‏ Hebrews 13

Насиатлар

1 ^aБири-биринъизни агъа-къардашларынъызны киби севинъиз. 2 ^bМусафирлерни севип-саймагъа унутманъыз. Базы адамлар мусафирлерни къабул эткенде, бильмезден мелеклерни къаршылап алдылар. 3 ^cТюрьмеде яткъанларны, оларнен берабер озюнъиз де апис олгъанынъыз киби, акълынъызда тутунъыз. Азап чеккенлерни, озюнъиз чекишкенинъиз киби, хатырланъыз. 4 ^dЭпинъиз озь акъай-апакъайынъызны урьмет этинъиз ве яткъан тёшегинъизни арамламанъыз, чюнки Алла ороспуларны ве аиле садыкълыгъыны бозгъанларны джезалайджакъ. 5 ^eПараны севменъиз, къолунъызда олгъанынен разы олунъыз. Алла: «Сени къалдырмайджагъым ве ташламайджагъым», – деген.

6 ^fШунынъ ичюн биз джесаретнен айтамыз: «Рабби меним ярдымджымдыр, мен къоркъмайым. Инсан манъа не япа билир?»

7 ^gАлланынъ Сёзюни сизлерге айткъан башлыкъларынъызны акъылынъызда тутунъыз. Оларнынъ омюр сонъуна бакъып, иманлары сизге мисаль олсун. 8 ^hИса Месих денъишмез. О, тюневин, бугунь ве эбедиен айныдыр. 9 ⁱЧешит тюрлю огретювлерге берильменъиз. Сизинъ юреклеринъиз ашлар акъкъында къаиделернен дегиль де, Алланынъ эйилигинен къуветлендиргени яхшы олур эди. Бойле къаиделерге берильгенлер олардан ич бир файда корьмедилер. 10Бизим бир къурбан еримиз бар, ве Корюшюв Чадырында хызмет эткен руханийлернинъ андан ашамагъа акъкъы ёкъ. 11 ^jБаш руханий гуналар ичюн къурбан оларакъ кетирильген айванларнынъ къаныны Энъ Мукъаддес Ерге алып кире, амма айванларнынъ олюси адамлар яшагъан ерден чыкъарылып якъыла. 12 ^kШунынъ ичюн Иса да, Озь къанынен халкъны азиз этмек ичюн, шеэр араба къапусындан тышарыда азап чекип ольди. 13 ^lЭнди бизлер Онынъ масхарасыны озюмизге алып, адамлар яшагъан ерден тышкъа Онъа чыкъайыкъ, 14чюнки бу ерде бизим даимий шеэримиз ёкъ, биз келеджектеки шеэрни къыдырамыз. 15 ^mТокътамайып, макътав къурбанларыны Аллагъа Иса аркъалы багъышлайыкъ, эр вакъыт бизим тиллеримизнен Онынъ Адына шукюр этейик.

16 ⁿЯхшы ишлерни япмагъа ве башкъаларнен пайлашмагъа унутманъыз; Алла бойле къурбанларны бегене.

17Озь башлыкъларынъызгъа бойсунынъыз ве оларнынъ сёзюни динъленъиз. Олар юкъламайып джанларынъызны бакъалар ве бунынъ акъкъында джевап береджеклер. Эгер оларны динълесенъиз, олар озь ишини инъильдеп дегиль, къуванчнен беджереджек. Ёкъса, сизлерге файдасы олмаз.

18 ^oБизлер ичюн дува окъунъыз. Бизим виджданымыз темиз экенине эминмиз, чюнки биз эр шейни намуслыкънен беджермеге арекет этемиз. 19Мен тездже сизге къайтайым деп, айрыджа дува окъунъыз.

20 ^pЭбедий васиетнинъ къанына бакъып, къойларынынъ буюк Чобаны, Раббимиз Исаны олюлерден тирильткен, тынчлыкъ-аманлыкъ берген Алла, 21Онынъ истеген ишлерини япынъыз деп, сизге эр бир эйи шейни берсин ве Иса Месих ярдымынен сизлерде бегенген шейини беджерсин. Иса Месихке эбедиен шан-шуретлер олсун! Амин.

22Дин къардашларым, сизлерге ялварам, къыскъадан язгъан олсам да, бу насиат сёзюни сабырнен къабул этинъиз. 23 ^qКъардашымыз Тимотей азат олгъаныны билинъиз. Эгер о тезден яныма кельсе, онен берабер сизлерни корьмеге барарым.

24Джемиет башлыкъларынъызнынъ эписине ве бутюн азизлерге селям этинъиз. Италиядан олгъанлар сизлерге селям ёллайлар. 25Эпинъизнен Алланынъ эйилиги олсун!