Ezekiel 27
Тир шеэри акъкъында агълав
1РАББИ манъа шойле деди: 2 a– Инсан огълу! Тир акъкъында агълав тюркюси йырла, 3денъиз киришинде ерлешкен, чокъ ялы халкъларнен алыш-вериш япкъан Тир шеэрине айт: РАББИ-ТААЛЯ шойле дей: – Эй, Тир, сен: «Меним гузеллигим къусурсыз», – дейсинъ.4Сенинъ кенарларынъ узакъкъа денъизнинъ ичине узаналар;
къуруджыларынъ сенинъ гузеллигинъни
даа гузель яптылар:
5 bэписи тахталарынъны
Сенир ардычларындан ясадылар,
мачта япмакъ ичюн,
Ливан кедрини алдылар,
6 cБашан эменлеринден
къайыкъ куреклерини яптылар,
Киттим ялыларынынъ кипарислеринден
геми когертесини ясадылар,
фильтишнен донаттылар.
7Елькенинъ ренкли Мысыр кетенинден тикильди,
сени елькенлеринъден таный эдилер.
Элиша ялыларындан
мор ве мавылы къырмызы безлернен
сенинъ устюнъни япа эдилер.
8 dСидонлылар ве арвадлылар
сенинъ курекчилеринъ олды,
сенинъ акъыллы усталарынъ, эй, Тир,
гемиджилер эди.
9 eГивал шеэринден теджрибели усталар
сенинъ тешиклеринъни къапата эдилер.
Денъиздеки бутюн гемилер ве денъизджилер
санъа мал алмакъ ичюн келе эдилер.
10 fФарс, Луд ве Пут мемлекетлеринден аскерлер
сенинъ ордунъда хызмет эттилер,
диварларынъа къалкъанларыны ве демир башлыкъларыны астылар,
санъа шурет кетирдилер.
11Арвад ве Хелектен кельген адамлар
эр ерде диварларынънынъ устюнде турдылар.
Гъаммад адамлары
къуллелеринъни къорудылар.
Олар озь къалкъанларыны эр ерде диварларынъа астылар,
гузеллигинъни къусурсыз яптылар.
12 gСенинъ чешит тюрлю малынъ олгъаны ичюн, Таршиш шеэри сеннен алыш-вериш япты, сенинъ малларынъ ичюн кумюш, демир, къалай ве къуршун бере эди. 13 hЯван, Тувал ве Мешек сеннен тиджарет япа эди. Олар сенинъ малларынъ ичюн санъа адамларнынъ джанларыны ве тунч шейлерини бере эдилер. 14 iБет-Тогъарма сакинлери сенинъ малларынъ ичюн атларны ве дженк атларыны, эм де къатырларны бере эди. 15 jДедан адамлары сеннен тиджарет яптылар, бир чокъ ялы халкълары сенинъ малларынъны сатын алдылар, малларынъ ичюн санъа фильтиш ве къара терек бере эдилер. 16Сенинъ пек чокъ ве чешит малларынъ олгъаны ичюн, Арам сеннен тиджарет япты. О, сенинъ малларынъ ичюн карбункул ташларыны, мавылы къырмызы безлерни, ренкли кийимлер, индже кетен, мерджан ве къыйметли ташларны бере эди. 17 kЕхуда ве Исраиль сеннен тиджарет эттилер. Олар сенинъ малларынъ ичюн Миннит богъдайыны, татлыларны, бал, зейтюн ягъы ве мелемлер бере эдилер. 18 lСенинъ чокътан-чокъ малларынъ ве буюк зенгинлигинъ бар олгъаны ичюн, Дамаск санъа Хелбон шарабы ве Цахар юнюни бере эди. 19 mВедан ве Узалдан Яван сенинъ малларынъ ичюн дёгюльген демир, кидда ве къокъулы къамышны бере эди. 20Дедан сенинъ малларынъ ичюн ат аркъасына япылгъан безлер бере эди. 21 nАрабистан ве Кедар башлыкълары сеннен алыш-вериш яптылар, санъа къозуларны, къочкъарларны ве текелерни сата эди. 22 oШева ве Раама сатыджылары сеннен алыш-вериш япа эдилер. Олар сенинъ малларынъ ичюн чешит тюрлю къокъулы отларнынъ энъ яхшысыны, чешит тюрлю къыйметли ташларны ве алтын бере эдилер. 23 pХаран ве Къанне шеэрлери ве Эден ери, эм де Шевадан, Ашшурдан ве Килмаддан алыш-веришчилери сеннен тиджарет яптылар. 24Олар сенинъ базарларынъда паалы кийимлерни, мор ве орьнекли безлерни, ренкли килимлерни ве къатты орюльген йиплерни сата эдилер. 25 qТаршиш гемилери
сенинъ малларынъны ташыдылар.
Денъизлер арасында сен чокъ байлыкъкъа толдынъ,
буюк намнен агъыр олдынъ.
26 rКурекчилеринъ сени ачыкъ денъизге чыкъарды.
Амма куньдогъуш ели денъизнинъ арасында
сени парчалады.
27Сен къазагъа огърайджакъ куню
зенгинлигинъ, малларынъ ве барлыгъынъ,
денъизджилеринъ ве геми айдавджыларынъ,
тешик къапаткъанларынъ,
туджджарларынъ ве эписи кучьлю аскерлеринъ, –
сенинъ эписи олгъанларынъ
денъизнинъ теренлигине батаджакъ.
28Геми айдавджыларнынъ къычыргъанындан
ялылар титрейджек.
29 sКурекчилер гемилерден тюшеджек,
денъизджилер ве геми айдавджылары ялыда тураджакъ,
30 tсенинъ акъкъынъда юксек сеснен агълайджакълар,
аджынып ынъранаджакълар.
Башларына куль сепип,
топракъта юварланаджакълар.
31Олар сенинъ ичюн башларыны тыраш этеджеклер,
чувалдан япылгъан урбаларны киеджеклер,
аджджы козьяшлар тёкип,
юреклери сызлап, сенинъ акъкъынъда агълайджакълар.
32 uКъаарь-къасевет ичинде,
агълав йырыны сёйлейджеклер
ве: «Ким, Тир киби, денъиз арасында гъайып олды? – деп,
сенинъ акъкъынъда агълайджакълар.
33 v– Малларынъ денъизден кельгенде,
сен бир чокъ халкъларны тойдура эдинъ.
Байлыгъынънынъ ве малларынънынъ чокълугъынен
сен дюнья падишаларыны зенгинлештирдинъ.
34Энди исе денъизнинъ теренлигинде
дарма-дагъын олдынъ,
малларынъ ве сенинъ аранъдаки эписи адамлар
денъизнинъ тюбюне батты.
35 wЯлыларда яшагъанларнынъ эписи
сенинъ такъдиринъе шашты-къоркътылар.
Падишаларынынъ отьлери патлады,
юзьлери акъ кесильди.
36 xХалкъларнынъ сатыджылары
шашкъанларындан сызгъырырлар.
Сенинъ сонъунъ къоркъунчлы олды,
бир даа сен олмайджакъсынъ».
Copyright information for
CrhCTB