‏ Hosea 6

Исраильнинъ ве Ехуданынъ экиюзьлюлиги

1 ^aБеля вакътында олар Менден ярдым сорайджакъ ве:

«Айдынъыз, РАББИмизге къайтайыкъ!
О, хасталыкъ берди – О да тедавийлер,
О, урды – О да яраларымызны сарар, – дейджек.
2 ^b– Эки куньде бизни яхшы этер,
учюнджи куню аякъкъа турсатыр,
ве биз Онынъ огюнде яшармыз.
3Айдынъыз, РАББИни таныйыкъ,
Оны бильмеге тырышайыкъ.
Ярыкъ танъда пейда олгъаны киби,
О да пейда оладжакъ.
Ягъмур кельгени киби,
О бизге келир.
Баарьнинъ сонъунда ягъмур киби,
О, топракъны суварыр».

4 ^c– Эй, Эфраим, не япайым санъа?
Эй, Ехуда, санъа не япайым?
Сизинъ севгинъиз саба думанына ошай,
тез гъайып олгъан чыкъны акъылгъа кетире.
5 ^dБунынъ ичюн Мен оларны пейгъамберлер ярдымынен парчалай эдим,
агъзымдан чыкъкъан сёзлернен ольдюре эдим.
Меним къарарларым – саба ярыгъыдыр.
6 ^eМен къурбанларынъыздан ве бахшышларынъыздан зияде
ишанчлы севгинъизден разым,
бутюнлей якъыладжакъ къурбанларынъыздан зияде
Алланы биледжегинъизни истейим.
7Олар исе Адемге ошап,
васиетимни бозды,
анда Менден вазгечти.
8 ^fГилад – яманлыкъ япкъанларнынъ шеэридир,
къан излерине толудыр.
9 ^gРуханийлернинъ сюрюси –
айдутлар такъымы кибидир:
олар сакъланып, бирисини беклейлер,
Шекем ёлунда ольдюрелер,
пис шейлерни япалар.
10Исраиль эвинде дешетли шейлерни корьдим:
Эфраим анда ороспулыкъкъа батты,
Исраиль арамланды.

^hХалкъымны сюргюнликтен къайтаргъанымдан сонъ,
санъа да, Ехуда, джеза куню, оракъ вакъты киби, келеджек.
11