‏ Hebrews 9

Ердеки ве коктеки Азиз Ер

1 ^aБиринджи васиетке коре, ибадет къаиделери ве ер юзюндеки Азиз Ер бар эди. 2 ^bЧадырнынъ биринджи болюги япылгъан эди. Онынъ ичинде къандиль, стол ве теклиф пителери бар эди. О, «Мукъаддес Ер» деп адландырылгъан эди. 3 ^cЭкинджи перденинъ артында «Энъ Мукъаддес Ер» деген бир болюк бар эди. 4 ^dБу ерде къокъулы отлар якъыладжакъ алтын ер, эм де эр тарафы алтыннен къаплангъан Васиет Сандыгъы бар эди. Онынъ ичинде манна къоюлгъан алтын чанакъ, Харуннынъ чечек ачкъан таягъы ве Васиет сёзлеринен таш левалары бар эди. 5 ^eСандыкъ устюнде шуретли Керувлар бар эди. Олар Мерамет Ери къапагъыны къаплай эди. Амма шимди олар акъкъында чокъ айтмагъа керекмей.

6Эр шей бойле азырлангъанда, руханийлер озь вакътына Чадырнынъ биринджи болюгине кирип, ибадет этелер. 7 ^fЧадырнынъ ички болюгине исе йылда бир кере тек баш руханий кире, ве о озюнинъ ве халкънынъ къабаатлары ичюн къурбан къаныны алып кетирмек керек.

8 ^gБунен Мукъаддес Рух шуны косьтере: ер юзюндеки Чадыр даа тургъанда, коклердеки Азиз Ерге кирген ёл даа ачылмагъан. 9 ^hБу Чадыр – шимдики заман ичюн бир бельги: Аллагъа кетирильген бахшышлар ве къурбанлар ибадет эткен адамларнынъ виджданыны эляллап оламайлар. 10 ⁱОлар – тек ашлар, ичимликлер ве эр тюрлю абдестлер. Булар – беден ичюн эмирлер, ве олар янъы тертип пейда олгъанына къадар къоюлгъан.

11 ^jАмма Месих яхшылыкъ кетирген баш руханий оларакъ кельди. О, даа буюк ве мукеммель Чадыргъа, адам япмагъан ве ер юзюнде яратылмагъан Чадыргъа кирди. 12О, текелернинъ я да таналарнынъ къанынен дегиль, Азиз Ерге бир кере Озь къанынен кирди ве адамларгъа эбедий къуртарувны къазанды. 13 ^kТекелернен бугъаларнынъ къаны ве якъылгъан къунанджыннынъ кулю арам олгъан адамларнынъ устюне сепильгенде, оларны азиз эте ве оларнынъ беденини темизлей, 14 ^lэбедий Рухнынъ ярдымынен Озюни къабаатсыз алда Аллагъа багъышлагъан Месихнинъ къаны исе олюмге алып баргъан ишлерден виджданымызны темизлей ве бизге Тири Аллагъа хызмет этмеге имкян ярата.

15 ^mШу себептен Месихнинъ ярдымынен янъы васиет ерине кельди. Месих биринджи васиет заманында япылгъан гуналарына одеме этмек ичюн, ольди. Онынъ олюми себебинден Алла чагъыргъан адамлар О сёз берген эбедий мирасны алмакъ мумкюнлер. 16Къайда васиет олса, васиет эткеннинъ олюми де олмакъ керек. 17Васиет олюмден сонъ кучьке кире. Васиет этиджи даа тири олгъанда, васиетнинъ ич бир тесири ёкъ. 18Шунынъ ичюн биринджи васиет де къан тёкюльген сонъ кучьке кирди. 19 ⁿМуса Къануннынъ эр бир эмирини бутюн халкъкъа окъугъан сонъ, бузавларнынъ ве текелернинъ къаныны, сувны, къырмызы юнни, эзов отуны алды да, эм китапнынъ устюне, эм де бутюн халкънынъ устюне септи 20 ^oве: «Бу – Алла сизлерге эткен васиетнинъ къаны», – деди. 21 ^pАна шай этип, къанны Чадырнынъ ве ибадетте къулланылгъан бутюн савутларнынъ устюне септи. 22 ^qКъанун боюнджа къаннен деерлик эр шей эляллана. Къан тёкюльмесе, багъышлав олмаз.

Месих Озюни къурбан этип, гуналарны ёкъ этти

23 ^rКоклерде олгъан шейлернинъ ердеки копиялары айванларнынъ къанынен элялланмакъ керек, коклердеки шейлер исе бу къурбанлардан яхшы союнен эляллана. 24 ^sАдам къолунен япылгъан Азиз Ер акъикъий Азиз Ернинъ копиясы эди. Лякин Месих ердеки Азизликке кирмеди, О, коклерге кирди ве шимди бизлер ичюн Алланынъ огюне котерильди. 25Баш руханий айванларнынъ къанынен Энъ Мукъаддес Ерге эр йыл кире. Месих исе Озь къаныны чокъ кере кетирмек керекмей. 26 ^tАкис алда, О, дюнья яратылгъандан берли чокъ кере азап чекмек керек олур эди. О исе заманнынъ сонъунда бир кере пейда олды, Озюни къурбан этти ве адамларнынъ гуналарыны ёкъ этти. 27 ^uАдамларнынъ баш язысы – бир кере ольмек ве ондан сонъ Аллагъа джевап бермектир. ^vМесих де, чокъ адамларнынъ гуналарыны Озь бойнуна алмакъ ичюн, бир кере къурбан олды. Экинджи сефер кельгенде, кене гуналарны ёкъ этмек ичюн дегиль, Оны беклегенлерге къуртулыш кетирмек ичюн келеджек.28