‏ Ezekiel 17

Эки къартал ве юзюм пытагъы акъкъында тапмаджа

1РАББИ манъа шойле деди:

2– Инсан огълу! Исраиль халкъына бир тапмаджа айт ве бир икяе айтып бер. 3 ^aОларгъа айт:

РАББИ-ТААЛЯ шойле дей: Къанатлары буюк, тюклери узун, бол, чешит ренкли буюк бир къартал Ливангъа келе ве кедрнинъ тёпесини тутып, 4терекнинъ баш пытагъыны къопара ве оны алыш-веришчилернинъ мемлекетине ▼

▼Къ. еуд. «Ханаан мемлекетине».

алып кете де, базиргянларнынъ шеэринде отурта.

5 ^cШу топракънынъ урлукъларындан алып, оны чёльге сача, тал терегини киби, оны буюк сувларнынъ янында ерлештире. 6 ^dУрлукъ осип, юзюм пытагъы ола. Пытакъ гурь, лякин алчакъ ола. Онынъ пытакълары онъа таба джайыла, тамырлары исе тюбюнден джайрай. Бойлеликнен, юзюм далы пейда ола, филислеп япракълана.

7Амма даа бир буюк къартал бар экен. Онынъ да къанатлары буюк, тюклери гурь экен. Мына шу юзюм пытагъы къарталгъа тамырларыны ата ве пытакъларыны онъа узата, о, оны баразналардан сувармасыны истей. 8Бу юзюм буюк сувларнынъ янына, яхшы топракъкъа сачылгъан эди, ве филислемеге, мейва бермеге ве яхшы юзюм пытагъы ола билир эди.

9Оларгъа айт:

РАББИ-ТААЛЯ шойле дей: Юзюм пытагъы буюк осип олурмы? Оны тамырларынен чыкъарып атарлар, мейвасыны узип ташларлар, ве о озю къуруп къалыр. Мытлакъа, онынъ эписи тазе филислери къуру оладжакъ. Оны тамырынен чыкъарып атмакъ ичюн, буюк кучь ве чокъ адамлар керек олмаз. 10 ^eЯхшы тамыр аткъан олса да, яшап-осип олурмы? Куньдогъуш тарафындан ель келип, онъа эскенде, о, къурур. Оськен еринде къуруп къалыр.

11РАББИ манъа шойле деди:

12 ^f– Бу инат халкъкъа бойле айт: «Бунынъ манасыны анъламайсызмы?» Оларгъа айт:

Мына, Вавилон падишасы Ерусалимге кельди ве Ерусалимнинъ падишасыны ве башлыкъларыны эсир алды, оларны озюне, Вавилонгъа алып кетти. 13 ^gСонъра падиша союндан башкъасыны алып, онен шартнаме япты, онъа ант эттирди ве о мемлекетнинъ эписи башлыкъларыны эсир алды, 14падишалыкъ боюн эгсин ве илериде баш котермесин, лякин шартнаме беджерилип, къавий олсун. 15 ^hЛякин Ерусалим падишасы Вавилон падишасына къаршы исьян котерди, мысырлылар онъа атларны ве чокъ аскерлерни берсин деп, Мысыргъа хаберджилерини йиберди. Амма о енъиш къазанырмы? Бу ишни япкъан сагъ къалырмы? Шартнамени бозса, сагъ къаладжакъмы я?

16 ⁱОзюмнен ант этем, – дей РАББИ-ТААЛЯ. – О, оны тахткъа отурткъан падишанынъ мемлекетинде гъайып оладжакъ. Антыны ве шартнамесини бозгъаны ичюн, о, Вавилонда оледжек. 17 ^jАлкъагъа алынгъан вакътында топракъ обалары япылгъанда, уджюм къуллелери къурулгъанда, чокъ адамлар ольдюрильгенде, фыравун озь буюк кучюнен ве чокъ аскерлеринен бу дженкте онъа ярдым этип оламаз. 18О, сёз берип, къолуны узатты, лякин антыны ве шартнамесини бозды. Бунынъ эписини япкъаны ичюн о, къуртулмаз.

19Шунынъ ичюн РАББИ-ТААЛЯ шойле дей: Озюмнен ант этем: Меним огюмде берген антыны инкяр эткени ичюн, Меним огюмде япкъан шартнамесини бозгъаны ичюн, Мен онынъ япкъанларыны онынъ башына авдараджагъым. 20 ^kМен агъымны джаярым да, оны къапкъангъа тюшюририм, оны Вавилонгъа кетиреджегим ве анда Манъа къаршы хаинлик япкъаны ичюн оны суд этеджегим. 21 ^lОрдусынынъ энъ яхшы аскерлери къылычтан гъайып оладжакъ, сагъ къалгъанлар исе бутюн дюньягъа дагъыладжакъ. О заман билирсинъиз ки, Мен, РАББИ, буны айттым.

22РАББИ-ТААЛЯ шойле дей: Мен Озюм кедр терегининъ тёпесинден бир филис алып, оны сачаджагъым. Онынъ тёпесинден назик филисини къопарып, оны буюк ве юксек дагъда ерлештиреджегим. 23 ^mИсраиль дагъынынъ тёпесинде оны сачаджагъым. О, пытакъланып, мейва береджек ве кучьлю кедр оладжакъ. Чешит къушлар онынъ пытакъларында яшайджакъ, далларынынъ талдасында озьлерине ер тападжакълар. 24 ⁿО заман ормандаки эписи тереклер биледжек ки, Мен, РАББИ, юксек терекни алчакъ этем, алчакъ терекни исе юксельтем. Мен ешиль терекни къурутып ташлайым, къуругъан терекни исе ешиль этем.

Мен, РАББИ, буны айттым ве айткъанымны япаджагъым.