Isaiah 16
Моавнынъ умютсиз алы акъкъында
1 aТопракънынъ падишасынаСела шеэринден, сахра ёлундан,
Сион къызынынъ дагъына къочкъарларны ёлланъыз.
2 bАрнон дерьясынынъ сай ерлеринде
Моав къызлары – ювасындан атылгъан,
эвсиз къушлар киби оладжакълар.
3«Огют беринъиз, къарар чыкъарынъыз,
уйле сыджагъында терек талдасы къорчалагъан дайын,
бизни белядан къорчала,
къувалангъанларны сакъла,
къачакъларны сатма.
4Къувалангъан моавлыларым
сеннен берабер яшасын,
оларны залымлардан сакъла».
Залымнынъ сонъу келеджек,
зулум битеджек,
чекиштиргенлер ер юзюнден гъайып оладжакъ.
5 cПадишанынъ укюмети севги ве яхшылыкънен къавий оладжакъ;
тахтнынъ устюнде, Давутнынъ чадырында
ишанчлы Суд Этиджи отураджакъ,
адалетни къыдыраджакъ,
усталыкънен суд этеджек.
6 d– Моавнынъ макътангъаныны,
пек къопай, гъурурлы,
кибирли ве магърур айткъанларыны эшиттик.
Айткъанлары исе бошуна!
7 eШунынъ ичюн моавлылар Моав акъкъында агълайджакъ,
эр кес агълайджакъ.
Рухтан тюшкенлер!
Кир-Харесетнинъ юзюм къурусы артындан аджджы агъланъыз!
8 fХешбон тарлаларынынъ берекети къыт олды,
Сивманынъ юзюмликлери къуруды.
Халкъларнынъ башлыкълары
энъ яхшы юзюм пытакъларыны къырдылар.
Юзюм исе Язер шеэрине къадар етип,
сахра бою джайыла эди,
денъизнинъ обир ялысына кече эди.
9 gОнынъ ичюн Язер акъкъында,
Сивмадаки юзюмлик артындан агълайджагъым.
Хешбон ве Элале шеэрлери,
сизинъ акъкъынъызда козьяш тёкеджегим!
Юзюм джыйылгъан вакътында,
оракъ мевсиминъде шенъли къуванч ёкъ да!
10Багъчалардан шенълик ве къуванч гъайып олды,
юзюм багъларында къуванчнен къычырмай ве йырламайлар,
юзюм сыкъылгъан чукъурларында юзюм таптамайлар.
Мен къуванчны токътаттым.
11 hМоав ичюн ичим-багърым, сантыр киби, инълей,
Кир-Херес ичюн юрегим сызлай.
12Моавлылар келип, ибадет тёпелеринде йыкъылгъандже табынса да,
азиз еринде дува этсе де,
бир шей ярдым этмейджек.
13РАББИ Моав акъкъында бойле хабер этти. 14 iЭнди РАББИ айта ки: – Моавнынъ шурети ве онынъ чокъ сайылы адамлары учь ыргъатлыкъ йылларындан сонъра ашаланаджакъ. Сагъ къалгъанлары да пек аз сайылы ве кучьсюз оладжакъ.
Copyright information for
CrhCTB