‏ Isaiah 49

Раббининъ къулу

1 ^a– Адалар, Мени динъленъиз,
узакътаки халкълар, къулакъ асынъыз!
Догъгъанымдан мени РАББИ чагъырды,
адымны ана къурсагъындан бильди.
2 ^bАгъзымны кескин къылыч киби япты,
мени Озь къолунен къорчалады,
мени кескин бир окъкъа чевирди,
Озь окълугъына сакълады.
3 ^cМанъа: «Исраиль, сен – Меним къулумсынъ,
шуретимни сенде косьтереджегим», – деди.
4Амма мен: «Бошуна хызмет эттим, – дедим.
– Кучюмни ич бир шейге, бошуна масраф эттим.
Амма РАББИ манъа мытлакъа адалет косьтереджек,
Аллам мытлакъа мукяфатлайджакъ».

5Якъупны Озюне къайтармагъа,
Исраильни Озюне топламагъа,
догъгъанымдан берли РАББИ мени Озь къулу япты.
РАББИнинъ козюнде шурет къазандым,
Аллам – меним кучюмдир.
Шимди О, дей:
6 ^d– Сен – Меним къулумсынъ,
Якъупнынъ къабилелерини гъайрыдан тиклейджексинъ,
Исраильнинъ къалгъанларыны къайтараджакъсынъ.
Бундан гъайры, миллетлер ичюн бир ярыкъ оладжакъсынъ,
сенинъ ярдымынънен дюньянынъ кенарларында яшагъанларны къуртараджагъым.

7 ^eИсраильни сатын алгъан РАББИ, Азиз Алла,
масхара олгъангъа, халкъларнынъ кореджек козю олмагъангъа,
падишаларнынъ къулуна бойле дей:
– Ишанчлы РАББИ, сени сайлагъан Исраильнинъ Азизи ичюн,
падишалар сени корип, аякъкъа тураджакълар,
сенинъ огюнъде башлыкълар ерге тюшеджеклер.

Исраильнинъ гъайрыдан тикленмеси

8 ^fРАББИ бойле дей:
– Келишикли вакъытта сени эшиттим,
о куню санъа ярдым бердим, сени къуртардым.
Сени къорчалайджагъым,
халкълар ичюн сени васиет этеджегим,
ер юзюни гъайрыдан тиклейджегим,
йыкъылгъан ерлерни сабыларына къайтараджагъым,
9 ^gзинданда яткъанларгъа: «Чыкъынъыз»,
къаранлыкъта отургъанларгъа:
«Корюнинъиз», – дейджегим.

Ёллар бою айванларыны бакъаджакълар,
эр тёпелеринде отлакълары оладжакъ.
10 ^hАчлыкъ чекмейджеклер, сувсамайджакълар,
оларны сыджакънен кунь къырмайджакъ.
Оларны Аджыгъан оларгъа ёл косьтереджек,
сув чокъракъларына алып келеджек.
11Бутюн дагъларны ёлгъа чевиреджегим,
ёлларым котериледжек.
12 ⁱМына, базылары узакътан келеджек,
башкъалары шималь тарафындан ве денъизден,
даа башкъалары Синим тарафтан келеджеклер.

13 ^jЭй, коклер, къуванынъыз,
ер юзю, шенълен,
дагълар, къуванчнен къычырынъыз!
РАББИ Озь халкъынынъ юрегини алды,
Озь азап чеккенлерини аджыды.

14 ^kСион исе: «РАББИ мени ташлап кетти,
Раббим мени унутты», – дей эди.

15 ^lКъадын къундакъ баласыны унутырмы?
Догъгъан огълуны аджымазмы?
Унутса биле, сени Мен унутмайджагъым.
16Мына, сенинъ адынъны къолларымда яздым,
диварларынъ даима козюм огюнде.
17Огъулларынъ арткъа ашыкъалар,
сени йыкъкъанлар ве бошаткъанлар исе кетеджеклер.
18 ^mКозюнъни котерип, чевренъе бакъ:
эписи топлашып, санъа келелер.
– Озюмнен ант этем, – дей РАББИ.
– Олар эписи санъа бир ильван киби оладжакъ,
оларны, бир келин киби, киеджексинъ.

19 ⁿСенинъ йыкъыкъ ве бакъымсыз ерлеринъде
ве бозулгъан топрагъынъда тар оладжакъ,
о къадар чокъ адамлар анда яшайджакълар да.
Сени харап эткенлер сенден узакълашаджакъ.
20 ^oБалаларынъны джойдынъ,
амма башкъа эвлятларынъ оладжакъ,
олар сенинъ къулакъларынъа:
«Ерим тар, яшамакъ ичюн бир ер бер бизге», – дейджеклер.
21О заман юрегинъде: «Буларны манъа ким тапты? – айтаджакъсынъ.
– Мен баласыз ве къысыр эдим,
сюргюнликке къувулдым, узакъкъа кеттим.
Оларны ким осьтюрди?
Яп-янъгъыз эдим, булар къайдан чыкъты?»

Исраильнинъ къайтувы ве зорбаларнынъ суд этильмеси

22 ^pРАББИ-ТААЛЯ бойле дей:
– Бакъынъыз! Мен къолумны миллетлерге котереджегим,
халкъларгъа байрагъымны юксельтеджегим.
Олар огъулларынъны къолларында кетиреджек,
къызларынъны омузларында ташыйджакълар.
23 ^qПадишалар сизни беслейджек,
апайлары сизге даялыкъ этеджек.
Бетлеринен ерге тюшип,
аякъларынънынъ тозуны ялайджакълар.
О заман Мен РАББИ олгъанымны биледжексинъ,
Манъа ишангъанлар утанмайджакъ.

24 ^rКучьлюнинъ гъанимети къолундан тартып алынырмы?
Енъгеннинъ эсирлери къуртулып олурмы?

25 ^sРАББИ бойле дей:
– Кучьлюнинъ элинден эсирлер алынаджакъ,
зорбанынъ гъанимети олгъанлар да къуртарыладжакъ.
Душманларынъа къаршы Мен чыкъаджагъым,
Мен огъулларынъны къуртараджагъым.
26 ^tСени чекиштиргенлерге озь этлерини ашатаджагъым,
тазе шараптан киби, озь къанларындан сархош оладжакълар.
О заман эр бир джан биледжек ки,
Мен – РАББИ, сенинъ Къуртарыджынъ,
сени сатын алгъан Батыр, Якъупнынъ Алласыдырым.