‏ Isaiah 60

Ерусалимнинъ келеджек шурети

1 ^a– Тур, парылда, ярыгъынъ кельди,
РАББИнинъ Шурети устюнъден догъды.
2 ^bБакъынъыз! Дюньяны къаранлыкъ къаплайджакъ,
халкъларны къою булутлар япаджакъ,
сенинъ устюнъден исе РАББИ котериледжек,
устюнъден Шурети корюнеджек.
3 ^cХалкълар ярыгъынъа келеджек,
устюнъден догъгъан парылдыгъа падишалар топлашаджакъ.
4 ^dКозьлеринъни котерип, чевренъе бакъ:
эписи топланып санъа келелер,
узакътан огъулларынъ келе,
къучакъта къызларынъны кетирелер.
5 ^eБуны корип, бет-сымалары къуванч толу оладжакъ,
юрегинъ титреп ойнайджакъ,
денъиздеки байлыкъны санъа кетиреджеклер,
халкъларнынъ зенгинлиги санъа бериледжек.
6 ^fЧокътан-чокъ девелер,
Мидьяндан ве Эфадан боталар
топрагъынъны толдураджакъ.
Шевадаки бутюн халкъ санъа келеджек,
алтын ве къокъулы майны кетиреджек,
РАББИге макътав йырларыны йырлайджакълар.
7 ^gСенде Кедарнынъ эписи къой-эчкилери топлашаджакъ,
санъа Невайотнынъ къочкъарларыны кетиреджеклер,
къурбан еримде олар Мен бегенген къурбанлар оладжакълар,
ве Мен дюльбер Эвимни шан-шурет этеджегим.

8 ^hБулар кимдир?
Булутлар киби учалар,
юваларына ынтылгъан гогерджинлерге ошайлар.
9 ⁱМанъа адалар ишаналар,
башында Таршиш гемилери келелер,
узакълардан кумюш ве алтынларынен огъулларынъны кетирелер,
РАББИнинъ Ады, сенинъ Алланъ,
Исраильнинъ Азизи ичюн шуны япалар.
РАББИ сени шуретледи!

10 ^jО заман диварларынъны
ябанджыларнынъ огъуллары къураджакълар,
санъа падишалары хызмет этеджеклер.
Гъазапланып, сени урдым,
сени аджып исе, мерамет эйледим.
11 ^kКъапуларынъ даима ачыкъ оладжакъ,
гедже-куньдюз къапалмайджакъ.
Халкъларнынъ байлыгъыны,
эм де падишаларыны санъа кетиреджеклер.
12 ^lСанъа хызмет этмеге истемеген
халкълар ве падишалыкълар гъайып оладжакъ,
бойле халкълар бутюнлей ёкъ оладжакълар.

13Ливаннынъ шуретини –
кипарислер, къарагъач ве чам тереклерини, –
бирликте санъа кетиреджеклер,
оларнен Мукъаддес Еримни безетеджеклер,
ве Мен аякъ баскъан еримни шуретлейджегим.
14 ^mСени эзиетлегенлернинъ огъуллары
баш эгип санъа келеджеклер,
санъа сайгъысызлыкъ косьтерген эр кес
аякъларынъа тюшеджеклер,
санъа: «РАББИнинъ шеэри,
Исраиль Азизининъ Сионы», – дейджеклер.

15Сени къувдылар, корьмеге истемедилер,
сенден четлендилер,
энди исе сеннен гъурурланаджакълар,
несильден несильге къуванаджакълар.
16 ⁿХалкъларнынъ сютюне тояджакъсынъ,
падишанынъ къолундан кечинеджексинъ.
Сонъра биледжексинъ ки,
Мен – РАББИ, сенинъ Къуртарыджынъ,
сени сатын алгъан Якъупнынъ Кучьлюсим.
17Бакъыр ерине – алтын,
демир ерине – кумюш, терек ерине – бакъыр,
таш ерине – демир береджегим.
Тынчлыкъ-аманлыкъ сени къаравуллайджакъ,
догърулыкъ сени бакъаджакъ.
18 ^oТопрагъынъда бир даа зорбалыкъ этмейджеклер,
йыкъмайджакъ ве къырмайджакълар.
Диварларынъа – «Къуртулыш»,
араба къапуларынъа – «Макътав» дейджексинъ.
19 ^pКунеш санъа кунь ярыгъы олмайджакъ,
ай да сени артыкъ айдынлатмайджакъ.
РАББИ сенинъ эбедий ярыгъынъ,
Алланъ – шуретинъ оладжакъ.
20 ^qКунешинъ энди батмайджакъ,
айынъ сакъланмайджакъ,
эбедий ярыгъынъ РАББИ Озю оладжакъ,
агълагъан куньлеринъ битеджек.
21 ^rБутюн халкъынъ инсафлы оладжакъ,
топракъкъа эбедиен сабылыкъ этеджек.
Олар – Мен сачкъан фидан, къолларымнынъ иши, –
Мени шуретлейджеклер.
22Энъ уфакъ адамдан бинъ адам,
энъ кичкене союндан кучьлю халкъ асыл оладжакъ.
Вакъты-саати кельгенде,
Мен, РАББИ, буны тез япаджагъым.