‏ Hosea 13

Исраиль устюнде сонъки суд

1 ^aЭфраим лаф эткенде, эр кес титрей эди. О, Исраильде юксельди,
лякин Баал ичюн къабаат ишлеп, гъайып олды.
2 ^bШимди де олар гунагъа гуна къошалар,
кумюшини ирите
ве озьлерине, акъыллары еткенине коре,
путларны япалар.
Усталар путларнынъ эписини ясайлар ве:
«Къурбан кетирген адам
бузав путуны опьсюн!» – дейлер.
3 ^cБунынъ ичюн олар саба думаны киби,
тез гъайып олгъан чыкъ киби оладжакъ,
арман еринден савурылгъан саман чёпюне,
собадан чыкъкъан тютюнге ошайджакълар.

4 ^dАмма Мен – сени Мысырдан чыкъаргъан РАББИм,
сенинъ Алланъ Мен.
Санъа Менден гъайры башкъа алланы бильмеге керекмей.
Менден гъайры башкъа къуртарыджы ёкътыр.
5 ^eМен сахрада,
сувсуз топракъта сени бакъа эдим.
6 ^fМен оларгъа чобанлыкъ эттим,
ве олар тойгъандже ашадылар.
Тойгъан сонъ исе юреклери къопайды,
ве олар Мени унутты.
7 ^gМен оларгъа къаршы арслан киби оладжагъым,
леопард киби, ёл четинде беклеп ятаджагъым.
8 ^hБалаларындан айырылгъан аюв анасы киби,
оларгъа атыладжагъым
ве кокреклерини йыртаджагъым.
Арслан киби, оларны анда ашайджагъым,
кийик айванлар оларны парчалайджакъ.

9Эй, Исраиль, сен ёкъ оладжакъсынъ.
Санъа тек Менден ярдым келир.
10 ⁱЭнди сенинъ падишанъ къаерде?
О, эписи шеэрлеринъде яшагъанларны къуртарсын!
Сенинъ ёлбашчыларынъ да не ерде?
Сен озюнъ: «Бизге падиша ве башлыкъларны бер», – деп,
оларны Менден истединъ.
11 ^jМен ачувланып, санъа бир падиша бердим,
ве гъазапланып, оны сенден алып ташладым.
12Эфраимнинъ къабааты язып алынды,
гуналары топланып сакъланды.
13 ^kДогъаяткъан къадыннынъ дерди
Эфраимнинъ башына тюшер.
О исе – акъылсыз огълудыр;
вакъты-саати кельгенде,
ачылгъан къарындан чыкъмай.

14 ^lОларны олюлер дюньясы акиминден къуртарайыммы?
Оларны олюмден къорчалайыммы?
Ёкъ! Эй, олюм, озь азапларынъны башларына тюшюр!
Олюлер дюньясы, айды, урып-йыкъ!
Ич аджымайджагъым оларны! ▼

▼Бу аетни даа бойле тариф этмеге мумкюн: «Оларны олюлернинъ дюньясындан къуртараджагъым, олюмден оларны сатын аладжагъым. Эй, олюм! Сен берген азапларынъ къаерде? Эй, олюлер дюньясы! Сен берген хасталыгъынъ къайда? Козьлерим сени аджымаз!»

ⁿАгъа-къардашлары арасында Эфраим бол къысметли олса да,
шаркътан къуру рузгяр келеджек,
сахрадан эскен РАББИнинъ ели котериледжек,
онынъ чокъракълары къуруйджакъ,
чешмелерининъ суву битеджек.
Оларнынъ къыйметли шейлернинъ бутюн хазинеси
тартып алынаджакъ ве бошатыладжакъ.
15