‏ Isaiah 13

Вавилон акъкъында пейгъамберлик

1 ^aАмоцнынъ огълу Ешаянынъ Вавилон акъкъында айткъан пейгъамберлиги.

2 ^bЧыплакъ бир дагъ устюнде байракъ котеринъиз!
Сесинъизни котерип, къолларынъызнен ишмар этинъиз,
мырзаларнынъ къапуларына кирсинлер.
3Мен сайлагъан азизлериме эмир бердим,
гъазабымны ерине кетирмек ичюн,
батырларымны, буюклигиме къувангъанларны чагъырдым.

4Дагълардаки буюк шамата –
буюк бир халкънынъ сеси кибидир;
миллетлернинъ падишалыкълары берабер топлашты.
Ордуларнынъ РАББИси озь ордусыны козьден кечире.
5 ^cБутюн ер юзюни урып йыкъмакъ ичюн,
РАББИ ве гъазабыны ерине кетирген аскерлери
узакъ мемлекеттен,
коклернинъ уджундан келелер.

6 ^dАгъланъыз! РАББИнинъ куню якъындыр!
Эр шейни йыкътыраджакъ Къудретлининъ кучю келе!
7 ^eЭр кес такъаттан кесиледжек,
эр адам рухтан тюшеджек.
8 ^fДешет тюбюнде къаладжакълар,
оларны дерт ве агъры сараджакъ.
Догъургъан апай киби чекишеджеклер,
бири-бирине шашып бакъаджакълар,
бетлери къызараджакъ.

9 ^gМына, РАББИнинъ куню келе!
Къоркъунчлы, гъазапкъа ве шиддетли ачувгъа толу куньдир!
Ер юзю сахрагъа чевириледжек,
анда яшагъан эписи гуналылар ёкъ этиледжек.
10 ^hКоктеки йылдызлар, Орион ве онынъ йылдызлары
нуруны бермейджеклер;
кунеш догъгъанда сёнеджек,
ай да озь ярыгъынен ярыкълатмайджакъ.
11 ⁱМен дюньяны – яманлыкъ ичюн,
яман адамларны – акъсыз япкъанлары ичюн джезалайджагъым,
къопайларнынъ гъурурыны ёкъ этеджегим,
макътангъан залымларны ашалайджагъым.
12 ^jАдамларны темиз алтындан аз этеджегим,
акъайларны Офир алтынындан паалы япаджагъым.
13 ^kГъазабым къайнагъан куню
Мен, Ордуларнынъ РАББИси, коклерни о къадар чокъ сарсытаджагъым ки,
ер юзю еринден къыбырдайджакъ.

14 ^lО заман эр кес,
артындан къувалангъан гъазель киби,
чобансыз къой-эчкилер киби,
озь халкъларына къайтаджакълар,
озь топракъларына къачаджакълар.
15Эр тутулгъан окънен тешиледжек,
къолгъа эр тюшкен къылычнен ольдюриледжек.
16 ^mКъундакъ балалары оларнынъ козьлери огюнде ташнен урулып ольдюриледжек,
эвлери чайпаланаджакъ,
апайларынынъ намусларына токъунаджакълар.

17 ⁿИште, оларгъа къаршы,
кумюшни ич бир шей ерине корьмеген,
алтынны севмеген мадайлыларны котереджегим.
18 ^oЯйлардан йигитлерни ураджакъ,
сабийлерни аджымайджакъ,
кичик балаларгъа мераметли олмайджакъ.
19 ^pБойле этип, падишалыкъларнынъ гузеллиги Вавилон,
къасдийлилер гъурурлангъан дюльберлиги, гъайып оладжакъ,
Алла ёкъ эткен Содом ве Гоморагъа ошайджакъ.
20 ^qАнда бир даа ич кимсе яшамайджакъ,
несиллерден несиллерге ич кимсе отурмайджакъ,
араплар чадырларыны къоймайджакъ,
чобанлар айванларынен раатланмайджакъ.
21 ^rАнда кийик айванлар яшайджакъ,
эвлерини байкъушлар толдураджакъ,
анда девекъушулар ерлешеджек,
теке шейтанлары секиреджек.
22Сарайларында сыртланлар,
байрам эвлеринде шакъаллар увулдайджакъ.
Шу заман якъынлаша,
шу куньлер тез келеджеклер.