Isaiah 58
Акъикъий ораза акъкъында
1 a– Озюнъни тутмайып, къычырып чагъыр,боразан сеси киби, сесинъни юксельт!
Халкъыма акъсыз япкъанларыны,
Якъупнынъ эвине гуналарыны косьтер.
2Олар эр кунь Мени къыдыралар,
ёлларымны бильмеге истейлер;
догъру яшагъан,
Алласынынъ къарарларыны туткъан миллет киби,
арекет этелер;
адалетли къанунлар акъкъында сорайлар,
Аллагъа якъынлашмагъа истейлер.
3 b«Аштан-сувдан вазгечемиз де, нечюн корьмейсинъ? – дейлер.
– Джанларымызнынъ истеклерини тутамыз да,
нечюн шуны бильмейсинъ?»
Бакъынъыз! Аштан-сувдан вазгечкен куню
истеклеринъизни ерине кетиресинъиз,
башкъаларны агъыр хызмет эттиресинъиз.
4Оразаны туткъанда,
къавгъа ве даваларны чокълаштырасынъыз,
башкъаларны юмрукънен яман урасынъыз.
Оразаны ойле туткъанда,
сеслеринъиз тёпеде эшитильмейджек.
5 cМен сайлагъан ораза ойле олурмы?
Алчакъгонъюлли олмагъа куню ойлеми?
Башны, къамыш киби, эгмеге,
чувал токъумасыны киймеге, кульде отурмагъа керекми?
«РАББИ истеген ораза куню» деп,
бунъа айтасынъызмы?
6 dМен сайлагъан ораза будыр:
яманлыкъ бугъавларыны чыкъарынъыз,
боюндырыкъ багъларыны чезинъиз,
эзиетленгенлерни азатлыкъкъа йиберинъиз,
эр бир боюндырыкъны йыкъынъыз.
7 eАшынъызны ачнен пай этинъиз,
эвлери олмагъан фукъарелерни эвинъизге кирсетинъиз,
урбасы олмагъанны корьсенъиз, кийиндиринъиз оны,
сой-сопларынъыздан сакъланманъыз.
8 fО заман ярыгъынъыз танъ киби агъараджакъ,
тезден яхшы оладжакъсынъыз,
догърулыгъынъыз огюнъизден кетеджек,
РАББИнинъ Шурети сизни озгъараджакъ.
9О вакъыт РАББИни чагъыргъанда,
О эшитеджек,
ярдым сорагъанда, РАББИ:
«Мен мындам», – айтаджакъ.
Аранъыздан эр тюрлю боюндырыкъны гъайып этсенъиз,
къабаатламагъа битирсенъиз,
яманламакътан вазгечсенъиз,
10ач адамгъа юрекнен берильсенъиз,
чекишкенлернинъ истеклерини беджерсенъиз,
о заман ярыгъынъыз къаранлыкъта парылдайджакъ,
къара геджеси уйле киби оладжакъ.
11 gО заман РАББИ эр заман ёлбашчынъыз оладжакъ,
къургъакъ заманында сизлерни тойдураджакъ,
беденлеринъизни къавийлештиреджек;
сувгъа тойгъан бир багъча,
суву битмеген чокъракъ киби оладжакъсынъыз.
12 hЧокътан йыкъылгъан шеэрлерни янъыдан къураджакъсынъыз,
къадимий несиллер къойгъан темеллерни тиклейджексинъиз,
сизге: «Йыкъыкъ диварны янъыдан тиклеген,
инсанларгъа ёлларны янъыдан ачкъан», – дейджеклер.
Раатлыкъ куню акъкъында
13 i– Раатлыкъ кунюни тутсанъыз,азиз кунюмде истеклеринъизден вазгечсенъиз,
раатлыкъ кунюни къувачнен беклесенъиз,
РАББИнинъ азиз кунюне сайгъы этсенъиз,
эр вакъыттаки ишлеринъизнен огърашмасанъыз,
истеклеринъизни ерине кетирмесенъиз
ве бош лаф этмесенъиз,
14 jо заман РАББИде шенълик тападжакъсынъыз;
ер юзюнинъ тёпелерине котерилип,
деденъиз Якъупкъа берильген топракънынъ
берекетини ашайджакъсынъыз, – дей РАББИ.
Copyright information for
CrhCTB