Hos 12 | CrhCTB | STEP | Эфраим бошуна ельни отлата, кунь бою шаркъ ельнинъ артындан къувалай. О, яланны ве амансызлыкъны чокълаштыра, Ашшурнен барышыкъ япа, Мысыргъа зейтюн ягъыны алып кете.

‏ Hosea 12

1 ^aЭфраим бошуна ельни отлата,
кунь бою шаркъ ельнинъ артындан къувалай.
О, яланны ве амансызлыкъны чокълаштыра,
Ашшурнен барышыкъ япа,
Мысыргъа зейтюн ягъыны алып кете.
2 РАББИ Ехуданы да суд этеджек,
Якъупны да япкъан ишлерине коре джезалайджакъ,
япкъанларына коре акъкъыны береджек.
3 ^bЯкъуп ана къурсагъында биле къардашыны тепти,
буюген сонъ исе Алланен курешти.
4 ^cО, Мелекнен курешти ве енъди,
агълап, Онынъ мераметини къыдырды.
О, Алланы Бет-Эльде тапты
ве анда Онен лакъырды этти.
5 ^dРАББИ исе – Ордуларнынъ Алласыдыр,
Онынъ Ады – РАББИдир.
6 ^eБунынъ ичюн Алланъа къайтынъыз,
мерамет эйленъиз ве адалетли суд этинъиз,
эр вакъыт Алланъа ишанынъыз.

Алла гуна ичюн къабаатлай

7 ^fЯлан теразени къолда туткъан
алыш-веришчилер ^{▼▼Къ. еуд. «ханаанлылар».} алдатмагъа север.
8 ^hЭфраим де бойле дей:
«Мен бай олдым,
чокъ барлыкъ топладым,
Бутюн эткен ишлеримде
гуна сайыладжакъ ич бир къабаатны тапамайджакълар».
9 Амма Мен, Мысырдан башлап, –
сенинъ Алланъ олгъан РАББИм,
байрам куньлеринде киби,
сени бир даа чадырларда ерлештиреджегим.
10 Мен пейгъамберлернен лаф эттим,
Мен Озюм чокъ руя оларгъа косьтердим,
пейгъамберлернен кинаели икяелерни айттым.
11 ⁱГилад шеэринде яманлыкъ бармы?
Олар мытлакъа гъайып оладжакъ!
Гилгал шеэринде бузавларны къурбан чалалармы?
Къурбан ерлери тарла меджасындаки таш обаларына чевириледжек.
12 ^jЯкъуп Арам тарлаларына къачты,
Исраиль бир апай ичюн хызмет этти,
апайына эвленмек ичюн, о, къой бакъты.
13 ^kРАББИ Исраильни пейгъамбернинъ ярдымынен
Мысырдан чыкъарды,
пейгъамбернинъ ярдымынен О, оларны къорчалай эди.
14 ^lЭфраим Алланы пек ачувландырды,
шунынъ ичюн О, онынъ къабаатыны багъышламаз,
Рабби Озь джезасыны онынъ башына тюшюрир.