Isaiah 51
Алла Исраильни къуртара
1Эй, инсафлыкъкъа ынтылгъанлар,РАББИни къыдыргъанлар,
динъленъиз мени!
Сизлер оюлгъан къаягъа,
сизлер чыкъарылгъан чукъургъа бакъынъыз.
2 aДеденъиз Ибраимге,
сизни догъгъан Сареге бакъынъыз.
Мен Ибраимни чагъыргъанда,
о, бир адам эди.
Мен оны багъышладым,
онъа чокъ эвлятлар бердим.
3 bРАББИ Сионнынъ юреклерини аладжакъ,
онынъ йыкъылгъан ерлерине теселли береджек;
сахралары ве чёллери
РАББИнинъ Эдем багъчасы киби оладжакъ.
Анда къуванаджакъ ве шенъленеджеклер,
Алланы макътайджакъ ве йырлайджакълар.
4 cЭй, халкъым, Мени динъленъиз!
Эй, джемаатым, Манъа къулакъ асынъыз!
Менден Къанун чыкъаджакъ,
халкъларгъа ярыкъ Меним адалетли судум оладжакъ.
5 dТезден эр кесни адалетли джезалайджагъым,
къуртармагъа якъынлашам,
халкъларны кучьлю къолумнен суд этеджегим.
Адалар Манъа ишанаджакъ,
кучюме умют багълайджакълар.
6 eКозьлеринъизни коклерге котеринъиз,
сонъ ашагъы, ер юзюне бакъынъыз.
Коклер, думан киби, гъайып оладжакъ,
ер юзю, урба киби, ипранаджакъ,
анда яшагъанлар, къурт-къырмыскъа киби, оледжек.
Амма Мен эбедиен къуртарув береджегим,
адалетимнинъ сонъу олмайджакъ.
7 fЭй, адалетни бильгенлер!
Эй, юреклеринде Къануным олгъан халкъ!
Динъленъиз Мени!
Адамлар сизни яманлагъанларындан къоркъманъыз,
куфюр сёзлеринден отюнъиз патламасын!
8 gСюме оларны, урбаны киби, ашайджакъ,
къуртлар да оларны, къой юнюни киби, ашап битиреджек.
Адалетим исе эбедий оладжакъ,
несильден-несильгедже къуртарув береджегим.
9 hКотериль, котериль, эй, РАББИнинъ къолу!
Къудретли ол!
Къадимий заманлардаки киби,
эвельки несиллерде олгъаны киби, котериль!
Сен Рахавны ▼
▼Рахав – денъиз джанавары. Бельки, шу джанаварнынъ ады «гъурур» сёзюне манадаш олып келир ве Алланынъ душманы деп сайылыр. Даа Эюп 9.13 бакъ.
парча-парча кесмединъми?Денъиз аждерханы урмадынъмы?
10 jДенъизни, буюк теренликнинъ сувларыны
къурутмадынъмы, аджеба?
Сатын алынгъанлар, къуртарылгъанлар кечсин деп,
денъиз теренликлерини ёлгъа чевирген сен дегиль эдинъми?
11 kРАББИ къуртаргъанлары къайтаджакъ,
тюркюнен Сионгъа келеджек,
эбедиен къуванаджакълар,
къуванчнен шенълик тападжакълар,
къасеветлернен ынъранувлар узакълашаджакълар.
12 l– Мен, Мен Озюм гонълюнъизни аладжагъым!
Не ичюн сиз оледжек адамдан,
от киби олгъан адам огълундан къоркъасынъыз?
13 mНе ичюн сизни яраткъанны, коклерни кергенни,
ер юзюне темель къойгъан РАББИни унутасынъыз?
Не ичюн сизни ёкъ этмеге азырлангъан
залымнынъ ачувындан даима, эр кунь
къоркъып отурасынъыз?
Къана, не ерде залымнынъ ачувы?
14Зынджырларнен багълангъан тезден азатлыкъкъа чыкъаджакъ,
зинданда ольмейджек,
отьмекке мухтадж олмайджакъ.
15 nМен – РАББИ, сенинъ Алланъ;
Мен денъизни далгъалатам,
ве далгъалары гудюрдей.
Меним Адым – Ордуларнынъ РАББИсидир.
16Сёзлеримни агъзынъа къойдым,
сени къолумнен къорчаладым,
коклерни ерлештирдим,
ер юзюни пекиттим,
Сионгъа: «Сен – Меним халкъымсынъ!» – дедим.
Ерусалим душманларындан акътыманнынъ алынувы
17 oЭй, Ерусалим! Котериль, котериль, тур аякъкъа!РАББИ санъа Озь къолунен къадени берди,
къаде Онынъ ачувына толу эди.
Сен къадеден ичтинъ ве аякъларынъда турып оламадынъ.
18Догъгъан эписи огъулларындан
онъа ёл косьтерген ёкъ,
осьтюрген о къадар огъулларынъдан
къолундан туткъан кимсе ёкъ.
19 pБашынъа эки беля тюшти,
лякин сени ким аджыйджакъ?
Зорбалыкъ, йыкъылув,
ачлыкъ ве къылыч.
Сенинъ гонълюнъни ким аладжакъ?
20Огъулларынъ такъаттан кесильди,
къапкъангъа тюшкен антилопа киби,
эр сокъакъ башында яталар.
РАББИнинъ ачувыны бутюнлей корьдилер,
Алланынъ джезасыны алдылар.
21Шунынъ ичюн, эй, эзиетленген,
шарапсыз сархош олгъан!
Буны динъле!
22 qРАББИ-Таалянъ,
Озь халкъыны къорчалагъан Алланъ бойле дей:
– Бакъ! Къолунъдан сархошлаткъан къадени,
гъазабым къайнагъан савутны алдым.
Бир даа ондан ичмейджексинъ.
23Оны сени чекиштиргенлерге береджегим.
Санъа: «Ерге тюш, устюнъден кечейим», – айткъанларда,
ерге тюштинъ, ве олар устюнъден,
топракъ ве сокъакътан киби, келе-кече эдилер.
Энди оларнынъ къолуна ачувым савутыны къояджагъым.
Copyright information for
CrhCTB