‏ Isaiah 10

1 ^aАдалетсиз къанунларны япкъанларгъа,
акъсыз къарарларны чыкъаргъанларгъа беля!
2 ^bСиз фукъарелерге адалет къыдырмагъа ёл бермейсинъиз,
зулум тюбюнде къалгъан халкъымдан адалет къыдырмакъ акъкъыны тартып аласынъыз,
тул къадынларнынъ мулькюни чекип аласынъыз
ве оксюзлерни союндырасынъыз.
3Рабби джезанен кельгенде,
узакътан башынъызгъа беля тюшкенде,
не япаджакъсынъыз?
Ярдым сорап, кимге ялвараджакъсынъыз?
Байлыгъынъызны къайда сакълайджакъсынъыз?
4 ^cБель букип, сюргюнликке кетеджексинъиз,
ольдюрилип, ерге тюшеджексинъиз.
Бундан сонъ да РАББИнинъ гъазабы тынмайджакъ,
къолу эп бир узатылгъандыр.

Рабби Ашшурны суд эте

5 ^dАшшургъа беля!
Оны, таякъны киби, къолумда тутам,
ачувымда ве гъазабымда халкъларны джезалайым!
6 ^eОны имансыз миллетке,
Мени ачувландыргъан халкъкъа къаршы ёллайджагъым;
оны бутюнлей чайпамагъа,
эр шейини тартып алмагъа,
оны, сокъакътаки чамурны киби, таптамагъа буюраджагъым.
7 ^fАмма Ашшур башкъа ишлерни япмагъа да тюшюнир,
башкъа ниетлерининъ артындан кетер,
чокъ миллетлерни де гъайып этип, ёкъ этмеге юрегинде истер.
8– Башлыкъларымнынъ эписи падишалар киби дегиллерми? – дей.
9 ^g– Къално ве Къаркемиш,
Хамат ве Арпад,
Самарие ве Дамаск –
манъа эп бир!
10Мен чокъ падишалыкъларны енъдим,
оларнынъ путлары ве аллалары исе
Ерусалимдеки ве Самариедекилерден буюк эдилер.
11 ^hЕрусалимни де айны ойле енъеджегим,
Самариеге ве путларына япкъан шейлеримни онъа да япаджагъым.

12 ⁱРабби Сион дагъында ве Ерусалимде озь ишини битирген сонъ, Ашшурнынъ падишасыны къопай юреги ве юкъарыдан бакъкъан козьлери ичюн джезалайджакъ. 13 ^j«Эр шейни къолумнынъ кучюнен яптым,
акъыл-идрагъымнен къазандым, – деди падиша.
– Мен акъыллым! Халкъларнынъ сынъырларыны ёкъ эттим,
хазинелерини тартып алдым,
кучьлю бугъа киби,
тахтларында отургъанларны йыкътым.
14Теректеки къуш ювасыны дайын,
халкъларнынъ зенгинликлерини къолай таптым,
ювадан йымырта алгъан киби,
озюме бутюн топракъларны алдым.
Къанат къыбырдаткъан, агъыз ачкъан,
“ин” деген кимсе олмады».

15Балтанен ишлеген адамгъа къаршы
балта котерилип олурмы?
Пычкъынен чалышкъан адамнынъ огюнде
пычкъы макътанырмы?
Таякъ оны котергенни саллармы?
Сопа терек олмагъан адамны котерирми?
16 ^kШунынъ ичюн Рабби, Ордуларнынъ РАББИси,
Ашшурнынъ кучьлю аскерлерини
такъаттан тюшюрген хасталыкъкъа огъратаджакъ,
онынъ шурети, атештен киби, янып битеджек.
17 ^lИсраильнинъ Ярыгъы – атеш,
онынъ Азизи – алев оладжакъ.
Бир кунь ичинде Ашшурнынъ тикенли чалыларыны
ве кийик отларыны якъып битиреджек,
18шуретли орманыны ве багъчасыны
бутюнлей ёкъ этеджек;
падиша озю олюм алдындаки хаста киби оладжакъ.
19Орманда къалгъан тереклери
о къадар аз оладжакъ ки,
уфакъ бала биле оларны сайып оладжакъ.

Къалгъан исраиллилер

20О куню сагъ къалгъан исраиллилер,
Якъупнынъ къуртулгъан эвлятлары,
оларны ургъангъа таянмайджакъ,
амма РАББИге, Исраильнинъ Азизине,
джан-юректен ишанаджакълар.
21Сагъ къалгъанлар къайтаджакъ,
Якъупнынъ къуртулгъан эвлятлары
Кучьлю Аллагъа ялвараджакълар.
22 ^mЭй, Исраиль!
Халкъынъ денъиз къуму къадар чокъ олса да,
Аллагъа тек бир къач адам къайтаджакъ!
Къырылувынъ эвельден язылгъан,
адалет эр тарафлама даркъалгъан.
23 ⁿОрдуларнынъ РАББИ-ТААЛЯсы
бутюн ер юзюнде эвельден тайинленген къырылувны
толусынен этеджек.

Ашшурнынъ джезасы акъкъында

24 ^oШунынъ ичюн Ордуларнынъ РАББИ-ТААЛЯсы бойле дей: – Эй, Сионда яшагъан халкъым!
Ашшурдан къоркъманъыз!
О, эвельден Мысыр киби, сени таякънен урар,
сопасыны санъа къаршы котерир.
25Якъынларда гъазабым ятышаджакъ,
ачувнен Ашшурны ёкъ этеджегим.

26 ^pЦур-Оревде мидьянлыларны ургъаны киби,
Ордуларнынъ РАББИси Ашшурны да къамчынен ураджакъ.
Мысырда япкъаны киби,
О, буюк сувлар устюнден таягъыны котереджек.
27 ^qО куню омузларынъыздаки юк,
бойнунъыздаки боюндырыкъ тюшеджек.
Семиргенинъиз ичюн боюндырыгъынъыз къырыладжакъ.

28 ^rОлар Айят шеэрине кельдилер,
Мигрондан кечтилер,
Микмаста аш-сув запасларыны къалдырдылар.
29 ^sОзенни кечтилер, Гевада геджеледилер.
Рама шеэри къоркъудан къалтырады,
Шаулнынъ Гива шеэринде яшагъанлар къачты.
30 ^tЭй, Гъаллим халкъы, сесинъни котерип увулда!
Эй, Лайша халкъы, динъле!
Бичаре Анатот халкъы!
31Мадмена халкъы чапып кетти,
Гевим халкъы къачмагъа ашыкъты.
32 ^uБир кунь Нов шеэринде къалып,
Сион дагъына, Ерусалим тёпелигине
юмрукъ саллайджакъ.

33 ^vМына, Рабби, Ордуларнынъ РАББИси
дешетли кучюнен терек пытакъларыны къопараджакъ,
узун бойлу тереклерни балталайджакъ,
юкъары котерильгенлерни ерге йыкътыраджакъ,
34сыкъ орманларны демирнен кеседжек.
Къудретли Алланынъ огюнде Ливан йыкъыладжакъ.