‏ Isaiah 54

Янъы Исраиль

1 ^a– Эй, догъып оламагъан, баласыз къадын, къуван!
Багъыр, къуванчнен къычыр,
эй, догъып азап чекмеген!
Къысыр къадыннынъ балалары
акъайы олгъан къадыннынъ балаларындан чокътыр! – дей РАББИ.
2– Чадырынънынъ ерини кенълештир,
яшагъан еринънинъ перделерини узат,
утанма, йиплеринъни узат,
къазыкъларынъны пекит.
3Сен сагъгъа ве солгъа джайыладжакъсынъ,
эвлятларынъ халкъларнынъ топракъларыны аладжакъ,
бакъымсыз шеэрлерде ерлешеджек.

4 ^bКъоркъма, масхара олмайджакъсынъ,
утанма, ашаланмайджакъсынъ.
Яшлыкъ айыбынъны унутаджакъсынъ,
туллыкъ масхаралыгъынъны бир даа хатырламайджакъсынъ.
5 ^cСени Яраткъан – акъайынъдыр.
Онынъ Ады – Ордуларнынъ РАББИси,
Исраильнинъ Азизи – Къуртарыджынъ!
Онъа «Бутюн Ер Юзюнинъ Алласы» дейлер!
6 ^dКъувулгъан ве пешман олгъан апайны киби,
айдалгъан яшлыкъ апайыны киби,
РАББИ сени арткъа чагъыра:
7 ^e– Сени аз вакъыткъа къувдым,
амма буюк мераметнен кери къабул этеджегим.
8 ^fГъазабымнынъ къызгъын заманында
бир аньге сенден юзюмни чевирдим,
амма эбедий севгинен багъышлайджагъым,
– дей сени къуртаргъан РАББИ.

9 ^g– Бу меним ичюн Нухнынъ сув ташкъыны кибидир.
Нухнынъ сув ташкъыны ер юзюни бир даа басмайджакъ,
деп ант эттим,
ойле де, санъа ачувланмамагъа,
сени серт опькелемемеге ант эттим.
10 ^hДагълар гъайып олур,
байырлар сарсылыр,
буюк севгим исе сенден айырылмаз,
аманлыкъ васиетим де сарсылмаз, –
дей санъа мерамет эткен РАББИ.

Янъы Ерусалим

11Эй, заваллы, борангъа тутулгъан,
теселли тапмагъан шеэр!
Ташларынъны ферузе устюне къояджагъым,
темелинъни кок якъуттан япаджагъым.
12Къуллелеринъни къыйметли ташлардан,
къапуларынъны парлакъ ташлардан,
бутюн диварынъны дегерли ташлардан япаджагъым.
13 ⁱОгъулларынъ эписини РАББИ акъкъында огретеджеклер,
огъулларынъ буюк тынчлыкъ-аманлыкъ ичинде яшайджакъ.
14Сенинъ догърулыгъынъ къавий оладжакъ,
зорбалыкъ сенден узакълашаджакъ,
ич бир шейден къоркъмайджакъсынъ,
дешет де санъа якъынлашмайджакъ.
15Санъа къаршы дженклешмеге ич бирини ёлламайджагъым.
Ким исе санъа къаршы чыкъса,
енъилип йыкъыладжакъ.
16Мына, мен демирджини яраттым.
О, атештеки къорларгъа уфюре,
дженк ичюн силя япа.
Йыкъсын деп, Мен залымны яраттым.
17 ^jСанъа къаршы ич бир япылгъан силя
енъиш къазанмайджакъ,
судда сеннен давалашкъан эр кимни
къабаатлайджакъсынъ.
РАББИ къулларынынъ къысмети бойледир,
оларны Мен акълайджагъым, – дей РАББИ.