Hebrews 8
Янъы васиетнинъ баш руханийи
1 aАйткъанларымызнынъ баш фикири шудыр: бизим баш руханийимиз бар. О, коклерде Юдже Алланынъ тахтындаки онъ тарафында отура, 2 bАзиз Ерде, акъикъий Мукъаддес Чадырда хызмет эте. Бу Чадырны адамлар дегиль, Рабби Озю къургъан. 3 cЭр бир баш руханий бахшышлар ве къурбанлар кетирмек ичюн къоюла. Шунынъ ичюн Иса да бир шей кетирмек керек эди. 4Эгер О, ер юзюнде олгъан олса, О, руханий олмаз эди, чюнки анда Къанунда буюрылгъан бахшышларны кетирген руханийлер энди бар. 5 dОлар Азиз Ерде хызмет этелер. Шу Азиз Ер – коктеки Чадырнынъ кольгеси ве къыяфетидир, чюнки Муса Чадырны къурмагъа азырлангъанда, Алла онъа: «Бакъ, эр бир шейни Мен санъа байырда косьтергениме коре яп», – деп буюргъан эди. 6 eЛякин Иса даа устюн бир руханийлик хызметини къабул этти. Ве Исанынъ ярдымынен даа яхшы васиет кельди, чюнки бу васиет даа яхшы ваделерге эсаслангъандыр. 7 fЭгер биринджи васиет къусурсыз олса эди, экинджиси керек олмаз эди. 8 gАмма Алла васиетнинъ къусурыны корип, шойле деген: – Бакъынъыз! Ойле куньлер келеята ки, – дей Рабби.– Исраиль ве Ехуда халкъларына янъы бир васиет береджегим.
9О, эски васиетке ошамайджакъ.
Деделеринъизни къолларындан тутып,
Мысыр топрагъындан чыкъаргъанда, оларгъа бир васиет бердим.
Лякин олар васиетиме садыкъ къалмадылар,
ве Мен олардан юзь чевирдим, – дей Рабби.
10 h– О куньлерден сонъ Исраиль халкъына башкъа васиетни береджегим, – дей Рабби.
– Къанунларымны башларынынъ ичине къояджагъым, юреклерине язаджагъым.
Мен оларнынъ Алласы оладжагъым, олар исе Меним халкъым оладжакълар.
11 iИч кимсе къомшусына ве агъа-къардашына:
«Раббини билинъиз», – деп акъыл огретмейджек.
Оларнынъ эписи, буюк ве кичиклери, Мени биледжеклер.
12Мен оларнынъ къабаатларыны багъышлайджагъым, гуналарыны энди акъылымда тутмайджагъым.
13Алла «янъы бир васиет» дегенде, биринджи васиетнинъ эскиргенини илян этти. Эскирип къартайгъан шей исе якъында ёкъ ола.
Copyright information for
CrhCTB