‏ Isaiah 59

Гуна, тёвбе, багъышлав

1 ^aМына, РАББИнинъ къолу, эвельдеки киби, къуртарып ола,
сагъыр олмайып, къулагъы эп даа эшите.
2 ^bАмма къабаатларынъыз сизни Алладан айырды,
гуналарынъыз ичюн, сизни эшитмесин деп,
О сизден башыны чевирди.
3 ^cКъолларынъыз къаннен,
пармакъларынъыз къабаатнен арамланды.
Агъзынъызнен ялан айтасыз,
тилинъизнен яманлайсыз.
4 ^dАдалет ичюн агъзыны ачкъан,
керчекни къорчалагъан кимсе ёкъ.
Бош шейге ишаналар, ялан айталар,
яманлыкъ тюшюнип, ярамазлыкъ догъалар.
5Йылан йымырталарында кулюк яталар,
орюмчек ювасыны япалар;
йымырталарыны ашагъан олер,
эзильген йымыртадан йылан чыкъар.
6 ^eОрюмчек йиплери урбагъа ярамаз,
эллеринен япкъан шейлерини кийип оламазлар,
япкъанлары – адалетсиз ишлер,
къолларында – зорбалыкътыр;
7 ^fаякълары яманлыкъкъа чапар,
къабаатсыз къанны тёкмеге ашыкъар.
Фикирлери – яман фикирлердир,
чевре-четини йыкъа ве къыралар.
8Аманлыкъ ёлларындан хаберлери ёкъ,
юрген ерлеринде адалет ёкъ.
Туткъан ёллары къыйыштыр,
о ёлдан кеткен эр кес аманлыкъны бильмез.

9Онынъ ичюн адалет бизден узакътыр,
догърулыкъ бизге кельмей.
Ярыкъ бекледик, къаранлыкъ кельди,
парылдыгъа ишандыкъ, зифт къаранлыкъкъа огърадыкъ.
10 ^gКёр адамлар киби, дивар тутып кетемиз,
козьсюз киби, къармаланамыз,
уйле ярыгъында акъшам къаранлыгъында киби абынамыз,
сагъ адамларнынъ арасында олюлер кибимиз.
11 ^hЭпимиз, аюв киби, окюремиз,
гогерджинлер киби, инъильдеймиз,
адалет беклеймиз, орталыкъта ёкъ,
къуртулыш беклеймиз, бизден узакъ.

12Сенинъ огюнъде чокъ къанунсызлыкъ яптыкъ,
гуналарымыз бизни къабаатлайлар,
къанунсыз япкъанларымыз козюмиз огюнде,
къабаатларымызны билемиз.
13РАББИге къаршы чыкътыкъ,
Ондан вазгечтик,
Алламыздан юзь чевирдик.
Зорбалыкъ ве хаинлик акъкъында айттыкъ,
ялан сёзлерини тюшюнип, сёйледик.
14Адалетни къувдыкъ,
догърулыкъны узакълаштырдыкъ;
керчек мейданда сюрюнди,
намускярлыкъ кирип оламады.

15Ич бир ерде акъикъат ёкъ,
яманлыкътан узакълашкъан адам
яманлыкънынъ къурбаны олды.
РАББИ бакъты да,
адалетнинъ ёкъ олгъаны Онынъ козюнде яманлыкъ эди.
16 ⁱАдам олмагъаныны корьди,
оларны къорчаламагъанына шашты.
Лякин Онынъ кучю ярдым этти,
догърулыгъы таянч олды.
17 ^jУстюне бир зырх киби, догърулыкъны кийди,
Озь башына башлыкъ киби, къуртарувны къойды.
Акътыман урбасыны кийди,
гъазапнен, япынджанен киби, устюни къаплады.
18 ^kЭр кеске япкъанларына коре береджек,
душманларына гъазабыны ёллайджакъ,
джавларына джезасыны береджек,
адаларда яшагъанлар да акъларыны аладжакъ.
19Куньбатышта РАББИнинъ Адындан къоркъаджакълар,
куньдогъушта Шуретинден отьлери патлайджакъ.
О, ташкъын дерья киби келеджек,
РАББИнинъ ели оны къувалайджакъ.

20 ^l– Сионгъа Къуртарыджы келеджек,
яманлыкътан юзь чевирген Якъупнынъ огъулларыны О, къуртараджакъ, – дей РАББИ.

21 ^m– Оларгъа берген васиетим будыр, – дей РАББИ. – Сеннен булунгъан Рухум ве агъзынъа къойгъан сёзлерим эбедиен эм сенинъ агъзынъда, эм балаларынънынъ агъзында, эм торунларынънынъ агъызларында къаладжакъ. Шимдиден ве эбедиен ойле оладжакъ!