Galatians 6
Бир-биринъизнинъ юклерини ташынъыз
1 aАгъа-къардашлар, эгер бир адамнынъ гуна япкъаны белли олса, сизлер, рухий олып, оны йымшакълыкънен тюзетинъиз ве, ёлдан урулмамакъ ичюн, озюнъизге сакът олунъыз. 2 bБири-биринъизнинъ агъырлыкъларыны ташынъыз. Бойле япып, сиз Месихнинъ Къануныны беджерирсиз. 3 cЭгер бир адам, ич бир шейге ярамайып, озюни буюк, деп сайса, о, озь-озюни алдата. 4Эр ким озь ишини сынасын; о вакъытта о, озюни башкъаларынен къыясламайып, озь енъишлерине бакъып гъурурланып оладжакъ. 5 dЭр ким озю озь юкюни ташымакъ керек. 6 eИманда огренген оны огреткен адамнен озюнинь эр бир яхшы шейинен пайлашсын. 7 fАлданманъыз: Алланы алдатмазсынъыз. Адам не сачса, оны орар. 8 gОзь беден истеклерини япкъан адам озь беденинден олюм алыр. Рухнынъ истеклерини япкъан адам исе Рухтан эбедий аятны алыр. 9 hЯхшылыкъ япкъанда, рухтан тюшмейик. Эгер болдурып токътамасакъ, озь вакътында берекет орып алырмыз. 10 iШунынъ ичюн, даа вакътымыз олгъанда, эписине ве эр шейден эвель озюмизнинъ иман аркъадашларымызгъа яхшылыкъ япайыкъ.Сонъки огютлер
11 jБакъынъыз, сизлерге озь къолумнен насыл буюк арифлерни яздым! 12Озьлерини бу дюньяда яхшы тарафтан косьтермеге истегенлер сизлерни сюннет олмагъа меджбур этелер, оларнынъ бирден-бир макъсады исе – Месихнинъ хачы ичюн къувалавдан къачмакътыр. 13Сюннетлилер озьлери биле Къанунны тутмайлар ве беджермейлер, амма, сизлернинъ беденлеринъизнен макътанмакъ ичюн, сизинъ сюннет этильгенинъизни истейлер. 14 kМен Раббимиз Иса Месихнинъ хачындан гъайры башкъа ич бир шейнен макътанмайым. Онынънен бу дюнья мен ичюн хачкъа мыхлангъан, мен де бу дюнья ичюн хачкъа мыхлангъаным. 15 lСюннетнинъ де, сюннетсизликнинъ де ич бир къыймети ёкъ, тек янъыдан яратылгъан инсан олмакъ керек. 16 mБу къаиденен яшагъанларнынъ эписине ве Алланынъ Исраилине тынчлыкъ-аманлыкъ ве мерамет олсун! 17Шимдиден сонъ ич кимсе мени раатсызламасын, чюнки мен Иса ичюн алгъан яраларны озь тенимде алып юрем. 18Агъа-къардашлар, Раббимиз Иса Месихнинъ эйилиги сизинъ рухунъызнен олсун. Амин.
Copyright information for
CrhCTB