Isaiah 50
Исраильнинъ гунасы
1 aРАББИ бойле дей:– Ананъызгъа айырылув кягъытыны бермейип,
оны къувдым.
Кимсеге борджлу олмайып, сизни саттым. Не ичюн?
Сизни гуналарынъыз ичюн саттым,
ананъызны акъсыз япкъанларынъыз ичюн къувдым.
2 bМен кельгенимде, не ичюн кимсе ёкъ эди?
Чагъыргъанымда, не ичюн кимсе джевап бермеди?
Сизлерни къуртармакъ ичюн,
къолум къыскъардымы, аджеба?
Сизлерни къорчаламакъ ичюн,
кучюм биттими?
Бакъынъыз! Сертнен къычыргъанымда,
денъиз къуруй, озенлер сахрагъа чевириле,
сув етмегенинден балыкълар оле ве сасый.
3 cКоклерни къаранлыкънен къаплайым,
чувал токъумаларынен киби оны япам.
Къулу Раббини динълей
4 dРухтан тюшкенни сёзнен юреклендирейим деп,РАББИ-ТААЛЯ манъа акъыллы лаф этмеге къабилиетини берди.
Акъыллы адам киби динълейим деп,
эр саба къулагъымны уята.
5РАББИ-ТААЛЯ къулагъымны ачты,
мен бунъа къаршы чыкъмадым, арткъа чекильмедим.
6 eМени ургъанларгъа аркъамны,
сакъалымны алгъанларгъа янакъларымны ачтым.
Ашаламакътан ве тюкюриктен бетимни къапатмадым.
7 fРАББИ-Тааля манъа ярдым эте,
шунынъ ичюн утанмайым,
бетимни чакъмакъташы киби этем,
масхара къалмайджагъымны билем.
8 gМени акълайджакъ Алла якъындыр,
манъа къаршы ким чыкъмагъа азыр?
Юзьме-юзь турайыкъ!
Мени къабаатламагъа ким азыр?
Яныма кельсин!
9 hМына, манъа РАББИ-ТААЛЯ ярдым эте,
мени ким къабаатлайджакъ?
Оларнынъ эписи, урба киби, ипранаджакъ,
оларны сюме ашап битиреджек.
10Аранъыздан РАББИден ким къоркъа?
Къулунынъ сёзюни ким тута?
Ярыкъ олмайып, къаранлыкъта юргенлер
РАББИнинъ Адына ишансын,
Алласына таянсын.
11Эй, атешни алевлендиргенлернинъ эписи!
Эй, янгъан окъларны туткъанлар!
Атешинъизнинъ ялынына,
окъларынъызнен якъкъан атешке кетинъиз.
Буны сизге къолум япаджакъ,
чекишип оледжексинъиз.
Copyright information for
CrhCTB