Isaiah 43
Исраильнинъ Къуртарыджысы
1 aЭй, Якъуп! Эй, Исраиль!Сени яраткъан, дюньягъа кетирген РАББИ шимди бойле дей:
– Къоркъма! Мен сени сатын алдым,
сени адынънен чагъырдым;
сен Менимсинъ!
2 bСувларнынъ ичинден кечкенинъде,
янынъда оладжагъым,
озенлерден кечкенинъде, богъулмайджакъсынъ,
атештен кечкенинъде, янмайджакъсынъ,
алев сени якъмайджакъ.
3 cМен – РАББИ, сенинъ Алланъ,
Исраильнинъ Азизи,
сенинъ Къуртарыджынъ!
Сени сатын алмакъ ичюн,
Мысыр, Хуш ве Сева мемлекетлерини бердим.
4Сен козюмде дегерли ве пек сайгъылысынъ,
Мен сени севем.
Сенинъ ичюн башкъа адамларны,
джанынъ ичюн халкъларны береджегим.
5 dКъоркъма! Мен янынъдам.
Эвлятларынъны куньдогъуш тарафындан алып келеджегим,
куньбатыш тарафындан топлайджагъым.
6Шималь тарафына: «Бер!» – айтаджагъым;
дженюпке: «Токътатма! Огъулларымны узакътан,
къызларымны ернинъ кенарындан кетир, – дейджегим.
7– Менимки олгъан эр кесни,
шуретиме яратылгъанларны,
Мен япкъан ве ясагъанларны алып кель».
Исраиль – Раббининъ шааты
8 eКозьлери олып да, кёр олгъан,къулакълары олып да, сагъыр олгъан халкъны огге чыкъар.
9 fЭписи миллетлер берабер топлаштылар,
халкълар бир ерде олдылар.
Араларында буны ким хабер этти?
Сонъундан олып кечкен шейни кунь эвельден ким айтты?
Шаатларны кетирсинлер,
догъру олгъанларыны косьтерсинлер,
адамлар эшитип, «Бу керчектир!» – десинлер.
10 g– Сизлер – Меним шаатларым ве къулларымсыз, – дей РАББИ.
– Сиз Мени билинъиз, Манъа ишанынъыз,
Мен РАББИ олгъанымны анъланъыз деп,
сизлерни сайладым.
Менден эвель алла ёкъ эди,
Менден сонъ да олмайджакъ.
11 hМен, тек Мен – РАББИдирим,
Менден гъайры Къуртарыджы ёкъ.
12Эвельден Мен хабер эттим,
къуртардым, бильдирдим.
Башкъа бир ябанджы алла буны япмады.
Сизлер – шаатларымсынъыз, – дей РАББИ-Тааля.
– Мен – Аллам!
13 iДюнья къурулгъанындан берли Мен – Аллам!
Къолумдан кимсе къуртармаз;
Мен эткенимни кимсе къайтарып оламаз.
Алланынъ мерамети ве Исраильнинъ имансызлыгъы
14РАББИ, сизлерни Сатын Алгъан,Исраильнинъ Азизи бойле дей:
– Сизинъ ичюн Вавилонгъа ордуны ёллайджагъым,
оларнынъ эписини къачакъ этеджегим,
къасдийлилер гемилеринде янгъанларындан къычыраджакълар.
15Мен – РАББИ, Азизинъиз,
Исраильнинъ Яратыджысы,
Падишанъыздырым.
16 jРАББИ бойле дей.
О, денъизде ёл ачты,
кучьлю сувлар ичинде ёл косьтерди,
17дженк арабаларыны, атларны, орду
ве бутюн олгъан кучь-къуветини алып кетирди.
Оларнынъ эписи берабер ерге тюшип, турмадылар,
фитиль киби сёнди, гъайып олдылар.
18Эвельдекилерни хатырламанъыз,
къадим шейлерни тюшюнменъиз.
19 kБакъынъыз, янъы бир шей япаджагъым!
Мына-мына пейда оладжакъ,
аджеба буны да бильмеге истемейсинъиз?
Мен сахрада ёл япаджагъым,
бакъымсыз ерлерде озенлер акъызаджагъым.
20 lКийик айванлар, шакъалларнен девекъушулар Мени шуретлейджек.
Сайлагъан халкъымны сувармакъ ичюн,
сахрада сув, бакъымсыз ерлерде озенлер акъызаджагъым.
21Шуретимни макътамакъ ичюн,
Мен Озюме бу халкъны яраттым.
22 m– Сен исе, Якъуп, Мени чагъырмадынъ!
Менден болдурдынъ, Исраиль!
23Бутюнлей якъыладжакъ къурбан оларакъ,
Манъа озь къозуларынъны кетирмединъ,
шуретиме къурбанларынъны чалмадынъ.
Манъа ашлыкъ бахшышларыны кетирмеге
сени хызмет эттирмедим,
къокъулы отларны якъмагъа зорламадым.
24 nМеним ичюн, кумюш берип, къокъулы къамыш алмадынъ,
къурбанларынънынъ ягъларынен Мени тойдурмадынъ.
Амма гуналарынъызнен агъырлыкъ кетире эдинъ,
Мени къабаатларынъызнен чекиштире эдинъ.
25 oГуналарны багъышлагъан – Меним, тек Меним.
Бир даа оларны акъылыма кетирмейджегим.
26 pНе олгъаныны Манъа хатырлатынъ да,
айды, давамызны чезейик;
акъланмакъ ичюн, бир шей айт.
27 qБаба-деделеринъиз гуна япты,
векиллеринъиз Манъа къаршы чыкъты.
28Мукъаддес Ернинъ башлыкъларындан руханийликни алдым,
Якъупны бутюнлей ёкъ этмеге,
Исраильни яманламагъа ёл ачтым.
Copyright information for
CrhCTB