‏ Isaiah 36

Санхерив Ерусалимни къоркъуза

1Хизкия 14-юнджи йылы падишалыкъ эткенде, Ашшур падишасы Санхерив, Ехуданынъ бутюн къавийлештирильген шеэрлерине къаршы чыкъып, оларны запт этти. 2 aАшшур падишасы Лакиш шеэринден Ерусалимге Хизкия падишасына орду башыны буюк ордусынен берабер ёллады. О келип, юкъары хавуздан акъкъан арыкъ янында токътады. О ер токъумаларны ювып къуруткъан тарлагъа баргъан ёлунда эди. 3 bОны къаршыламакъ ичюн, Хилкиянынъ огълу сарай башлыгъы Эльяким, языджы Шевна ве Асафнынъ огълу тарихчы Ёах чыкътылар.

4Орду башы оларгъа бойле деди:

– Хизкиягъа айтынъыз:

Ашшурнынъ улу падишасы бойле дей:

Сен кимге ишанасынъ?
5Сенинъ айткъан шейлеринъ – бош лаф. Дженк этмек ичюн акъыл танышув ве къувет керек. Сен исе манъа къаршы котерилип, кимге ишанасынъ? 6 cСен Мысыргъа, бу сынгъан таякъкъа ишанасынъ, гъалиба? Мысыргъа ким таянса, о къолуны санчып яралай. Мысыр падишасы олгъан фыравун онъа ишангъанларнынъ эписине ойле япа. 7 dСен, гъалиба, манъа: «Биз РАББИге, Алламызгъа ишанамыз», – дерсинъ. Лякин Хизкия шу Алланынъ ибадет тёпелерини ве къурбан ерлерини ёкъ этип, бутюн Ехуда ве Ерусалим халкъына: «Тек бу къурбан еринде ибадет этинъиз», – демедими?

8Шимди эфендимнен Ашшур падишасынен анълашсанъ ве мен санъа эки бинъ ат берсем, оларнынъ устюне атлылар тапып олурсынъмы? 9Сен эфендимнинъ энъ кичик башлыгъындан юзь чевирме, Мысыргъа ве онынъ дженк арабалары ве атлыларына ишанма. 10Бундан да гъайры, мен бу мемлекетни йыкъмагъа Алланынъ эмиринен кельдим. РАББИ манъа: «Шу мемлекетке бар да, оны ёкъ эт», – деди.

11 eЭльяким, Шевна ве Ёах орду башына:

– Бизге, къулларынъа арамий тилинде айт, биз арамийдже анълаймыз. Еудийдже лаф этме, дивардаки адамлар бизни эшителер де, – дедилер.

12Орду башы оларгъа джевап къайтарып:

– Эфендим бу сёзлерни тек сизге ве эфендинъизге айт деп, мени йибердими? Ёкъ! Диварларнынъ устюнде отургъан бу халкъкъа да йиберди. Олар сизлернен берабер ачлыкътан озь бокъларыны ашайджакълар, озь сийдиклерини ичмеге меджбур оладжакълар, – деди.

13Сонъ орду башы турып, бар сесинен еудийдже къычырды:

– Ашшурнынъ улу падишасынынъ сёзлерини динъленъиз!
14Падиша бойле дей:

Хизкия сизни алдатмасын, о сизни къуртарып оламаз!
15Хизкия Алла акъкъында: «РАББИ бизни мытлакъ къуртарыр, бу шеэр Ашшур падишасынынъ къолуна тюшмез», – деп сизни ишандырмасын. 16 fХизкияны динълеменъиз! Ашшур падишасы бойле дей: Меннен барышынъыз ве огюме чыкъынъыз. Сонъра эр кес озь юзюми ве озь инджирлерини ашасын, озь къуюсындан сув ичсин. 17 gСонъ мен келип, сизни тыпкъы сизинъ топрагъынъыз дайын топракъкъа алып кетеджегим. О топракъ – ашлыкъ ве яш шарап, отьмек ве юзюмликлер топрагъыдыр.

18Хизкия: «РАББИ бизни къуртарыр», – деп, сизлерни алдатмасын. Миллетлернинъ аллалары озь топракъларыны Ашшур падишасы къолундан къуртардымы? 19 hХамат ве Арпад шеэрлерининъ аллалары къайда? Сефарваим шеэрининъ аллалары къайда? Аллалар Самарие шеэрини менден къуртардылармы? 20 iБутюн ерлернинъ аллаларындан къайсы алла озь мемлекетини менден къуртарды? РАББИ Ерусалимни менден къуртара билирми?

21Эр кес индемеди, кимсе онъа бир сёз биле джевап бермеди, чюнки падиша джевап бермемеге буюргъан эди. 22Сонъ Хилкиянынъ огълу сарай башлыгъы Эльяким, языджы Шевна ве Асафнынъ огълу Ёах тарихчы урбаларыны йыртып, Хизкиягъа кельдилер, онъа орду башынынъ сёзлерини айтып бердилер.
Copyright information for CrhCTB