‏ Isaiah 14

Сюргюнликтен къайтув

1 ^aРАББИ Якъупны аджыйджакъ,
кене Исраильни сайлайджакъ,
оларны топракъларында ерлештиреджек.
Башкъа халкълар оларгъа къошуладжакъ,
Якъупнынъ эвине япышаджакълар.
2 ^bХалкълар оларны алып, ерлерине кетиреджек,
ве анда, РАББИнинъ топрагъында,
халкълар исраиллилернинъ къуллары оладжакъ.
Озьлерини эсирликке алгъанларны эсирликке аладжакъ,
залымларынынъ устюне эфендилик этеджек.

Вавилон падишасы енъильгени себебинден гъалебе тюркюси

3О куню РАББИ сени дертлерден, къаарь-къасеветтен ве агъыр къуллукътан къуртаргъанда, 4 ^cсен Вавилоннынъ падишасыны мыскъыллап, онынъ акъкъында бойле йырлайджакъсынъ:

– Залым ёкъ олды,
гъазабы да битти.
5РАББИ яман адамларнынъ таягъыны къырды,
кучьлюлернинъ акимиетини йыкъты.
6Падиша ачувында халкъларны токътамаздан ура,
гъазабында миллетлерни даима чекиштире эди.
7Шимди исе бутюн ер юзюне раатлыкъ ве тынчлыкъ кельди,
эр шей къуванчнен къычыра.
8 ^dКипарислер ве Ливан кедрлери шенъленип:
«Сен енъилип ятасынъ,
бизлерни кесмек ичюн ич кимсе кельмей», – дейлер.

9Ашагъыдаки олюлернинъ дюньясы,
сени киришинде къаршыламакъ ичюн, арекет этти;
сенинъ ичюн олюлернинъ рухларыны ▼

▼Олюлернинъ рухлары – къ. еуд. «рефалылар» демектир.

,
дюньянынъ башлыкъларыны уятты;
миллетлернинъ эписи падишаларны тахтларындан котерди!
10Олар эписи санъа:
«Сен де, бизлер киби, кучюнъни джойдынъ!
Сен де бизге ошадынъ!» – айтаджакълар.
11Арфаларынъ чалгъан авасынен
буюклигинъ олюлернинъ дюньясына авдарылды.
Къуртлар устюнде ятасынъ,
орьтю киби, устюнъни къуртчыкълар къаплайлар.

12 ^fЭй, танъ йылдызы, саарь огълу!
Бутюн халкъларны енъдинъ!
Шимди исе, кесильген терек киби, ерге йыкъылдынъ!
13 ^gСен: «Кокке чыкъарым,
Алланынъ йылдызларындан юкъары тахтымны къоярым,
Цафон дагъында,
аллалар топлангъан дагъында отураджагъым.
14 ^hБулутларнынъ тёпесине котериледжегим,
Юдже Алла киби оладжагъым», – деп тюшюндинъ.
15 ⁱАмма сени олюлернинъ дюньясына,
олюм чукъурынынъ теренлигине алып кеттилер!

16Сени корьгенлер дикъкъат этип,
тюшюнджеге даладжакълар:
«Ер юзюни тепреткен,
падишалыкъларны сарсыткъан,
17 ^jдюньяны сахрагъа чевирген,
шеэрлерини йыкъкъан,
эсирлерини запт этип, эвлерине йибермеген адам бумы?»
18Эписи миллетлернинъ падишалары
шереф иле эр бири озь мезарында яталар.
19Сени исе дефн этмейип, ташладылар,
бир шейге кечмеген пытакъны киби, ерге аттылар.
Таш чукъурларына тюшюрильгенлернинъ,
къылычнен ольдюрильгенлернинъ урбасы киби ятасынъ,
сени, леш киби, таптайлар.
20 ^kБашкъаларны дефн этеджеклер,
сен исе къабирде ятмайджакъсынъ,
чюнки сен озь топрагъынъны боздынъ,
халкъынъны ольдюрдинъ.
Яманларнынъ эвлятлары омюрбилля анъылмайджакъ.
21Бабанынъ къабаатлары ичюн,
огъулларыны, къурбанларны киби, соймагъа ер азырланъыз.
Олар кучьлю олып, топракъкъа сабы олмасынлар,
ер юзюни шеэрлерине толдурмасынлар.
22– Оларгъа къаршы чыкъаджагъым, –
дей Ордуларнынъ РАББИси. –
Вавилоннынъ намыны ёкъ этеджегим,
сагъ къалгъанларны,
эвлятларыны ве несиллерини ольдюреджегим, –
дей РАББИ.
23 ^l– Онынъ топрагъыны кирпилерге береджегим,
батакълыкъкъа чевиреджегим,
орталыкъны йыкъаджагъым,
сипиркинен киби сипиреджегим, –
дей Ордуларнынъ РАББИси.

Ашшур акъкъында пейгъамберлик

24Ордуларнынъ РАББИси ант этти:
– Не япмагъа ниетленсем – о оладжакъ,
не этмеге тюшюнсем – о беджериледжек.
25 ^mАшшурны Меним топрагъымда ёкъ этеджегим,
дагъларымда таптайджагъым.
Халкъым Ашшурнынъ боюндырыгъындан,
омузларындаки юктен къуртуладжакъ.

26Бутюн ер юзю акъкъында чыкъарылгъан къарар будыр.
Алланынъ къолу бутюн халкъларгъа къаршы котерильгендир.
27 ⁿОрдулар РАББИсининъ къарарыны ким ёкъ этип олур?
Котерильген къолуны ким токътатып олур?

Фелестинлилер акъкъында пейгъамберлик

28 ^oАхаз падиша ольген йылында ойле пейгъамберлик олды:

29– Эй, фелестинлилернинъ топрагъы!
Сени ургъан таякъ харап олгъанына къуванма!
Йыланнынъ союндан кобра чыкъаджакъ,
онынъ баласы – учкъан аждерха оладжакъ.
30О заман энъ ёкъсуллар,
яйладаки къойлар киби, тойып ашайджакълар,
фукъарелер къоркъмайып юкълайджакълар.
Сенинъ союнъны исе ачлыкътан ольдюреджегим,
сагъ къалгъанларынъыз биле оледжек.

31Агъланъыз, эй, шеэр къапулары!
Эй, шеэр, сес чыкъарып улу!
Эй, бутюн Фелестин топрагъы,
сен гъайып оладжакъсынъ!
Шималь тарафтан тютюн котериле,
душман ордулары сыра-сыра келе,
аскерлерден бири артта къалмай.

32 ^pХалкъларнынъ хаберджилерине не айтмакъ керек?
– Сионнынъ темелини РАББИ къойды,
чекиштирильген халкъ анда сакъланаджакъ!