Isaiah 56
Эписи халкълар ичюн къуртулыш
1 aРАББИ бойле дей:– Адалетни къорчаланъыз,
инсафлы ишлер япынъыз.
Якъында Мен къуртараджагъым,
чокъ кечмеден, догърулыгъымны косьтереджегим.
2 bИнсафлы ишлерни япкъан адам,
буны гъайретнен эткен адам не де бахтлыдыр!
Раатлыкъ кунюни туткъан,
оны арамламагъан,
бир тюрлю яманлыкъ этмектен озюни сакълагъан адам бахтлыдыр!
3 cРАББИге инангъан ябанджы:
«РАББИ мени Озь халкъындан айырды», – айтмасын,
пичильген киши де:
«Мына, мен къуру бир тереким», – демесин.
4РАББИ дей:
– Эгер пичильген эр ким раатлыкъ куньлерини тутса,
Мен бегенген шейлерни сайласа,
васиетимни яхшы тутса,
5Мен эвимде ве диварларымда
онъа огъулларымдан ве къызларымдан яхшы
ад ве ер береджегим.
Ёкъ олмайджакъ, эбедий бир адны береджегим.
6РАББИге кельген, Онъа хызмет эткен,
РАББИнинъ Адыны севген,
Онынъ къулу олгъан,
раатлыкъ кунюни туткъан, оны арамламагъан,
васиетимни яхшы туткъан ябанджыларны
7 dазиз дагъыма алып кетиреджегим,
Ибадет Эвимде къувандыраджагъым,
бутюнлей якъыладжакъ ве башкъа къурбанлар
къурбан еринде къабул этиледжек;
Эвиме «Бутюн халкълар ичюн Ибадет Эви» дейджеклер.
8 eСюргюн этильген исраиллилерни
топлагъан РАББИ-ТААЛЯ бойле дей:
– Энди топлангъанлардан гъайры,
башкъаларны да топлайджагъым.
Яман ёлбашчыларнынъ джезасы
9 fЭй, эписи кийик айванлар,ормандаки бутюн айванлар!
Ашамагъа келинъиз!
10 gКъаравулларнынъ эписи кёр ве бильгисиз,
оларнынъ эписи – тильсиз копеклер;
авулдап оламай,
тюш корип, яталар,
юкъламагъа пек севелер.
11 hОлар тойып оламагъан,
ачкозь копеклердир,
акъылсыз чобанлардыр,
эписи озь ёлуна бакъалар,
тек озь файдаларыны тюшюнелер.
12 i«Келинъиз, мен шарап кетиририм,
тойгъандже ички ичейик,
ярын да бугунь киби оладжакъ,
атта даа яхшы оладжакъ», – дейлер.
Copyright information for
CrhCTB