‏ Ezekiel 24

Къазан акъкъында икяе

1Докъузынджы йылы, онунджы айнынъ онунджы куню РАББИ манъа шойле деди:

2 ^a– Инсан огълу! Бу кунни, бугуньки куннинъ адыны яз. Бу куню Вавилон падишасы Ерусалимни алкъагъа алды. 3 ^bБу инат халкъкъа шу икяени айтып бер. Оларгъа айт: РАББИ-ТААЛЯ шойле дей: Къазанны алып къой,
ичине сув толдур.
4– 5Энъ яхшы къойларны алып сой,
къазаннынъ ичине эт къой,
энъ яхшы этни – арт аякъ ве курегини къой,
энъ яхшы кемиклернен оны толдур.
Къазаннынъ тюбюне одун къой.
Къазан яхшы къайнасын,
кемиклер анда пишсин.
6 ^cРАББИ-ТААЛЯ шойле дей:
Къан тёккен шеэрге беля олсун!
Бу къазан тотлангъан,
тоттан темизленмеген къазан!
Оны бошатынъыз,
этни кесек-кесек ичинден чыкъарынъыз,
джереп чекменъиз.
7 ^dОнынъ ичинде къан тёкюльди.
Бош къаяда къан тёкюльди.
Оны топракъ олмагъан ерде тёктилер,
шунынъ ичюн топракъ оны къапаталмады.
8Ачувымны алевлендирмек ичюн,
акътыманымны алмакъ ичюн,
Мен къанны бош къаяда къалдырдым,
оны гизлемеге мумкюн олмасын деп.

9 ^eШунынъ ичюн РАББИ-ТААЛЯ шойле дей: Къан тёккен шеэрге беля олсун!
Мен атеш якъмакъ ичюн, чокъ одун къояджагъым.
10Чокъча одунларны топла,
атешни якъ,
этни яхшы пишир.
Ягъы къайнап битсин,
кемиклер къавурылып, янсынлар.
11Сонъра бош къазанны комюрлер устюне къой,
къазан къызсын,
онынъ бакъыры къызарсын,
ичиндеки кири ирисин,
тоту исе янып битсин.
12 ^fАмма эписи эмегим бошуна кетти:
къазаннынъ къалын тоту кетмеди,
атеш биле оны темизлеп оламады.

13Арамлыгъынъ пек буюк. Мен сени чокъ темизлей эдим, амма сен темизленмединъ. Энди Меним гъазабым санъа тюшип, ятышмагъандже, сен арамлыгъынъдан темизленип оламазсынъ.

14 ^gМен, РАББИ, буны айтам. Вакъыт якъынлаша, ве Мен буны япаджагъым. Энди Мен арткъа къайтмам, аджымам, пешман да этмем. Сен юрген ёлларынъа коре ве ишлеринъе коре джезаланаджакъсынъ, – дей РАББИ-ТААЛЯ.

Ехезкельнинъ апайынынъ олюми

15РАББИ манъа шойле деди:

16 ^h– Инсан огълу! Бакъ, сенинъ севимли кишинъни сенден хасталыкънен аладжагъым. Амма сен аджынма ве агълама, козьяш да тёкме. 17 ⁱСесинъни чыкъармайып, яс тут, лякин дженазе адетлерини япма. Башынъа сарыкъ багъла, аякъкъапларынъны кий, мыйыгъынъны къапатма, ве адамлар санъа кетирген ашыны ашама.

18Саба мен халкънен лаф эттим, акъшам исе апайым кечинди. Эртеси куню манъа буюрылгъаныны яптым. 19 ^jАдамлар менден сорадылар:

– Шу япкъанларынънынъ биз ичюн не манасы бар?

20Мен оларгъа бойле джевап бердим:

– РАББИнинъ хабери манъа кельди.

21 ^kРАББИ-ТААЛЯ Исраиль халкъына шойле дей: «Бакъ, Мен бойле япаджагъым ки, Меним Азиз Еримни, кучюнъизнинъ къуванчыны, козь бебегинъизни, джанларынъызнынъ севинчини арамлайджакълар. Сизлерде къалгъан огъулларынъыз ве къызларынъыз исе къылычтан оледжеклер». 22О вакъыт сизлер мен япкъаным киби япаджакъсынъыз. Агъызларынъызны къапатмайджакъсынъыз, биревлернинъ ашларыны ашамайджакъсынъыз. 23 ^lБашларынъызда сарыкълар, аякъларынъызда аякъкъаплар оладжакъ. Сиз аджынмайджакъсынъыз ве агъламайджакъсынъыз, амма озь гуналарынъыз ичюн азып-тозаджакъсынъыз, бир-биринъизнинъ огюнде ынъранаджакъсынъыз. 24 ^m«Ехезкель сизге бельги олсун: сиз онынъ япкъаны киби япаджакъсынъыз. Буларнынъ эписи олып кечкен сонъ, Мен – РАББИ-ТААЛЯ олгъанымны биледжексинъиз».

25Сен исе, инсан огълу, бекле. Мен оларнынъ къалесини, къуванчыны ве шуретини, козь бебеклерини ве джанларынынъ севинчи олгъан огъулларыны ве къызларыны тартып алгъан куню 26 ⁿсагъ къалгъан санъа келип, хабер кетиреджек. 27 ^oО куню, сагъ къалгъан санъа кельген вакъытта, сен лаф этип башлайджакъсынъ, бир даа индемейип отурмайджакъсынъ, ве сен оларгъа бир бельги оладжакъсынъ. О заман Мен – РАББИ олгъанымны биледжеклер.