‏ Isaiah 28

Эфраимнинъ такъдири

1Эфраимнинъ сархош огъуллары макътангъан таджгъа беля!
Солаяткъан чечекке,
Эфраимнинъ дюльберлигине ве шуретине беля!
Чечек берекетли вадийининъ башында,
анда яшагъанлар исе шарапнен харапландылар!
2 ^aМына Раббининъ сагълам ве кучьлю бириси бар.
Бурчакълы ягъмур, йыкъыджы боран,
кучьлю сув ташкъыны киби келеджек.
Рабби Озь къолунен буны ерге ёллайджакъ.
3Сархош эфраимлилер макътангъан тадж аякъ асты этиледжек.
4Солаяткъан чечек,
Эфраимнинъ дюльберлиги ве шурети,
берекетли вадийининъ башындаки чечек –
вакътындан эрте пишкен инджир киби олур:
корюнир-корюнмез, аман къопарылып ютуладжакъ.

5О куню сагъ къалгъан халкъына
Ордуларнынъ РАББИси аджайип тадж,
дюльберлик ве шурет оладжакъ.
6 ^bСуд эткенлерге О, адалет рухуны береджек,
шеэр къапуларында душманларнен дженклешкенлерге О, юрек оладжакъ.

7 ^cБулар да шараптан тентир-ментир юрелер,
ичкиджиликтен ёлларыны шашыралар,
руханийлернен пейгъамберлер сюрюнелер.
Шарапкъа берилип,
ичкиджиликтен акъылларыны ашадылар,
руяларында янъылалар,
тарифлеринде абыналар.
8Софралары джиренч къускъакъкъа ве бокъкъа толу,
темиз ер къалмады.

9Кимге акъыл огретип оладжакъ?
Кимге Раббининъ хаберини анълатаджакъ?
Ана сютюни якъында эмгенлерге,
янчыкъ кокюстен айырылгъан балаларгъамы?
10 ^dБутюн огреткенлери – сонъсуз къаиделер, къаиделер, огютлер, огютлер.
Азачыкъ андан, азачыкъ мындан алынгъан огютлер ве къаиделер.

11 ^eРабби бу халкъкъа ябанджы тильде,
анълашылмагъан сёзлернен айтаджакъ.
12Оларгъа:
«Мына – раатлыкъ, ёргъунгъа раатлыкъ беринъиз.
Тескин будыр», – деди,
амма олар динълемеге истемедилер.
13 ^fРАББИнинъ сёзлери олар ичюн:
«Сонъсуз къаиделер, къаиделер, огютлер, огютлер.
Азачыкъ андан, азачыкъ мындан алынгъан огютлер ве къаиделер».
Онынъ ичюн олар кетеджек, авдарылып йыкъыладжакълар,
яраланаджакълар, къапкъангъа тюшип, тутуладжакълар.

Сионнынъ темель ташы

14 ^gЭй, мыскъылджылар, Ерусалимдеки халкъкъа падишалыкъ эткенлер!
РАББИнинъ сёзюни динъленъиз!
15Сизлер: «Олюмнен анълаштыкъ,
олюлернинъ дюньясынен бирлештик, – дейсинъиз. –
Орталыкъны ёкъ эткен сув ташкъыны кельгенде,
бизге зарар кетирмейджек.
Бизни ялан къорчалай,
алдав тюбюнде сакъланамыз».
16 ^hБунынъ ичюн РАББИ-ТААЛЯ бойле дей:
– Бакъынъыз! Мен Сионда бир ташны –
сыналгъан, къыйметли, коше башында темельташны къояйым.
Онъа ишангъан адам къоркъмайджакъ.
17 ⁱОльчю йипинен ольчеген дайын, адалетнен суд этеджегим,
акъикъатны догърулыкънен ольчейджегим.
Ялан булунгъан ерни бурчакъ урып ёкъ этеджек,
сакълангъан ерлерни сув басаджакъ.
18Олюмнен тизген анълашманъыз дагъыладжакъ,
олюлернинъ дюньясынен бирлигинъиз де гъайып оладжакъ.
Орталыкъны ёкъ эткен сув ташкъыны кельгенде,
о, сизни таптайджакъ.
19Бу беля кельген сайын,
сизлернинъ башынъызгъа тюшеджек,
эр саба, эр куньдюз, эр гедже сизге келеджек.
Хаберни анълап, къоркъудан къалтырайджакъсынъыз.
20Аякъларынъызны узатмакъ ичюн,
тёшегинъиз къыскъа оладжакъ,
сарылып ятмакъ ичюн,
ёргъанынъыз тар оладжакъ.
21 ^jРАББИ Перацим дагъында олгъаны дайын тураджакъ,
Гивон вадийинде олгъаны киби ачувланаджакъ,
Озюнинъ меракълы, аджайип ишини япаджакъ,
о вакъыттан эвель корюльмеген арекетини этеджек.
22 ^kЭнди мыскъылджы олманъыз,
ёкъса зынджырларынъыз даа зияде агъыр оладжакъ.
Ордуларнынъ РАББИ-ТААЛЯсындан эшиттим ки,
бутюн ер юзю къырыладжакъ ве гъайып оладжакъ.

Раббининъ икмети

23Къулакъ асып, айткъанларымны динъленъиз,
дикъкъат этип, лафымны динъленъиз.
24Сачмакъ вакъты кельгенде,
сабанджы токътамаздан топрагъыны сюрерми?
Баразна этип, токътамаздан тырнакълармы?
25Ёкъ! Топракънынъ тёпесини тегизлеген сонъ,
къара зира сачар, кимьён сепер,
я да сыра-сыра богъдай, айры ерде арпа,
янына да къызыл богъдай сачар.
26Бойле тертип-низамны онъа Алла тенбиелеп огрете.

27Къара зира кескин алетнен бастырылмаз,
кимьённынъ устюнден баскъан копчекни юварлатмазлар.
Зираны да, кимьённы да таякънен дёгерлер.
28Богъдай отьмеги басылыр, амма эзильмез,
онынъ устюнден баскъан копчеклерни атларынен берабер кечирселер де,
эписи бир эзмезлер.
29 ^lБуларнынъ эписи – Ордулар РАББИсининъ эмиридир.
О, энъ аджайип акъыл огретиджидир, акъылы буюктир!