‏ Hosea 1

Хошеанынъ къадыны ве балалары

1 ^aУззия, Ётам, Ахаз ве Хизкия Ехудада падишалыкъ япкъанда, Ёашнынъ огълу Еровоам Исраильде падиша олгъанда, Беэрийнинъ огълу Хошеагъа РАББИнинъ бойле хабери кельди.

2 ^bРАББИ Хошеагъа айткъан сёзюнинъ башы. РАББИ Хошеагъа бойле деди:

– Бар да, ороспу къадынгъа эвлен. О, ороспулыгъындан балаларыны корьсюн. Бутюн бу мемлекет Менден айырылды ве ороспу киби, башкъа аллаларгъа ибадет этип башлады.

3Хошеа кетип, Дивлаимнинъ къызы Гомерге эвленди. О юкке къалып, онъа огълан бала тапты.

4 ^cРАББИ Хошеагъа:

– Адыны Йизреэл къой, чюнки чокъ вакъыт кечмезден, Мен Йизреэл вадийинде тёкюльген къанны Ехунынъ эвинден сорарым ▼

▼Еху Йизреэл вадийинде Ёрам падишаны ольдюрди (бакъ. 4 Пад 9.24).

ве Исраиль эвининъ падишалыгъыны токътатырым. 5 ^eО куню Йизреэл вадийинде Исраильнинъ яйларыны сындыраджагъым.

6 ^fГомер кене юкке къалды ве къыз бала тапты. РАББИ Хошеагъа:

– Адыны Ло-Рухама ▼

▼Ло-Рухама – къ. еуд. бу ибаре «аджылмагъан, мерамет корьмеген» манасыны ташый.

къой, чюнки энди Мен Исраиль эвине мерамет этмейджегим, оларнынъ къабаатларыны энди багъышламайджагъым. 7 ^hЛякин Ехуда эвине мерамет этеджегим. Не яй, не къылыч, не дженк, не атлар ве атлылар оларны къуртараджакъ, олар Алласы РАББИнинъ кучюнен къуртуладжакъ.

8Гомер Ло-Рухаманы кокюстен кестирген сонъ, кене юкке къалды ве огълан бала тапты. 9РАББИ Хошеагъа:

– Адыны Ло-Амми ▼

▼Ло-Амми – къ. еуд. бу ибаре «меним халкъым дегиль» манасыны ташый.

къой, чюнки сиз Меним халкъым дегильсиз. Мен де сизинъ Алланъыз олмам.

Исраильнинъ гъайрыдан тикленюви

10 ^jАмма исраиллилер, денъиз къуму киби, чокъ оладжакъ. Оларны ич кимсе ольчемез, ич кимсе саймаз. «Сиз Алланынъ халкъы дегильсинъиз», – деген ерде оларгъа: «Сиз Тири Алланынъ огъулларысынъыз», – дейджеклер. ^kЕхудалылар ве исраиллилер берабер топлашып, озьлерине бир башлыкъ сайлайджакъ ве ер юзюнде эсен-аман яшайджакълар. Йизреэл куню азиз оладжакъ!11