Eze 42 | CrhCTB | STEP | Сонъра адам мени шималь къапудан тышкъы азбаргъа алып кельди. Сарайнынъ ве шимальдеки тышкъы диварнынъ къаршысындаки одаларгъа кетирди.

‏ Ezekiel 42

Руханийлернинъ одалары

1 ^aСонъра адам мени шималь къапудан тышкъы азбаргъа алып кельди. Сарайнынъ ве шимальдеки тышкъы диварнынъ къаршысындаки одаларгъа кетирди. 2 Къапулары шимальге бакъкъан бинанынъ узунлыгъы 50 метр ве кенълиги 25 метр эди. 3 Бу бина ички азбарнынъ он метр ^{▼▼50 метр; 25 метр; он метр – къ. еуд. «100 аммах», «50 аммах», «20 аммах».} узунлыгъындаки мейданнынъ ве тышкъы азбарнынъ таш темелининъ арасында ерлеше эди. О, учь къатлы эди, онынъ галереялары бир-бири устюнде ерлешкен эди. 4 Одаларнынъ огюндеки кечит ёл беш метр кенъликте ве 50 метр ^{▼▼Беш метр; 50 метр – къ. еуд. «10 аммах», «100 аммах».} узунлыкъта эди. Одаларнынъ къапулары шимальге бакъа эди. 5 Юкъары къаттаки одалар тарджа эдилер, чюнки анда галереялар, орта ве ашагъы къаттаки одаларгъа коре, чокъча ер ала эдилер. 6 Бина учь къатлы эди. Азбарлардаки олгъан колонналар киби мында ёкъ эди. Шунынъ ичюн, бина юкъарыгъа котерильген сайын тарлаша эди, орта къаты ашагъы къаттан тар, юкъары къат исе орта къаттан тар эди. 7 Тышкъы азбарнынъ тарафындан бу бинанынъ къаршысында бир дивар бар эди. Онынъ узунлыгъы 25 метр эди. 8 Тышкъы азбардаки одаларнынъ сырасы 25 метр узунлыкъта эди, шунынъ ичюн Сарай огюндеки олгъан одаларнынъ сырасы 50 метр узунлыгъында эди. 9 Бинанынъ ашагъы одаларына тышкъы азбардан, къапудан, куньдогъуш тарафындан кирмек мумкюн эди. 10 Къапу диварнынъ башында эди. Бош мейданнынъ дженюбий тарафында, Сарайнынъ артында, Сарай артындаки бинанынъ дженюбий тарафында башкъа одалар да бар эди. 11 Бу одаларнынъ огюнде де бир кечит ёл бар эди. Одаларнынъ узунлыгъы ве кенълиги айны эди, чыкъышлары ве ольчюлери шимальдеки одаларгъа ошай эди. 12 Дженюптеки одаларнынъ къапуларына куньдогъуш тарафындан, дивар тешкиль эткен аятнынъ башындаки кириштен кирмек мумкюн эди.

13 ^dАдам манъа шойле деди:

– Сарайнынъ азбарына чыкъкъан шимальдеки ве дженюптеки одалар – азиз одалардыр. Анда РАББИнинъ огюнде хызмет эткен руханийлер энъ азиз олгъан къурбанларны ве бахшышларны ашайлар. Олар анда да къурбанларнынъ энъ азизини, ашлыкъ бахшышларыны, гуналар ве къабаатлар ичюн кетирильген къурбанларны къоялар. Бу ер азиздир. 14 ^eРуханийлер Азиз Ерге кирселер, олар хызмет эткенден сонъ, тышкъы азбаргъа чыкъмаздан эвель устюндеки урбаларыны чыкъармакъ ве анда къалдырмакъ кереклер, чюнки бу урбалар азиздир. Сонъ башкъа урбаларны кийип, олар халкъ олгъан ерге чыкъмакъ мумкюнлер.

15 Адам Сарайнынъ ичини ольчеп битирген сонъ, мени куньдогъуш къапусындан тышкъа алып чыкъты ве диварнынъ узунлыгъыны ольчеп башлады. 16 О, куньдогъуш тарафыны озь ольчю таягъынен ольчеди. О, 250 метр ^{▼▼250 метр – къ. еуд. «500 аммах».} эди. 17 Сонъ ольчю таягъынен шималь тарафыны ольчеди. О да 250 метр эди. 18 Ольчю таягъынен дженюп тарафыны ольчеди. О, 250 метр эди. 19 Сонъра гъарп тарафкъа айланып, оны да ольчю таягъынен ольчеди. О, 250 метр эди. 20 ^gБойлеликнен, о, диварны эр дёрт тарафындан ольчеди. Диварнынъ эр бир тарафы 250 метр эди. Дивар азиз олгъанны азиз олмагъандан айырмакъ ичюн тура эди.