны озь топрагъындан йиберсин, – деди.

12Муса РАББИнинъ огюнде:

– Бакъ, Исраиль огъуллары биле мени динълемейлер, насыл этип фыравун мени динълейджек? Чиркин меним лафым, – деди.

13Сонъ РАББИ Муса ве Харуннен лаф этип, оларгъа Исраиль огъулларына ве Мысыр падишасы олгъан фыравунгъа бармагъа ве Исраиль огъулларыны Мысыр топрагъындан чыкъармагъа буюрды.

Мусанынъ ве Харуннынъ шеджерелери

14 ^dМына, исраилли къабилелерининъ башлыкълары.

Исраильнинъ биринджи огълу олгъан Рубеннинъ огъуллары: Ханокъ, Паллу, Хецрон ве Къармий. Бу – Рубенден чыкъкъан къоранталар.

15 ^eШимеоннынъ огъуллары: Емуэл, Ямин, Охад, Якин, Цохар ве ханаанлы къызнынъ огълу Шаул. Бу – Шимеондан чыкъкъан къоранталар.

16 ^fМына, къоранталарына коре, Левий огъулларынынъ адлары: Гершон, Кехат ве Мерарий. Левий 137 йыл яшады. 17Гершоннынъ огъуллары: Ливний, Шимий ве оларнынъ къоранталары. 18Кехатнынъ огъуллары: Амрам, Йицхар, Хеврон ве Уззиэл. Кехат 133 йыл яшады. 19 ^gМерарийнинъ огъуллары: Махлий ве Муший. Мына, эвлятларына коре, Левийден чыкъкъан къоранталар.

20 ^hАмрам аласы Ёкеведге эвленди, ве о, Амрамгъа Харун ве Мусаны тапты. Амрам 137 йыл яшады.

21 ⁱЙицхарнынъ огъуллары: Къорах, Нефег ве Зикрий.

22 ^jУззиэлнинъ огъуллары: Мишаэл, Элцафан ве Ситрий.

23 ^kХарун Нахшоннынъ къызкъардашы олгъан Амминадавнынъ къызына Элишевагъа эвленди. О, Харунгъа Надав, Авиху, Элазар ве Итамар адлы огъулларны тапты.

24 ^lКъорахнынъ огъуллары: Ассир, Элкъана ве Авиасаф. Бу – Къорахтан чыкъкъан къоранталар.

25 ^mХаруннынъ огълу Элазар Путиэлнинъ бир къызына эвленди. О, Харунгъа Пинехасны тапты.

Мына, къоранталарына коре, Левий къабилелерининъ башлыкълары.

26Мына Харун ве Муса. РАББИ оларгъа бойле айткъан эди:

– Исраиль огъулларыны ордуларынен Мысыр топрагъындан алып чыкъынъыз.

27Мысыр падишасы олгъан фыравунгъа Муса ве Харун озьлери Исраиль огъулларыны Мысыр топрагъындан алып чыкъмакъ акъкъында айткъан эдилер.

Рабби Мусагъа ве Харунгъа эмир эте

28Бойлеликнен, РАББИ Мысыр топрагъында Мусанен лаф эткенде, 29онъа:

– Мен – РАББИм! Мысыр падишасы олгъан фыравунгъа Мен санъа бутюн айткъанларымны айт, – деди.

Муса исе РАББИнинъ огюнде:

– Иште, меним нуткъум чиркин. Насыл этип, фыравун меним айткъанларымны динълейджек? – деди.30