Eze 43 | CrhCTB | STEP | Сонъра адам мени куньдогъуш къапусына алып кетирди.

‏ Ezekiel 43

Раббининъ Шурети Сарайгъа къайта

1 ^aСонъра адам мени куньдогъуш къапусына алып кетирди. 2 ^bМына, Исраиль Алласынынъ Шурети куньдогъуш тарафындан келеята эди. Онынъ сеси къудретли сувларнынъ гурюльтиси киби эди, ер юзю исе Онынъ Шуретинен ярыкъланды. 3 ^cМен корьген бу руя эвельки корьген руяларнен бир эди. Мен бунъа ошагъан руяны, Алла шеэрни ёкъ этмек ичюн кельгенде, Кевар озенининъ янында корьген эдим. Мен бетимнен ерге йыкъылдым. 4 РАББИнинъ Шурети куньдогъуш къапусындан Сарайгъа кирди. 5 ^dРух мени котерип, ички азбаргъа алып кельди. Мына, РАББИнинъ Шурети Сарайны толдурды.

6 О вакъыт Сарайнынъ ичинден меннен лаф эткен сесни эшиттим. Сарайны ольчеген исе янымда тура эди. 7 ^eСес манъа:

– Инсан огълу! Меним тахтым, аякъларым баскъан ерим мындадыр. Исраиль халкъынен эбедиен яшайджакъ ерим будыр. Исраиль халкъы бир даа Меним мукъаддес Адымны арам этмейджек, не олар, не падишалары путларнен ороспулыкъ этмейджек, ольген падишаларына тёпелерде къурбан кетирмейджек. 8 Олар босагъаларыны Меним босагъам янына къурдылар, къапуларынынъ первазыны Меним къапум первазынынъ янына ерлештирдилер. Меннен оларнынъ арамызда тек бир дивар бар эди. Олар озьлерининъ япкъан писликлеринен Меним мукъаддес Адымны арам эттилер. Шунынъ ичюн ачувымда Мен оларны ёкъ эттим. 9 Энди исе олар ороспулыкъларыны, падишаларынынъ джесетлерини Менден узакълаштырсынлар. О вакъыт Мен араларында эбедиен яшайджагъым.

10 ^fИнсан огълу! Исраиллилерге Сарай акъкъында хаберни айтып бер, олар къабаатларындан утансынлар ве Сарайнынъ ольчюсини алсынлар. 11 Эгер бутюн япкъан ишлеринден утансалар, оларгъа Сарайнынъ корюнишини ве ерлешювини, киришлерини ве чыкъышларыны, бутюн къыяфетини косьтер. Планыны, къарар ве низамнамелерини оларгъа бильдир. Буларнынъ эписини оларнынъ огюнде язып бер, олар плангъа коре япсынлар, къарарларыны беджерсинлер.

12 Мына Сарайнынъ къануны: дагъ тёпесинден этеклерине къадар бутюн ерлер – улу азизликтир. Сарай акъкъында къанун будыр.

Къурбан ери

13 ^g– Къурбан ерининъ ольчюси ^{▼▼Къ. еуд. сёзю-сёзюне «аммахнен ольчегенде, бир аммах – аммах ве тофах» демектир.} шудыр: улукънынъ теренлиги – ярым метр, кенълиги – ярым метр, чевресинде кенарлыкъ бир къарыш ^{▼▼Ярым метр; бир къарыш – къ. еуд. «бир аммах», «бир зерет».} кенълигинде олсун. Къурбан ерининъ юксеклиги: 14 улукънынъ тюбюнден башлап ашагъыдаки тюртип чыкъкъан кенаргъа къадар – бир метр. (Ашагъы кенар ярым метр кенъликте.) Ашагъы тюртип чыкъкъан еринден юкъары тюртип чыкъкъан ерге къадар – эки метр ^{▼▼Бир метр; ярым метр; эки метр – къ. еуд. «2 аммах», «бир аммах», «4 аммах».}. (Юкъары кенар ярым метр кенъликте.) 15 ^kКъурбан ерининъ оджагъы эки метр юксекликте, андан дёрт бойнуз чыкъа. 16 Оджакъ дёрт коше, алты метр узунлыкъта ве алты метр кенъликте. 17 ^lОджакъ тургъан мейданчыкъ да дёрткошели, еди метр узунлыкъта ве еди метр кенъликте. Чевресинде – черик метр кенъликте кенарлыкъ. Кенарлыкъ бутюн чевре боюнджа ярым метр ^{▼▼Алты метр; еди метр; черик метр; ярым метр – къ. еуд. «12 аммах», «14 аммах», «ярым аммах», «бир аммах».} теренликте улукъны япа. Онынъ шаркъ тарафындан басамакълар котериле.

18 ⁿАдам манъа бойле деди:

– Инсан огълу! РАББИ-ТААЛЯ шойле дей: Булар къурбан ери акъкъында низамнамелер. О, япылгъан сонъ, руханийлер оларгъа коре бутюнлей якъыладжакъ къурбанларны кетирсинлер ве къан сепсинлер. 19 ^oМеним огюмде хызмет этеджек Цадокъ союндан левийли руханийлерге, гуна ичюн къурбан оларакъ, бир яш бузавны бер, – дей РАББИ-ТААЛЯ. 20 ^p– Сонъ бузавнынъ къаныны алып, къурбан ерининъ дёрт бойнузына, мейданчыкънынъ дёрт кошесине ве чевресиндеки кенарлыкънынъ устюне сюрт. Бойле этип, сен къурбан ерини темизлейджексинъ ве онынъ ичюн одеме этеджексинъ. 21 ^qГуналар ичюн къурбан оларакъ кетирильген бузавны ал да, оны Сарайнынъ бельгиленген еринде, Азиз Ернинъ тышында якъ.

22 Экинджи куню гуналар ичюн къурбан оларакъ бир къусурсыз теке кетир. Сонъ къурбан ери, бузавнынъ къанынен темизленгени киби, темизленсин. 23 Къурбан ерини темизлеген сонъ, къусурсыз яш бузавны ве бир къусурсыз къочкъарны кетир. 24 ^rОларны РАББИнинъ огюне къой. Руханийлер оларнынъ устюне туз сепсинлер ве бутюнлей якъыладжакъ къурбан оларакъ оларны РАББИге кетирсинлер.

25 ^sЕди кунь девамында гуналар ичюн къурбан оларакъ эр кунь бирер теке кетир. Руханийлер эр кунь даа бирер яш къусурсыз бузавны ве бирер къусурсыз къочкъарны кетирсинлер. 26 Еди кунь девамында олар къурбан ери ичюн одеме этсинлер, оны темизлесинлер. Бойлеликнен, олар оны озь вазифесини беджерсин деп, азырласынлар. 27 ^tЕди кунь кечкен сонъ, секизинджи куню ве ондан сонъра руханийлер къурбан еринде бутюнлей якъыладжакъ къурбанларынъызны ве аманлыкъ къурбанларынъызны кетирип башлайджакълар. О заман Мен сизлерге мераметнен бакъаджагъым, – дей РАББИ-ТААЛЯ.