‏ Haggai 2

Янъы Сарайнынъ шурети

1 ^aЕдинджи айнынъ 21-инджи кунюнде РАББИ Хагъгъай пейгъамбернен бойле деди:

2 ^b– Ехуданынъ акимине Шеалтиэлнинъ огълу Зеруббавелге, баш руханийге Ехоцадакънынъ огълу Ехошуагъа ве бутюн къалгъан халкъкъа бойле айт: 3 ^c«Шу Эвни эвельки шуретинде корьгенлер аранъызда къалдымы? Онынъ шимдики алыны коресизми? Бу Эв козюнъизде ич бир шей киби корюнмейми?» 4 ^dАмма РАББИ дей: «Шимди къуветли ол, Зеруббавел! Сен де, Ехоцадакънынъ огълу Ехошуа, баш руханий, къуветли ол! Бу ернинъ бутюн халкъы, къуветли олунъыз ве ишке башланъыз! Мен сизлернен!» Бу – Ордулар РАББИсининъ сёзлери. 5 ^e«Сизлер Мысырдан чыкъаяткъанда, Мен сизлерге берген васиет даа тура. Рухум да сизинъ аранъызда булуна. Къоркъманъыз!»

6 ^fОрдуларнынъ РАББИси шойле дей:

– Къыскъа заманда Мен даа бир кере коклерни ве ерни, денъизни ве къуру ерни титретеджегим.

7Мен бутюн халкъларны тепретеджегим! Эписи миллетлернинъ къыйметли шейлери мында кетириледжек! Мен бу Эвни шан-шуретнен толдураджагъым! – дей Ордуларнынъ РАББИси.

8 ^g– Кумюш Меним, алтын да Менимки, – дей Ордуларнынъ РАББИси.

9– Бу сонъки Эвнинъ шан-шурети эвелькисинден буюк оладжакъ! – дей Ордуларнынъ РАББИси. – Шу ерде Мен тынчлыкъ-аманлыкъ береджегим!

Бу – Ордулар РАББИсининъ сёзлери.

Пейгъамбер руханийлерге суаллер бере

10Докъузынджы айнынъ 24-юнджи куню, Дарьявеш падишалыгъынынъ экинджи йылында, РАББИ Хагъгъай пейгъамбернен шуны айтты:

11– Ордуларнынъ РАББИси шойле дей:

Руханийлерден къанун акъкъында шуны сора: 12«Эгер бир адам урбасынынъ этегинде Аллагъа багъышлангъан къурбан этини кетиреяткъанда, урбасынынъ этегинен отьмекке я да башкъа бир пишкен шейге, я да шарапкъа, я да зейтюн ягъына я да башкъа ашкъа тийсе, шу шей Аллагъа багъышлангъан шей киби олурмы?»

– Ёкъ, – деди руханийлер.

13 ^hСонъ Хагъгъай сорады:

– Эгер бир олюге токъунгъан ве бойледже озюни арамлагъан адам бутюн бу шейлерге токъунса, булар арам олурмы?

Руханийлер джевапланып:

– Арам олур, – дедилер.

14 ⁱО заман Хагъгъай джевап берип шойле деди:

– «Бу халкъ ойле де темиз дегиль, шу миллет Меним козюмде арам! Япкъан ишлери де арамдыр! – дей РАББИ. – Оларнынъ анда кетирильген эр бир шейи де арам!»

Сёз динълемемек – беляларнынъ себебидир

15– Шимди эвельки заманны, бу куньгедже не олгъаныны акъылгъа кетиринъиз. РАББИнинъ Сарайында даа таш устюне таш къоюлмагъан вакъыт акъкъында тюшюнинъиз. 16Ойле ола эди ки, ашлыкъ обасындан 20 ольчю ерине тек он ольчюни ала эдилер, юзюм басылгъан ерден 50 ольчю шарап ерине тек 20 ольчюни ала эдилер.

17 ^jМен сизге къурутыджы ельни, ашлыкъларынъызгъа куфни, къолларынъызнынъ ишлерине бурчакъны ёлладым. Амма сиз Манъа къайтмай эдинъиз, – дей РАББИ. 18 ^k– Шимди эвельки заманны, бу куньгедже не олгъаныны акъылгъа кетиринъиз. Бугуньден, докъузынджы айнынъ 24-юнджи кунюнден, РАББИнинъ Сарайына темель къоюлгъан кунюнден башлап, бу вакъытны акъылда тутунъыз. 19 ^lАнбарларынъызда аля даа ашлыкъ урлугъы къалдымы? Бугуньгедже не юзюм пытагъы, не инджир тереги, не нар тереги, не зейтюн тереги емиш бердилер. Амма бугуньден башлап, Мен сизлерге берекет береджегим.

Зеруббавел – Рабби сайлагъан адам

20Шу айнынъ 24-юнджи кунюнде Хагъгъай экинджи кере РАББИнинъ сёзлерини эшитти:

21 ^m– Ехуданынъ акимине Зеруббавелге бойле айт:

Мен коклерни ве ерни титретеджегим, 22 ⁿпадишаларнынъ тахтларыны котерип атаджагъым, башкъа миллетлернинъ падишалыкъ кучюни ёкъ этеджегим, дженк арабаларыны ве арабаджыларны авдараджагъым. Атлар уруладжакъ, атлылары исе бири-бирини къылычнен ольдюреджеклер. 23 ^oШу куню, – дей Ордуларнынъ РАББИси, – Мен сени, къулумны, Шеалтиэлнинъ огълу Зеруббавелни алып кетиреджегим ве, сени сайлап алгъаным ичюн, сени Озюме юзюк-нишан япаджагъым. Бу – Ордулар РАББИсининъ сёзлеридир.