‏ Hebrews 3

Месих Мусадан юксек

1Шунынъ ичюн, азиз дин къардашларым, коклерден чагъырылгъан адамлар! Алланынъ Эльчисини, биз инангъан баш руханий Исаны тюшюнинъиз! 2 ^aМуса Алланынъ бутюн эвинде ишанчлы олгъаны киби, Эльчи де Оны ёллагъан Аллагъа ишанчлыдыр. 3Эвден эвни къургъан къуруджы урьметли олгъаны киби, Иса Мусадан чокъ шуретке ляйыкътыр. 4Эр бир эвнинъ къуруджысы бар, эр шейнинъ яратыджысы исе – Алла. 5 ^bМуса, хызметчи олып, Алланынъ бутюн эвинде ишанчлы эди ве келеджек шейлер акъкъында хабер эте эди. 6Месих исе, Огъул олып, Алланынъ Эвинде башлыкъ эте. Онынъ Эви исе – бизмиз. Лякин бизге ишанчымызны ве биз макътангъан умютимизни сонъунадже къатты тутмакъ керек.

Алланынъ халкъы ичюн раатлыкъ

7Мына, Мукъаддес Рух айткъаны киби: – Бугунь Алланынъ сесини эшитсенъиз, 8юреклеринъизни таш этменъиз!
Манъа къаршы чыкъкъан вакътында киби, сахрада сынав заманында киби, олманъыз.
9О ерде бабаларынъыз Мени сынавдан кечирдилер ве Мени сынап, къыркъ йыл ичинде ишлеримни корьдилер.
10Шунынъ ичюн бу несильге ачувландым ве дедим:
«Бу халкънынъ юреклери эр вакъыт адаша, олар Меним ёлларымны огренмедилер».
11 ^cШунынъ ичюн Мен гъазапланып, ант эттим:
«Олар мытлакъа Меним раатлыкъ ериме кирмейджеклер».

12Эй, дин къардашларым, мукъайт олунъыз, ич биринъизде яман ве имансыз бир юрек олмасын, Тири Алладан вазгечменъиз. 13Ич кимсе гунагъа алданмасын, юрегини таш киби этмесин деп, «бугунь» демеге даа мумкюн олгъанда, бири-биринъизге эр кунь акъыл огретинъиз. 14Биз Месихнинъ аркъадашлары олдыкъ ве, эгер баштаки ишанчымызны сонъунадже сакъласакъ, ойле де къалырмыз. 15 ^dАйтылгъанына коре, бугунь Алланынъ сесини эшитсенъиз, юреклеринъизни таш этменъиз! Онъа къаршы чыкъкъан вакъытта олгъанынъыз киби, олманъыз!

16 ^eАлланынъ сесини эшиткен, лякин Онъа къаршы чыкъкъан адамлар ким эди? Муса Мысырдан чыкъаргъанларнынъ эписи! 17 ^fАлла къыркъ йыл ичинде кимге ачувлана эди? Гуна япкъан адамларгъа! Шунынъ ичюн оларнынъ олю беденлери сахрада къалды. 18 ^gАлла: «Олар Меним раатлыкъ ериме кирмейджеклер», – деп, кимлер акъкъында ант этти? Оны динълемеген адамлар акъкъындадыр! ^hКоремиз ки, олар имансыз олгъаны ичюн, раатлыкъ ерине кирип оламадылар.19