Isaiah 21
Вавилон акъкъында пейгъамберлик
1 aДенъиз ялысындаки сахра акъкъында пейгъамберлик.Негев ериндеки боран киби,о, сахра тарафындан, къоркъунчлы топракътан келе.
2 bКъоркъунчлы бир шейни корьдим:
адамлар бири-бирине хаинлик этелер,
душманлар орталыкъны урып йыкъалар.
«Эй, Элам, кель мында!
Эй, Мадай, шеэрни алкъагъа ал!
Бутюн ич чеккенлерини токътатаджагъым».
3 cШунынъ ичюн белимни аджджы агъры тутты,
дерди туткъан къадын киби, дерттен чекишем.
Эшиткенимден мен пек кедерлендим,
корьгенимден пек къасеветлендим.
4Юрегим ойнай, къоркъудан къалтырайым,
эвель сабырсызлыкънен беклеген гедже
шимди мени дешет тюбюнде къалдыра.
5Софраны донаттылар,
килимлерни джайдылар, ашап-ичип башладылар.
«Эй, башлыкълар! Турунъыз, къалкъанларынъызны ягъланъыз!»
6 dРабби манъа бойле деди: – Бар, къаравул къой, корьген шейлерини бильдирсин.
7Чифт-чифт атлар устюнде,
эшеклер ве девелер устюнде
кельген атлыларны корьгенде,
буюк дикъкъатнен динълесин.
8 eКъаравуллыкъ эткен къычырды:
– Раббим! Эр кунь къаравуллыкъ эттим,
эр гедже еримден айырылмадым.
9 fМына, адамлар, чифт-чифт ат устюндеки атлылар келе!
Сонъ сесини чыкъарып, бойле деди: – Йыкъылды, Вавилон йыкъылды!
Бутюн аллаларынынъ путлары ерге урулып къырылдылар.
10 gЭй, халкъым! Арман еринде урулып темизленген богъдай кибисинъ!
Ордуларнынъ РАББИсинден, Исраильнинъ Алласындан
не эшиткен олсам, сизге хабер эттим.
Эдом акъкъында пейгъамберлик
11Дума акъкъында пейгъамберлик.Сеир тарафтан манъа къычыралар:– Эй, къаравул! Гедже даа чокъ сюреджекми?
Эй, къаравул! Гедже тез битеджекми?
12Мен къаравуллыкъ этип:
– Саба якъын, амма гедже даа битмеди.
Даа сорайджакъ олсанъыз, келип соранъыз, – деп джевап бердим.
Араплар акъкъында
13Арабистан акъкъында пейгъамберлик.Эй, Дедан керванлары!
Арабистан орманында геджеленъиз!
14 hЭй, Тема топрагъында яшагъанлар!
Сувсагъанларгъа сув беринъиз,
къачкъанларны отьмекнен къаршыланъыз.
15Олар къылычтан, ялын къылычтан,
тартылгъан яйдан, дженкнинъ дешетинден къачалар.
16 iРабби манъа бойле деди: – Даа бир, ыргъатлыкъ йылына тенъ кельген, йылдан сонъра Кедарнынъ бутюн шурети гъайып оладжакъ. 17Кедарнынъ сагъ къалгъан аскерлери, джесюр окъчулары пек аз оладжакъ. РАББИ, Исраильнинъ Алласы, бойле хабер этти.
Copyright information for
CrhCTB