Ezekiel 29
Мысырнынъ гуналары ичюн гъайып оладжагъы акъкъында пейгъамберлик
1Онунджы йылы, онунджы айнынъ 12-нджи кунюнде РАББИ манъа шойле деди: 2 a– Инсан огълу! Юзюнъни Мысыр падишасы фыравунгъа чевир де, онъа къаршы ве бутюн Мысыр мемлекетине къаршы пейгъамберлик эт. 3 bОларгъа бойле айт: РАББИ-ТААЛЯ шойле дей:– Фыравун, Мысыр падишасы! Мен санъа къаршым!Сен озенлернинъ ичинде яткъан буюк джанаварсынъ.
Сен: «Нил дерьясы менимки, мен оны озюме яптым», – дейсинъ.
4 cМен исе сенинъ ченгелеринъден къармакъ кечиреджегим,
озенлеринънинъ балыкъларыны сенинъ пулларынъа япыштыраджагъым,
пулларынъа япышкъан эписи балыкъларнен берабер
сени озенлеринъден чыкъараджагъым.
5 dСени сахрагъа атаджагъым,
сени де, озенинънинъ балыкъларыны да чыкъарып атаджагъым.
Ачыкъ чёльге тюшеджексинъ,
сени топламайджакъ, котерип алмайджакълар.
Ер айванларына ве коклердеки къушларгъа
сени аш оларакъ береджегим.
6 eО заман Мысырнынъ бутюн халкъы
Мен – РАББИ олгъанымны билир.
Шуны япаджагъым, чюнки сен Исраиль халкъына къамыштан ясалгъан таякъ киби таянч эдинъ. 7Олар сени туткъанда, таякъ парчаланды, ве ярчыкълары оларнынъ омузыны яралады. Олар санъа таянгъанда, сен сындынъ ве баджакъларыны яраладынъ. 8 fШунынъ ичюн РАББИ-ТААЛЯ шойле дей: Бакъ, Мен санъа къаршы къылыч алып келеджегим, сенинъ халкъынъны да, айванларынъны да ёкъ этеджегим. 9Мысыр мемлекети бакъымсыз сахра оладжакъ. О заман Мен – РАББИ олгъанымны билирлер. «Нил дерьясы менимки, мен оны озюме яптым», – дегенинъ ичюн, 10 gМен санъа ве сенинъ озенлеринъе къаршы оладжагъым. Мигдол шеэринден Севене шеэринедже, тап Хушнынъ сынъырларына къадар Мысыр топрагъыны бакъымсыз къуру сахрагъа чевиреджегим. 11Анда не инсан аягъы, не де айван аягъы басмайджакъ, къыркъ йыл девамында топракъ адамсыз къаладжакътыр. 12 hМен Мысыр топрагъыны бом-бош топракъларнынъ арасында энъ бакъымсыз япаджагъым. Онынъ шеэрлери бошап къалгъан шеэрлернинъ арасында къыркъ йыл девамында бакъымсыз къаладжакъ. Мен мысырлыларны халкълар арасында дагъытаджагъым, мемлекетлер арасында ерлештиреджегим. 13 iРАББИ-ТААЛЯ шойле дей: Къыркъ йыл кечкен сонъра, Мен дагъытылгъан мысырлыларны башкъа халкъларнынъ арасындан топлайджагъым. 14 jСюргюн этильген мысырлыларны арткъа къайтараджагъым ве Патрос еринде, оларнынъ юртунда ерлештиреджегим. Олар анда кучьсюз бир падишалыкъ оладжакълар, 15падишалыкълар арасында энъ алчакъ оладжакълар ве эндиден сонъ башкъа халкълардан бир даа юксек олмайджакълар. Мен оларны ойле алчакъ япаджагъым ки, бир даа башкъа халкъларгъа падишалыкъ этип оламайджакълар. 16 kМысыр бир даа Исраиль халкъынынъ ишанчы олмайджакъ. Тек олардан ярдым сорап, насыл алдангъанларыны акъылда тутаджакълар. О заман Мен – РАББИ-ТААЛЯ олгъанымны билирлер.
Вавилонлылар Мысырны запт этеджеклер
1727-нджи йылы, биринджи айнынъ биринджи кунюнде РАББИ манъа шойле деди: 18– Инсан огълу! Вавилон падишасы Невукъаднеццар Тир шеэрини алкъагъа алгъанда, озь ордусыны чокъ къыйнады: эписининъ башы таз олды, агъыр иштен омузларынынъ териси сыдырылды. Амма не озю, не де ордусы агъыр эмеги ичюн Тирден бир къазанч корьмедилер. 19 lШунынъ ичюн РАББИ-Тааля шойле дей: Бакъ, Мен Вавилон падишасы Невукъаднеццаргъа Мысыр топрагъыны берем, о, онынъ байлыкъларыны тартып алсын, оны чайпасын. Ордусына къазанчыны бермек ичюн, Мысыр тутып алгъан шейлерини тартып алсын. 20Мысырда япкъан иши ичюн Мен онъа Мысырнынъ топрагъыны берем. О ордусынен берабер буны Меним ичюн япалар, – дей РАББИ-ТААЛЯ. 21– Шу куню Мен Исраиль халкъыны кучьлю япаджагъым ▼▼Къ. еуд. сёзю-сёзюне «Исраиль ичюн бойнузны осьтюреджегим» демектир.
, ве олар къоркъмайып, мысырлыларнен лаф этеджелер. О заман Мен – РАББИ олгъанымны билирлер.
Copyright information for
CrhCTB