‏ Galatians 5

Месих бизге азатлыкъ берди

1 ^aБиз азат олайыкъ деп, Месих бизни азат этти. Шунынъ ичюн къатты турунъыз ве кене къуллукъ боюндырыгъыны такъманъыз.

2 ^bМен, Павел, сизлерге буны айтам: эгер сизлер сюннет олсанъыз, Месих сизлерге файда этмез. 3 ^cСюннет этильген эр бир адамгъа кене бильдирем: о, бутюн Къанунны беджермек керек. 4 ^dКъанунны беджерювде акъланув къыдыргъанлар! Сиз Месихтен айырылдынъыз ве Алланынъ эйилигини алмадынъыз. 5 ^eБиз Рухнынъ ярдымынен ве иманнен акъланаджагъымызны умют этип беклеймиз. 6 ^fИса Месихте не сюннетнинъ, не сюннетсизликнинъ файдасы ёкъ, тек севгиде озюни косьтерген иманнынъ файдасы бар.

7 ^gСизлер чапувны яхшы башладынъыз. Лякин акъикъаткъа итаат этмеге сизге ким ёл бермеди? 8Ким сизлерни къандырды? Эбет, буны сизни чагъыргъан Алла япмады! 9 ^hАзачыкъ мая бутюн хамырны маялы эте! 10 ⁱРаббиде эминим ки, сизлер бу акъта башкъаджа тюшюнмейджексинъиз. Амма сизни ёлдан шашыргъан, ким олса олсун, озь джезасыны аладжакъ. 11 ^jАгъа-къардашлар, эгер мен але даа сюннетнинъ тарафдары олсам, не ичюн мени къувалайлар? Ойле олса, хач себебинден къавгъа токътар эди. 12Сизлерни ёлдан шашыргъан адамлар озьлерининъ бутюн шейлерини кесип ташласалар, яхшы олур эди!

13 ^kАгъа-къардашлар, сизлер азатлыкъкъа чагъырылгъан эдинъиз. Тек бу азатлыкъ беден истеклерини беджереджегине себеп олмасын, лякин бири-биринъизге севгинен хызмет этинъиз. 14 ^lКъануннынъ бутюни бир эмирде бирлештириле: «Якъын адамны озюнъизни киби севинъиз». 15Амма эгер сизлер бири-биринъизни тишлесенъиз ве ашасанъыз, сакът олунъыз, ёкъса сиз бири-биринъизни ёкъ этеджексинъиз!

Рухнынъ мейвасы ве беденнинъ ишлери

16 ^mМен шуны айтам: Рухнынъ истегинен яшанъыз, о вакъыт беденинъизнинъ яман истеклерини беджермезсиз. 17 ⁿИнсан бедени Рухкъа къаршы олгъан шейлерни, Рух исе инсан беденине къаршы олгъанны истей. Олар бири-бирине къаршы чыкъалар; шунынъ ичюн сизлер истемеген шейлеринъизни япасыз. 18 ^oАмма эгер Рух сизни алып барса, сиз Къанун астында дегильсиз.

19 ^pБеденнинъ ишлери беллидир, булар – ороспулыкъ, пислик, ахлякъсызлыкъ, 20 ^qпутперестлик, этне, душманлыкъ, къавгъа, пахыллыкъ, гъазап, давалар, бозгъунлыкълар, фыркъаларгъа болюнювлер, 21 ^rнефрет, ичкиджилик, намуссыз отурышлар ве шунъа ошагъан ишлер. Сизлерни эвельден тенбиелей эдим, кене эвельден айтам: бойле ишлерни япкъанлар Алланынъ Падишалыгъыны мирас этип алмайджакълар.

22 ^sРухнынъ мейвасы исе – севги, къуванч, тынчлыкъ-аманлыкъ, сабыр, мерамет, яхшылыкъ, ишанч, 23 ^tйымшакълыкъ ве озюни къолда тутув. Буларгъа къаршы ич бир къанун ёкъ.

24 ^uМесихнинъкилер озь беденини яман арзуларнен ве истеклернен берабер хачкъа мыхлап къойдылар. 25Эгер биз Рухнынъ истегинен яшасакъ, Рухнынъ истегинен арекет этейик. 26 ^vБош шуретни къыдырмайыкъ, бири-биримизни ачувландырмайыкъ, бир-биримизни пахылламайыкъ.