Isaiah 35
Шан-шурет падишалыгъы ве азизлик ёлу акъкъында
1Сахра ве къуру чёль къуванаджакъ,сувсуз топракъ ▼
▼Къ. еуд. «Арава».
шенъленип,гузель чечек киби ачаджакъ.
2 bАджайип чечекленип къуванаджакъ,
къуванчнен къычырып шенъленеджек.
Ливан шурети онынъ оладжакъ,
Къармел дагъларынынъ ве Шарон тегизлигининъ дюльберлиги онъа бериледжек.
Олар РАББИнинъ шуретини,
Алламызнынъ дюльберлигини кореджеклер.
3 cТакъаттан кесильген къолларынъызны къуветлендиринъиз,
къалтырагъан тизлеринъизни къавийлештиринъиз.
4 dКъоркъакъларгъа:
– Бир шейден къоркъмайып, къатты олунъыз,
Бакъынъыз, Алланъыз келе! – айтынъыз. –
О джезалайджакъ,
эр кеснинъ къазангъанына коре береджек.
О келеджек ве сизлерни къуртараджакъ.
5 eО заман кёр адамларнынъ козьлери ачыладжакъ,
сагъырларнынъ къулакълары эшитеджек.
6 fО заман топал, сыгъын киби, сычрайджакъ,
тильсизлер йырлап башлайджакъ;
сахрада сувлар фышкъыраджакъ,
къуру чёльде чокъракълар акъаджакъ.
7Сыджакъ топракъта голь,
сувсагъан топракъта чокъраклар пейда оладжакъ.
Шакъалларнынъ отургъан ерлеринде ешиль къамыш оседжек.
8 gАнда буюк бир ёл оладжакъ, о ёл «Азиз Ёл» деп адланаджакъ.
Арам адамлар андан юралмайджакъ,
о, тек Алланынъ ёлундан кеткенлер ичюн оладжакъ.
Бу ёлдан кеткен, акъылсыз олса да, ёлуны шашырмайджакъ.
9Анда арсланлар олмайджакъ,
йыртыджы айван да о ёлгъа чыкъмайджакъ.
Олар анда тапылмайджакълар.
Анда тек къуртулгъанлар юреджек.
10 hРАББИ сатын алгъан адамлар къайтаджакъ,
Сионгъа къуванчнен къычырып келеджек,
къуванч оларнен эбедиен оладжакъ.
Олар къуванч ве шенълик тападжакъ,
гъам ве къасевет исе олардан узакълашаджакъ.
Copyright information for
CrhCTB