‏ Hebrews 10

1 ^aКъанун оладжакъ хайырлы шейлерни тек косьтере, оларны бермей. Шунынъ ичюн Къанун эр йыл токътамайып айны шу къурбанларнен кельген адамларны къусурсыз япып оламай. 2Акис алда, къурбанларны кетиргенлер оларны бир даа алып кетирмез эди, чюнки олар бир кереден элялланыр эди ве бир даа озьлерини гуналы саймаз эдилер. 3 ^bАмма къурбанларны кетирмек кереклиги эр йыл адамларгъа оларнынъ гуналарыны акъылына кетире, 4чюнки бугъаларнынъ ве текелернинъ къаны гуналарны ёкъ этип оламай. 5 ^cШунынъ ичюн Месих дюньягъа кирип, Аллагъа шойле дей: – Къурбан ве бахшышларны Сен истемединъ,
амма Мен ичюн бир беден азырладынъ.
6 ^dБутюнлей якъыладжакъ къурбанлар
ве гуналар ичюн къурбанлар Сени къувандырмай.
7О вакъыт Мен дедим:
– Мына, бурулгъан кягъытта Меним акъкъымда язылгъаны киби,
Мен Сенинъ истегинъни беджермеге кельдим, эй, Алла!

8Биринджиден О, айтты: «Сен не къурбанларны, не бахшышларны, не бутюнлей якъыладжакъ къурбанларны, не гуна ичюн къурбанларны истемединъ, олар Сени къувандырмай». 9Сонъ О: «Мына Мен Сенинъ истегинъни беджермеге кельдим, эй, Алла!» – деди. Экинджисини тасдыкъ этмек ичюн, О, биринджисини ёкъ эте. 10 ^eАлланынъ истегинен, Иса Месих бир кере Озь беденини къурбан оларакъ кетирип, бизни азиз этти.

11 ^fЭр бир руханий кунь сайын хызметте булунып, айны къурбанларны къайта-къайта алып кетире. Бу къурбанлар ич бир вакъыт гуналарны ёкъ этип оламаз. 12 ^gМесих исе гуналар ичюн бир къурбанны кетирген сонъ, Алланынъ онъ тарафында эбедиен отурды. 13 ^hО вакъыттан берли О, душманларынынъ енъильгенини ве аякъларынынъ астына атылгъаныны беклей. 14О, бир къурбан кетирип, элялланаяткъан адамларны эбедий къусурсыз япты. 15Мукъаддес Рух да бу акъта бизлерге шаатлыкъ япып, шойле дей: 16– О куньлерден сонъ Исраиль халкъына башкъа васиетни береджегим, – дей Рабби.
– Къанунларымны оларнынъ юреклерининъ ичине къояджагъым, оларны фикирлеринде язаджагъым…
17 ⁱМен оларнынъ гуналарыны ве къабаатларыны энди акъылымда тутмайджагъым.

18Эгер Алла гуналарыны багъышлагъан олса, олар ичюн башкъа къурбан керекмей.

Аллагъа якъынлашынъыз

19 ^jШунынъ ичюн, дин къардашлар, Иса Месихнинъ къаны ярдымынен Энъ Мукъаддес Ерге кирмеге джесаретимиз бар. 20 ^kИса бизге Чадырнынъ пердесинден янъы, омюр берген ёлны ачты. Бу ёл – Онынъ къурбан кетирильген беденидир. 21Иса – бизим буюк руханийимиздир. О, Алланынъ Эвине башлыкъ япа. 22 ^lШунынъ ичюн толу иманнен ве чин юрекнен Аллагъа якъынлашайыкъ, юреклеримизни яман видждандан темизлейик, беденимизни темиз сувнен ювайыкъ. 23 ^mБиз инангъан умютимизни йыкъылмайып къатты тутайыкъ, чюнки сёз берген Алла ишанчлыдыр. 24Бири-биримизге дикъкъатлы олайыкъ, бири-биримизни севмеге ве хайырлы ишлерни япмагъа юреклендирейик. 25 ⁿБазылары топлашмакътан вазгечселер де, биз берабер топлаша берейик ве, Раббининъ куню якъынлашкъаныны корип, бири-биримизни даа зияде юреклендирейик.

26 ^oЭгер биз акъикъатны билип, эп бир гуна япа берсек, энди гуналар ичюн башкъа къурбан олмаз. 27 ^pБизге тек къоркъунчлы дуйгъунен джезаны беклемеге ве Алланынъ душманларыны куйдюреджек къызгъын атешнен якъылмагъа къалыр. 28 ^qМусанынъ Къануныны ред эткен адамны эки я да учь адамнынъ шаатлыгъынен аджымайып олюм джезасына берелер. 29 ^rТюшюнинъиз, эгер кимдир Алланынъ Огълуны таптаса, оны азиз эткен васиетнинъ къаныны азизлик деп саймаса, хайырлы Рухны яманласа, о, не къадар агъыр джезагъа ляйыкъ сайыладжакъ! 30 ^sБиз шу сёзлерни айткъан Биревни яхшы билемиз: – Джеза Меним къолумда, къаршылыгъыны Мен береджем.

Ве даа: – Рабби Озь халкъыны суд этеджек. 31 ^tТири Алланынъ къолуна тюшмек – къоркъунчлы бир шейдир!

32Эвельки куньлерни акълынъызгъа кетиринъиз. О вакъытта бильги ярыгъыны корьген сонъ, сиз чекишип, чокъ азапларгъа даяндынъыз. 33Базыда сизни адамларнынъ огюнде масхара эте ве къыйнай эдилер, башкъа вакъытта сиз чекишкен адамларгъа ярдымджы ола эдинъиз. 34 ^uЗиндангъа атылгъанларнен берабер азап чеке эдинъиз. Байлыгъынъызны тутып алгъанларны къуванчнен къабул эте эдинъиз, чюнки сизни даа яхшы эбедий байлыкъ беклегенини биле эдинъиз. 35Онынъ ичюн, джесаретинъизни джойманъыз. Келеджекте о, сизге буюк мукяфат береджек. 36Сизлерге буюк сабыр керек. О вакъыт Алланынъ истегини беджерип, сиз Онынъ сёз бергенини аладжакъсынъыз. 37– Даа бираз, аз вакъыттан сонъ, келеяткъан Бирев келеджек ве кеч къалмайджакъ.
38 ^vИнсафлы адам Аллагъа иманнен яшайджакъ.
Имандан вазгечкен адамнен исе Меним джаным разы олмаз.

39Бизлер исе имандан вазгечмемиз, ёкъ олмамыз. Лякин иманымызны сакълармыз, джанымызгъа къуртулыш тапармыз.