‏ Hosea 11

Ашшурдаки сюргюнлик

1 ^aТанъ агъаргъанда,
Исраильнинъ падишасы мытлакъа гъайып оладжакъ.

Исраиль яш бала олгъанда,
Мен оны пек севдим.
Мен огълумны Мысырдан чагъырдым.
2Мен исраиллилерни чокъ чагъырдым,
олар исе эп узакълаша эди.
Олар Баалларгъа къурбанларны кетире,
путларгъа къокъулы отларны якъа эди.
3 ^bМен Озюм Эфраимни юрмеге огреттим,
оны къолларымда алып юрдим.
Амма Мен оларгъа шифа бергенимден
оларнынъ хаберлери олмады.
4 ^cМен оларны инсан мераметинен,
севги багъларынен Озюме чектим.
Бойнундан боюндырыкъны ала,
эгилип, агъызларына аш къоя эдим.

5Олар Мысыр мемлекетине къайтмайджакъ,
лякин, Менден юзь чевиргенлери ичюн,
оларнынъ падишасы Ашшур оладжакъ.
6Къылыч оларнынъ шеэрлерини ураджакъ,
къапу мандалларыны ёкъ этеджек,
къара ниетлери ичюн оларны ашайджакъ.
7Халкъым Менден даима узакълашмакъта.
Оларны акъылларынен коклерге айланмагъа чагъыралар,
амма кимсе бунъа ынтылмай.

Алла Озь халкъыны аджый

8Сени насыл къалдыраджагъым, эй, Эфраим?
Насыл ташлайджагъым сени, эй, Исраиль?
Сени, Адма шеэрини киби, къалдырмагъа мумкюнимми?
Цевоим шеэрине япкъанымны санъа япайыммы?
Ичимде юрегим сызлады,
аджыгъан дуйгъуларым алевленди!
9 ^dКъызгъын ачувыма коре япмайджагъым,
бир даа Эфраимни къырып ташламайджагъым.
Мен – Аллам, Мен инсан дегилим.
Сизинъ аранъызда Мен – Мукъаддес Аллам.
Ачувланып, Мен шеэрге кирмейджегим.

10 ^eОлар РАББИнинъ артындан кетеджеклер.
Арслан киби, О, ырылдайджакъ.
О, сесини береджек,
ве огъуллары титреп, гъарптан келеджек.
11 ^fКъушлар киби, абдырайджакъ
ве Мысырдан къайтаджакъ.
Гогерджинлер киби,
Ашшур мемлекетинден учаджакъ.
Мен оларны эвлерине ерлештиреджегим, – дей РАББИ.

Алла Исраильни ве Ехуданы къабаатлай

Эфраим этрафымны яланнен сарды,
Исраиль халкъы алдавнен Мени ортагъа алды.
Ехуда исе даа Алланен,
о, Азиз Аллагъа даа садыкъ.
12