Isaiah 55
Бахыт оларакъ къуртулыш
1 aЭй, сувсагъанлар!Эпинъиз сувларгъа келинъиз!
Кумюши олмагъанлар!
Барынъыз, сатын алынъыз, ашанъыз!
Барынъыз, шарап ве сютни
кумюшсиз, парасыз алынъыз.
2 bОтьмек олмагъан шей ичюн кумюшинъизни берменъиз,
тойдурып оламагъан шейлер ичюн
къазангъан паранъызны тёлеменъиз.
Мени дикъкъатнен динъленъиз,
ве яхшы шейлерни ашайджакъсынъыз,
джанынъыз леззетли ашларгъа тояджакъ.
3 cКъулакъ асынъыз, яныма келинъиз;
динъленъиз де, джанынъыз сагъ оладжакъ.
Мен сизге эбедий васиет береджегим,
Давуткъа берильген сёзлерни береджегим.
4Мына, Мен оны халкъларгъа шаат эттим,
миллетлерге буюргъан ёлбашчы яптым.
5 dСен танымагъан миллетни чагъыраджакъсынъ;
сени бильмеген миллет санъа ашыкъаджакъ,
РАББИ, сенинъ Алланъ,
сизни шуретлеген Исраильнинъ Азизи ичюн
санъа келеджеклер.
6 eРАББИни тапмагъа чареси олгъанда,
Оны къыдырынъыз,
О, якъын олгъанында, Оны чагъырынъыз.
7Яман адам – озь ёлуны,
беля кетирген киши – озь къара ниетлерини ташласын
ве РАББИге, Алламызгъа, къайтсын.
Рабби мераметли олып, оны багъышлайджакъ.
8– Меним фикирлерим – сизинъ фикирлеринъиз дегиль,
туткъан ёлларынъыз – Меним ёлларым дегиль, – дей РАББИ.
9 f– Амма ер юзюне коре кок не къадар юксек олса,
Меним ёлларым да сизинъ ёлларынъызгъа коре,
фикирлерим де сизинъкине коре о къадар юксектир!
10Ягъмур ве къар, коктен тюшип, анда къайтмаз,
лякин топракъны сувнен тойдурыр,
топракъ исе берекет кетирир,
эм сачмакъ ичюн урлукъларны,
эм ашамакъ ичюн отьмек берер.
11 gАгъзымдан чыкъкъан сёзюм ойле де,
Манъа бош къайтмайджакъ.
О, истегимни беджереджек,
япсын деп оны ёллагъан ишни беджереджек.
12 hШенъликнен чыкъаджакъсынъыз,
тынчлыкъ-аманлыкънен сизни алып кетеджеклер,
дагълар ве байырлар огюнъизде
тюркю йырлайджакълар,
чёльдеки эписи тереклер
сизге эль чырпаджакълар.
13 iТикенлер ерине кипарис оседжек,
къыджыткъан ерине мирт тереги котериледжек.
Булар эписи РАББИге нам къазанаджакъ,
эбедий, сонъсуз бир алямет оладжакъ.
Copyright information for
CrhCTB